2 വര്‍ഷത്തേക്ക് ബാങ്കിനേക്കാള്‍ പലിശ വേണോ? സര്‍ക്കാര്‍ ഗ്യാരണ്ടിയില്‍ നിക്ഷേപിക്കാന്‍ ഈ പദ്ധതി നോക്കാം

പോസ്റ്റ് ഓഫീസ് ലഘു സമ്പാദ്യ പദ്ധതികളുടെ പ്രധാന മേന്മയായി എടുത്തു കാണിക്കാവുന്നത് നിക്ഷേപങ്ങൾക്കുള്ള സർക്കാർ ​ഗ്യാരണ്ടിയാണ്. കേന്ദ്ര ധനമന്ത്രാലയം നടത്തുന്ന പദ്ധതികളാണ് ഇവ എന്നതിനാൽ നിക്ഷേപകർക്ക് സുരക്ഷിതത്വത്തോടെ നിക്ഷേപിക്കാൻ സാധിക്കും. ഇതോടൊപ്പം ബാങ്ക് നിരക്കിനേക്കാൾ പലിശ മിക്ക പോസ്റ്റ് ഓഫീസ് നിക്ഷേപങ്ങളും നൽകുന്നുണ്ട്.

സീനിയർ സിറ്റിസൺ സേവിം​ഗ്സ് സ്കീം, കിസാൻ വികാസ് പത്ര, സുകന്യ സമൃദ്ധി യോജന, നാഷണൽ സേവിം​ഗ്സ് സർട്ടിഫിക്കറ്റ് എന്നിവ. ഇക്കൂട്ടത്തിലേക്കുള്ള പുതിയ സാമ്പാദ്യ പദ്ധതിയാണ് ബജറ്റിൽ പ്രഖ്യാപിച്ച മഹിള സമ്മാന്‍ സേവിംഗ്‌സ് സര്‍ട്ടിഫിക്കറ്റ്. ഹ്രസ്വകാലത്തേക്ക് ബാങ്കിനേക്കാൾ പലിശ ഈ പദ്ധതിയിൽ നിന്ന് നേടാം.

 

മഹിള സമ്മാന്‍ സേവിംഗ്‌സ് സര്‍ട്ടിഫിക്കറ്റ്

സ്ത്രീ ശാക്തീകരണം ലക്ഷ്യമിട്ട് ധനമന്ത്രി നിര്‍മലാ സീതാരമന്‍ ബജറ്റില്‍ പ്രഖ്യാപിച്ച പുതിയ ലഘു സമ്പാദ്യ പദ്ധതിയാണ് മഹിള സമ്മാന്‍ സേവിംഗ്‌സ് സര്‍ട്ടിഫിക്കറ്റ്. പെണ്‍കുട്ടികള്‍ക്കും സ്ത്രീകള്‍ക്കുമാണ് ഈ പദ്ധതിയില്‍ ചേരാന്‍ സാധിക്കുക. 2 വര്‍ഷ കാലാവധിയുള്ള ഈ പദ്ധതിയില്‍ പരമാവധി 2 ലക്ഷം രൂപയാണ് നിക്ഷേപിക്കാന്‍ സാധിക്കുക.

ചുരുങ്ങിയ നിക്ഷേപത്തെ പറ്റി ബജറ്റിൽ പ്രഖ്യാപിച്ചിട്ടില്ല. കാലാവധിക്ക് മുന്‍പുള്ള പിന്‍വലിക്കല്‍ അനുവദിക്കുന്നു എന്നതാണ് പദ്ധതിയുടെ പ്രത്യേകത. 2025 മാര്‍ച്ച് വരെയാണ് പദ്ധതിയില്‍ ചേരാന്‍ സാധിക്കുക.

പലിശ നിരക്ക്

പദ്ധതിയെ ആകര്‍ഷകമാക്കാന്‍ ബാങ്ക് സ്ഥിര നിക്ഷേപങ്ങളേക്കാള്‍ പലിശ പ്രഖ്യാപിച്ചിട്ടുണ്ട്. രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ 2 വര്‍ഷത്തേക്കുള്ള നിക്ഷേപത്തിന് സാധാരണ നിക്ഷേപകര്‍ക്ക് 6.75 ശതമാനം പലിശയാണ് നല്‍കുന്നത്. മുതിര്‍ന്ന പൗരന്മാര്‍ക്ക് 7.25 ശതമാനം പലിശയും നല്‍കുന്നു.

