മുതിർന്ന പൗരന്മാർക്ക് പലിശയായി മാത്രം 12 ലക്ഷം രൂപ നേടാവുന്ന ആ പദ്ധതി ഇതാണ്

വിരമിച്ചതിന് ശേഷവും ഒരു വ്യക്തിക്ക് തന്റെ ചെലവുകളെ നടത്തി കൊണ്ടുപോകേണ്ടതുണ്ട്. മറ്റുള്ളവരെ ആശ്രയിക്കാതെ ചെലവുകൾക്കായുള്ള പണം സ്വയം കണ്ടെത്താൻ ഏതൊരു വ്യക്തിയും ആഗ്രഹിക്കുന്നു. അപ്പോൾ, വിരമിച്ചതിന് ശേഷവും വരുമാനം ലഭിക്കേണ്ടത് അത്യാവശ്യമാണ്. അതിനായി ഏറ്റവും ലാഭം ലഭിക്കുന്ന പദ്ധതിയിൽ തന്നെ നിക്ഷേപം നടത്തുന്നതാണ് നല്ലത്. അത്തരത്തിൽ മുതിർന്ന പൗരന്മാർക്ക് വിരമിച്ചതിന് ശേഷവും നല്ലൊരു വരുമാനം ലഭിക്കുന്ന ഒരു പോസ്റ്റ്‌ ഓഫീസ് പദ്ധതിയാണ്, സീനിയർ സിറ്റിസൺസ് സേവിംഗ്സ് സ്കീം (എസ്.സി.എസ്.എസ്).

7 വർഷം കൊണ്ട് ഹോം ലോൺ തിരിച്ചടക്കാം; ചെയ്യേണ്ടത്...

5 വർഷത്തേക്ക് നിക്ഷേപം നടത്താവുന്ന ഒരു പദ്ധതിയാണ് പോസ്റ്റ്‌ ഓഫീസ് സീനിയർ സിറ്റിസൺസ് സേവിംഗ്സ് സ്കീം. 30 ലക്ഷം രൂപ വരെ മുതിർന്ന പൗരന്മാർക്ക് ഈ പദ്ധതിയിൽ നിക്ഷേപിക്കാം. 8.2 ശതമാനം പലിശ ലഭിക്കുന്ന പദ്ധതിയിലെ ഏറ്റവും കുറഞ്ഞ നിക്ഷേപ തുക 1000 രൂപയാണ്. ഈ പദ്ധതിയിലൂടെ 12,30,000 രൂപ വരെ പലിശ ഇനത്തിൽ മാത്രം നിങ്ങൾക്ക് നേടാൻ സാധിക്കും. അതിലെ കണക്കുകൾ നമുക്കൊന്ന് നോക്കാം.

പദ്ധതിയിൽ പരമാവധി നിക്ഷേപ തുകയായ 30,00,000 രൂപ നിക്ഷേപിക്കുമ്പോൾ, 5 വർഷത്തിനുള്ളിൽ നിങ്ങൾക്ക് 8.2 ശതമാനം നിരക്കിൽ ത്രൈമാസികമായി 61,500 രൂപ പലിശ ഇനത്തിൽ ലഭിക്കും. അപ്പോൾ 5 വർഷത്തെ പലിശ ഇനത്തിൽ മാത്രം നിങ്ങൾക്ക് 12,30,000 രൂപ ലഭിക്കും. നിങ്ങളുടെ നിക്ഷേപ തുകയെയും ഉൾപെടുത്തുമ്പോൾ മൊത്തം സമ്പാദ്യം 42,30,000 രൂപയായിരിക്കും.

ഇനി 15 ലക്ഷം രൂപ ഈ പദ്ധതിയിൽ 5 വർഷത്തേക്ക് നിക്ഷേപിച്ചാൽ, നിലവിലെ 8.2 ശതമാനം പലിശയനുസരിച്ച്, 5 വർഷത്തിനുള്ളിൽ നിങ്ങൾക്ക് 6,15,000 രൂപ പലിശയായി മാത്രം ലഭിക്കും. ത്രൈമാസ അടിസ്ഥാനത്തിൽ പലിശ കണക്കാക്കുമ്പോൾ, ഓരോ മൂന്ന് മാസത്തിലും നിങ്ങൾക്ക് 30,750 രൂപ പലിശയായി ലഭിക്കും. അങ്ങനെ നിങ്ങളുടെ നിക്ഷേപ തുകയായ 15,00,000 രൂപയും പലിശ തുകയായ 6,15,000 രൂപയും ചേർത്താൽ മൊത്തത്തിൽ നിങ്ങളുടെ സമ്പാദ്യ തുക 21,15,000 രൂപയുണ്ടാകും.

60 വയസോ അതിൽ കൂടുതലോ പ്രായമുള്ള ആർക്കും എസ്.സി.എസ്.എസിൽ നിക്ഷേപം നടത്താം. വി.ആർ.എസ് എടുക്കുന്ന സിവിൽ മേഖലയിലെ സർക്കാർ ജീവനക്കാർക്കും പ്രതിരോധ സൈന്യത്തിൽ നിന്ന് വിരമിക്കുന്നവർക്കും ചില വ്യവസ്ഥകളോടെ പ്രായപരിധിയിൽ ഇളവ് നൽകിയിട്ടുണ്ട്. 5 വർഷത്തിന് ശേഷം പദ്ധതി കാലയളവ് പൂർത്തിയാക്കുന്നു. 5 വർഷത്തിന് ശേഷവും ഈ പദ്ധതിയിൽ തുടരാൻ നിങ്ങൾ ആഗ്രഹിക്കുന്നുണ്ടെങ്കിൽ, കാലയളവ് പൂർത്തിയാകുന്ന ഒരു വർഷത്തിനുള്ളിൽ തന്നെ അക്കൗണ്ട് കാലാവധി മൂന്ന് വർഷത്തേക്ക് കൂടി നീട്ടാവുന്നതാണ്. എസ്.സി.എസ്.എസ് പദ്ധതി സെക്ഷൻ 80 സി പ്രകാരം, നികുതി ഇളവിന് യോഗ്യമാണ്.