വിരമിക്കൽ കാലത്തേക്കുള്ള സ്ഥിര വരുമാനം കണ്ടെത്താം; 200 രൂപ മാസ അടവിൽ 36,000 രൂപ പെൻഷൻ നേടാം

വിരമിക്കൽ കാലത്തും സ്വന്തം ചെലവുകൾക്കുള്ള പണം സ്ഥിരം കണ്ടെത്താനായാൽ അതിൽപരം സൗകര്യം വേറെയില്ല. മറ്റുള്ളവരെ ആശ്രയിക്കാതെ ജീവിക്കാനാണ് എല്ലാവരും ആ​ഗ്രഹിക്കുന്നത്. ഇതിനായി പെൻഷൻ അത്യാവശ്യമാണ്. സർക്കാർ ജീവനക്കാരല്ലാത്തവർക്ക് വിവിധ പെൻഷൻ പദ്ധതികളിൽ ചേർന്ന് മാസ വരുമാനം ഉറപ്പിക്കണം.

സാധാരണക്കാരായ തൊഴിലാളികൾക്കായി കേന്ദ്ര സർക്കാർ ആരംഭിച്ചൊരു പെൻഷൻ പദ്ധതിയാണ് പ്രധാനമന്ത്രി ശ്രാം യോഗി മന്‍ ധാന്‍ യോജന. മാസത്തിൽ 200 രൂപയുടെ വിഹിതം അടയ്ക്കുന്നവർക്ക് 60-ാം വയസ് മുതൽ 36,000 രൂപ വാർഷിക പെൻഷൻ ലഭിക്കുന്നതാണ് പദ്ധതി. വിശദാംശങ്ങൾ നോക്കാം.

പ്രധാനമന്ത്രി ശ്രാം യോഗി മന്‍ ധാന്‍ യോജന

രാജ്യത്തെ അസംഘടിത മേഖലയിലെ തൊഴിലാളികൾക്ക് പെൻഷൻ ഉറപ്പാക്കുകയാണ് പ്രധാനമന്ത്രി ശ്രാം യോഗി മന്‍ ധാന്‍ യോജന ലക്ഷ്യം. 2019 ലാണ് പദ്ധ‌തി ആരംഭിക്കുന്നത്. 15,000 രൂപയിൽ കുറന് മാസ വരുമാനുള്ള വ്യക്തികള്‍ക്ക് 60-ാം വയസിൽ മാസന്തോറും പരമാവധി 3,000 രൂപയാണ് പദ്ധതി വഴി ലഭിക്കുന്ന പെൻഷൻ. ലൈഫ് ഇൻഷൂറൻസ് കോർപ്പറേഷൻ വഴി കേന്ദ്ര തൊഴിൽ മന്ത്രാലയമാണ് പദ്ധതി നടപ്പിലാക്കുന്നത്. 

യോ​ഗ്യത

15,000 രൂപ മാസ വരുമാനമുള്ള 18 നും 40 നും ഇടയിൽ പ്രായമുള്ള തൊഴിലാളികൾക്ക് മാത്രമാണ് പ്രധാനമന്ത്രി ശ്രാം യോഗി മന്‍ ധാന്‍ യോജനയിൽ ചേരാനാവുക. നാഷണല്‍ പെന്‍ഷന്‍ സ്‌കീം, എംപ്ലോയിമെന്റ് പ്രൊവിഡന്റ് ഫണ്ട്, എംപ്ലോയീസ് സ്‌റ്റേറ്റ് ഇന്‍ഷൂറന്‍സ് സ്‌കീം തുടങ്ങിയ പദ്ധതികളിൽ അം​ഗമായവർക്ക് പ്രധാനമന്ത്രി ശ്രാം യോഗി മന്‍ ധാന്‍ യോജനയിൽ ചേരാൻ സാധിക്കില്ല. 

എവിടെ നിന്ന് ചേരാം

പൊതുസേവന കേന്ദ്രത്തില്‍ നിന്നോ എല്‍ഐസി ബ്രാഞ്ച്, ഇപിഎഫ്ഒ ഓഫീസ്, ലേബര്‍ ഓഫീസ് എന്നിവിടങ്ങളില്‍ നിന്ന് ശ്രാം യോഗി മന്‍ ധാന്‍ യോജനയിൽ ചേരാം. ആധാര്‍ കാര്‍ഡ്, സേവിംഗ്‌സ് ബാങ്ക് അക്കൗണ്ട് എന്നിവ ആവശ്യമാണ്. ആദ്യ അടവ് പണമായി നല്‍കണം പിന്നീടുള്ള തുക ബാങ്കില്‍ നിന്ന് ഓട്ടോ ഡെബിറ്റ് ചെയ്യും. ഇതിനാൽ മാസത്തിൽ ബാങ്കിൽ ആവശ്യമായ തുക കരുതണം.

മാസ അടവ്

60 വയസ് വരെ തൊഴിലാളി മാസ വിഹിതം തൊഴിലാളി അടയ്ക്കേണ്ടതുണ്ട്. 55 രൂപ മുതൽ 200 രൂപ വരെ വ്യത്യസ്ത മാസ അടവ് പദ്ധതിയിലുണ്ട്. പ്രായത്തിന് അനുസരിച്ചാണ് മാസ അടവ് കണക്കാക്കുന്നത്. ഇത് ബാങ്ക് അക്കൗണ്ടിൽ നിന്ന് ഓട്ടോ ഡെബിറ്റാവുകയാണ് ചെയ്യുക. തൊഴിലാളി അടയ്ക്കുന്ന വിഹിതത്തിന് തുല്യമായ തുക കേന്ദ്രസർക്കാറും അടയ്ക്കണം.

18-ാം വയസിൽ പദ്ധതിയിൽ ചേരുന്നൊരാൾ 55 രൂപയാണ് വിഹിതം അടയ്ക്കേണ്ടത്. ഇതേ തുക കേന്ദ്രസർക്കാറും അടയ്ക്കണം. 25 വയസുള്ള വ്യക്തി 80 രൂപയാണ് അടക്കേണ്ടത്. 30ാം വയസില്‍ 105 രൂപയും 40ാം വയസിൽ പദ്ധതിയിൽ ചേരുന്നയാൾ 200 രൂപയും അടയ്ക്കണം. എല്ലാവർക്കും മാസത്തിൽ 3000 രൂപ പെൻഷൻ ലഭിക്കും.

പങ്കാളിക്കും പെൻഷൻ

ശ്രാം യോഗി മന്‍ ധാന്‍ യോജനയിൽ 60 വയസിന് ശേഷം പെന്‍ഷന്‍ ഉടമ മരണപ്പെട്ടാല്‍ പങ്കാളിക്ക് പകുതി പെന്‍ഷൻ ലഭിക്കും. നിക്ഷേപം ആരംഭിച്ച് പത്ത് വര്‍ഷത്തിന് ശേഷം നിര്‍ത്തുമ്പോള്‍ അടച്ച തുകയും സേവിംഗ് ബാങ്ക് അക്കൗണ്ട് പലിശയുമാണ് ലഭിക്കുന്നത്. അറുപത് വയസ് പൂര്‍ത്തിയാകുന്നതിന് മുന്‍പ് തൊഴിലാളി മരണപ്പെട്ടാല്‍ ഭാര്യ/ ഭര്‍ത്താവിന് തുക അടച്ച് പെൻഷൻ മുന്നോട്ട് കൊണ്ടുപോകാം. അല്ലെങ്കിൽ പണം പിൻവലിക്കാം.