മിനിമം ബാലൻസിന്റെ പേരിൽ സേവിം​ഗ്സ് അക്കൗണ്ടിൽ നെ​ഗറ്റീവ് ബാലൻസായോ? പരാതിപ്പെടാം; അറിയാം അവകാശങ്ങൾ

ബാങ്കിം​ഗ് ഇടപാടുകളിൽ പ്രഥമ സ്ഥാനമാണ് സേവിം​ഗ്സ് അക്കൗണ്ടുകൾക്ക്. സേവിം​ഗ്സ് അക്കൗണ്ടുകൾ ഉപയോ​ഗിക്കുന്നവർ നേരിടുന്ന പ്രധാന പ്രശ്നമാണ് മിനിമം ബാലൻസും ഇതിന് പിന്നാലെ വരുന്ന പിഴകളും. ബാങ്കിം​ഗ് ഇടപാടുകളിലെ ഉപഭോക്തൃ അവകാശങ്ങളെ പറ്റി കൃത്യമായ ധാരണയില്ലാത്തവരാണെങ്കിൽ ബാങ്കുകൾ വലിയ തുക പിഴയായി ഈടാക്കുകയും നെ​ഗറ്റീവ് ബാലൻസിലേക്ക് പോവുകയും ചെയ്യാറുണ്ട്.

സേവി​ഗംസ് അക്കൗണ്ടിലെ മിനിമം ബാലൻസും പിഴകളും സംബന്ധിച്ച് റിസർവ് ബാങ്ക് ഓഫ് ഇന്ത്യ കൃത്യമായ മാർ​ഗ നിർദ്ദേശം നൽകിയിട്ടുണ്ട്. എന്നാൽ പല ബാങ്കുകളും ഇത് അനുസരിച്ചല്ല പിഴ ഈടാക്കുന്നത്. ഈ സാഹചര്യത്തിൽ ഉപഭോക്താക്കൾക്ക് ആർബിഐയ്ക്ക് പരാതി നൽകാനും അവസരമുണ്ട്. വിശദമായി അറിയാം.

ആർബിഐ പറയുന്നത് എന്ത്

ബാങ്ക് അക്കൗണ്ട് ആരംഭിക്കുന്ന സമയത്ത് ഉപഭോക്താവും ബാങ്കും തമ്മിലുള്ള കരാർ പ്രകാരം നിശ്ചയിക്കുന്ന മിനിമം ബാലൻസ് ഉപഭോക്താവ് നിലനിർത്തേണ്ടതുണ്ട്. ഇത് തുടരാത്ത പക്ഷം ബാങ്ക് പിഴ ഈടാക്കും. ബാലൻസ് സീറോ ആകുന്നത് വരെയോ നെഗറ്റീവ് ആകുന്നത് വരെയോ ആണ് ബാങ്ക് ചാര്‍ജുകള്‍ ഈടാക്കുന്നത്. ഇതിന് ആര്‍ബിഐ കൃത്യമായ നടപടി ക്രമങ്ങൾ നിർദ്ദേശിക്കുന്നുണ്ട്.

2014 നവംബര്‍ 20 ന് ആർബിഐ പുറത്തിറക്കിയ സർക്കുലർ പ്രകാരം, മിനിമം ബാലൻസ് കുറഞ്ഞത് സംബന്ധിച്ച് ഉപഭോക്താവിന് ബാങ്ക് ആദ്യം എസ്എംഎസ്/ ഇ-മെയിൽ വഴി അറിയിപ്പ് നൽകണം.

നോട്ടീസ്‌ നല്‍കിയ ദിവസം മുതൽ ഒരു മാസത്തിനകം മിനിമം ബാലന്‍സ് നിലനിര്‍ത്തണം എന്ന് ഇതിൽ ആവശ്യപ്പെടാം. നിശ്ചിത സമയത്തിനകം അക്കൗണ്ടിലിൽ മിനിമം ബാലന്‍സ് ക്രമീകരിച്ചില്ലെങ്കില്‍ ഉപഭോക്താവിനെ അറിയിച്ച ശേഷം പിഴ ഈടാക്കാം എന്നാണ് ആര്‍ബിഐ സര്‍ക്കലര്‍ പറയുന്നത്. പിഴ നയം സംബന്ധിച്ച് ബാങ്ക് ബോര്‍ഡ് നേരത്തെ തീരുമാനം എടുക്കണം.