മഹിളാ സമ്മാന്‍ നിധിയില്‍ 7.50 ശതമാനമാണ് വാര്‍ഷിക പലിശയായി നല്‍കുന്നത്. മുതിർന്ന പൗരന്മാർക്കും സാധാരണ നിക്ഷേപകർക്കും ഓരേ പലിശ നിരക്കാണ് ലഘു സമ്പാദ്യ പദ്ധതികൾക്ക് നൽകുന്നത്. 

മുതിർന്ന പൗരന്മാർക്ക് അധിക നേട്ടം

സീനിയര്‍ സിറ്റിസണ്‍ സേവിം​ഗ്സ് സ്‌കീമില്‍ നിക്ഷേപിക്കാനുള്ള 30 ലക്ഷം രൂപയാക്കി ഉയര്‍ത്തിയത് മുതിർന്ന പൗരന്മാരെ സംബന്ധിച്ച് നേട്ടമാണ്. നേരത്തെ 15 ലക്ഷം രൂപ വരെ മാത്രമെ പദ്ധതിയില്‍ നിക്ഷേപിക്കാന്‍ സാധിച്ചിരുന്നുള്ളൂ. 8 ശതമാനം നിരക്കില്‍ പലിശ ലഭിക്കുന്ന പദ്ധതിയിൽ 30 ലക്ഷം രൂപ നിക്ഷേപിക്കാൻ സാധിക്കുന്നത് വഴി നല്ലൊരു തുക പെൻഷൻ നേടാൻ മുതിർന്ന പൗരന്മാർക്ക് സാധിക്കും. 5 വർഷമാണ് പദ്ധതിയുടെ കാലാവധി.

60 വയസ് കഴിഞ്ഞവർക്ക് നിക്ഷേപിക്കാം. ത്രൈമാസത്തിലാണ് സീനിയര്‍ സിറ്റിസണ്‍ സേവിം​ഗ്സ് സ്കീമില്‍ നിന്ന് പലിശ ലഭിക്കുന്നത്. 30 ലക്ഷം നിക്ഷേപിച്ചാൽ 8 ശതമാനം പലിശ നിരക്കിൽ ത്രൈമാസത്തിൽ 60,000 രൂപ മാസ വരുമാനം നേടാം. 

ഇനി ഉയർന്ന മാസ വരുമാനം നേടാം

ഇതോടൊപ്പം മറ്റൊരു ലഘു സമ്പാദ്യ പദ്ധതിയായ പോസ്റ്റ് ഓഫീസ് മാസ വരുമാന പദ്ധതിയില്‍ നിക്ഷേപിക്കാവുന്ന തുകയും ഉയർത്തി. വ്യക്തിഗത അക്കൗണ്ടില്‍ നിക്ഷേപിക്കാനുള്ള പരിധി 4.50 ലക്ഷത്തില്‍ നിന്ന് 9 ലക്ഷമായി. സംയുക്ത അക്കൗണ്ടില്‍ 9 ലക്ഷം രൂപയായിരുന്ന പരിധി 15 ലക്ഷമാക്കുകയും ചെയ്തു. 7.1 ശതമാനമാണ് പോസ്റ്റ് ഓഫീസ് മാസ വരുമാന പദ്ധതിയുടെ പലിശ.

5 വർഷമാണ് പദ്ധതിയുടെ കാലാവധി. മാസത്തിൽ പലിശ വരുമാനം സേവിം​ഗ്സ് അക്കൗണ്ടിലേക്ക് ക്രെഡിറ്റ് ചെയ്യപ്പെടും. 15 ലക്ഷം രൂപ നിക്ഷേപിക്കുന്ന വ്യക്തിക്ക് 8,800 രൂപയോളം മാസത്തിൽ പലിശയായി ലഭിക്കും. കാലാവധിയിൽ നിക്ഷേപം തിരികെ ലഭിക്കുകയും ചെയ്യും.