എത്ര രൂപ വരെ പിഴ

കുറവുള്ള തുകയുടെ അടിസ്ഥാനത്തിലാണ് പിഴ ഈടാക്കേണ്ടതെന്ന് ആര്‍ബിഐ സര്‍ക്കുലര്‍ പറയുന്നു. അതായത് ബാങ്ക് നിര്‍ദ്ദേശിക്കുന്ന മിനിമം ബാലന്‍സും അക്കൗണ്ടിലുള്ള ബാലന്‍സും കമ്മിലുള്ള വ്യത്യാസത്തിന്റെ നിശ്ചിത ശതമാനമാകണം പിഴ തുക. ആര്‍ബിഐ സര്‍ക്കുലറിലെ പ്രധാന പോയിന്റ് നെഗറ്റീവ് ബാലന്‍സ് സംബന്ധിച്ചതാണ്. മിനിമം ബാലന്‍സ് ഈടാക്കാത്തതിന്റെ പേരില്‍ അക്കൗണ്ട് നെഗറ്റീവിലേക്ക് പോകാന്‍ പാടില്ലെന്നാണ് ആര്‍ബിഐ പറയുന്നു.

പരാതിപ്പെടാം‍

ഇത്തരത്തിൽ നെ​ഗറ്റീവ് ബാലൻസ് ഈടാക്കുകയാണെങ്കിൽ ഉപഭോക്താക്കൾക്ക് പരാതി നൽകാം. ആദ്യം പരാതിയുമായി ബാങ്കിനെ സമീപിക്കാം. 30 ദിവസത്തേക്ക് പരാതി പരിഹാരത്തിനായി കാത്തിരിക്കാം. ബാങ്ക് പരാതി പരിഹരിച്ചില്ലെങ്കില്‍ ആര്‍ബിഐ ബാങ്കിംഗ് ഓംബുഡ്‌സമാന് പരാതി നൽകാം. ഓംബുഡ്സ്മാന്റെ ഔദ്യോ​ഗിക പോര്‍ട്ടിലില്‍ പരാതി നല്‍കാം. പരാതിയുടെ സ്ഥിതിയും വെബ്സൈറ്റിൽ പരിശോധിക്കാം. 14488 എന്ന ടോൾഫ്രീ നമ്പറിലും പരാതിയുടെ സ്റ്റാറ്റസ് പരിശോധിക്കാം.

അക്കൗണ്ട് അവസാനിപ്പിക്കാൻ സാധിക്കില്ല

സേവിംഗ്‌സ് അക്കൗണ്ടില്‍ നെഗറ്റീവ് ബാലന്‍സ്ആണെങ്കില്‍ ബാങ്ക് അക്കൗണ്ട് അവസാനിപ്പിക്കാന്‍ അനുവദിക്കില്ല. ആവറേജ് മിനിമം ബാന്‍സ് നിലനിര്‍ത്താത്ത ഘട്ടത്തില്‍ പിഴ ചുമത്തുമ്പോഴാണ് ബാങ്ക്ബാലന്‌സ് നെഗറ്റീവാകുന്നത്. അക്കൗണ്ട് അവസാനിപ്പിക്കല്‍ നടപടി ആരംഭിക്കും മുന്‍പ് ബാലന്‍സ് പരിശോധിക്കണം. സേവിം​ഗ്സ് അക്കൗണ്ട് അവസാനിപ്പിക്കും മുൻപ് സ്റ്റാൻഡിം​ഗ് ഇൻസ്ട്രക്ഷനുകൾ പരിശോധിക്കാം.

ഇഎംഐ, ബില്ലുകൾ, പ്രതിമാസ സബ്‌സ്‌ക്രിപ്‌ഷനുകൾ, പ്രതിമാസ എസ്ഐപി എന്നിവ അടയ്‌ക്കാൻ ഉപയോ​ഗിക്കുന്ന അക്കൗണ്ടാണ് ഉപയോ​ഗിക്കുന്നതെങ്കിൽ സേവിംഗ്‌സ് അക്കൗണ്ടുമായി ലിങ്ക് ചെയ്‌തിരിക്കുന്ന അത്തരം സ്റ്റാൻഡിംഗ് നിർദ്ദേശങ്ങളോ ഓട്ടോമേറ്റഡ് ക്ലിയറൻസുകളോ ആദ്യം റദ്ദാക്കണം. പേയ്‌മെന്റ് നിർദ്ദേശങ്ങൾ റദ്ദാക്കാതെ അക്കൗണ്ട് അവസാനിപ്പിച്ചാൽ അടവ് മുടങ്ങാൻ കാരണമാകും. ഇഎംഐ പോലുള്ളവ മുടങ്ങുന്നത് ക്രെഡിറ്റ് സ്കോറിനെ കാര്യമായി ബാധിക്കും.