ആദ്യ മാസം 2.85 ലക്ഷം നേടാൻ അവസരം; മാസം 5,000 രൂപ അടവ് സാധിക്കുമെങ്കിൽ ഈ ചിട്ടി ചേരാം

മൾട്ടി ഡിവിഷൻ ചിട്ടിയുടെ പ്രത്യേകതകളിലൊന്ന് കൂടുതൽ പേർക്ക് ഒരു മാസം ചിട്ടി ലഭിക്കും എന്നത് തന്നെയാണ്. നറുക്കെടുപ്പിലൂടെ ഒരാൾക്ക് മുഴുവൻ തുകയും മൂന്ന് പേർക്ക് ലേലത്തിലൂടെ ചിട്ടി ലഭിക്കുകയും ചെയ്യുന്നതാണ് മൾട്ടി ഡിവിഷൻ ചിട്ടിയുടെ രീതി. മാസം 5,000 രൂപ വരെ അടവ് സാധിക്കുന്ന 2.85 ലക്ഷം രൂപ വരെ നേടാൻ സാധിക്കുന്ന ചിട്ടിയെ ഈ ലേഖനത്തിൽ പരിചയപ്പെടാം.

ചിട്ടി വിശദാംശം

5000 രൂപ മാസ അടവും 60 മാസ കാലയളവുമുള്ള മള്‍ട്ടി ഡിവിഷന്‍ ചിട്ടിയാണിത്. മാസത്തില്‍ 5,000 രൂപയും 3,875 രൂപയ്ക്കും ഇടയില്‍ അടവ് സാധിക്കുന്നവര്‍ക്ക് ചിട്ടിയില്‍ ചേരാം. 35 ശതമാനം വരെ കിഴിവില്‍ ചിട്ടി ലേലം വിളിക്കാം. മള്‍ട്ടി ഡിവിഷന്‍ ചിട്ടിയായതിനാല്‍ മാസത്തില്‍ നാല് പേര്‍ക്ക് ചിട്ടി ലഭിക്കും. ഒരാള്‍ക്ക് മുഴുവന്‍ തുകയും 3 പേര്‍ക്ക് 35 ശതമാനം വരെ ലേലം വിളിച്ചെടുക്കാനും സാധിക്കും. 35 ശതമാനം ലേല കിഴിവിൽ പോകുന്ന മാസങ്ങളിൽ 1,125 രൂപ ലാഭവിഹിതമായി ചിട്ടി വരിക്കാർക്ക് ലഭിക്കും.

എത്ര രൂപ ലഭിക്കും

നറുക്കിലൂടെ ചിട്ടി ലഭിക്കുന്നൊരാള്‍ക്ക് 2.85 ലക്ഷം രൂപ ലഭിക്കും. 60 മാസവും നറുക്കിലൂടെ മാസത്തിൽ ഒരാൾക്ക് ചിട്ടി ലഭിക്കും. 35 ശതമാനം ലേല കിഴിവില്‍ ചിട്ടി ലഭിച്ചാല്‍ 1.95 ലക്ഷം രൂപയും ലഭിക്കും. ഈ തുകയില്‍ നിന്നും ജിഎസ്ടിയും ഡോക്യുമെന്റേഷന്‍ ചാര്‍ജും കിഴിച്ചാണ് ചിട്ടി പണം ലഭിക്കുക.

ഫോർമാൻസ് കമ്മീഷന്റെ 18 ശതമാനമാണ് ജിഎസ്ടി. ഡോക്യുമെന്റേഷൻ ചാർജ് 250 രൂപയോളം വരും. 3 ലക്ഷത്തിന്റെ ചിട്ടിയിൽ 5 ശതമാനം ഫോർമാൻസ് കമ്മീഷൻ 15,000 രൂപ വരും. ഈ തുകയുടെ 18 ശതമാനമാണ് ജിഎസ്ടി നൽകേണ്ടത്. 2700 രൂപ ജിഎസ്ടി വരും.

സ്ഥിര നിക്ഷേപമിട്ടാൽ

3 ലക്ഷത്തിന്റെ മള്‍ട്ടി ഡിവിഷന്‍ ചിട്ടിയിൽ നറുക്കിലൂടെ ആദ്യ മാസത്തിൽ ചിട്ടി ലഭിക്കുന്നവർക്ക് സ്ഥിര നിക്ഷേപമിട്ടാൽ മികച്ച നേട്ടം കൊയ്യാം. 2,82,000 രൂപ സ്ഥിര നിക്ഷേപമിടാൻ ലഭിച്ചാൽ നിലവിലെ 8.15 ശതമാനം പലിശയിൽ 3 ലക്ഷത്തേക്കാൾ നേട്ടമുണ്ടാക്കാം. മാസത്തിൽ 1,680 രൂപ പലിശയായി ലഭിക്കുമ്പോൾ 59 മാസത്തേക്ക് സ്ഥിര നിക്ഷേപം തുടർന്നാൽ 99,120 രൂപ പലിശയായി ലഭിക്കും. പലിശയും മുതലും ചേർത്ത് കാലാവധിയിൽ 3,81,120 രൂപ പിൻവലിക്കാം.

ജാമ്യങ്ങൾ

ചിട്ടി സ്ഥിര നിക്ഷേപമിട്ടാൽ ജാമ്യം നൽകേണ്ട എന്നതിനൊപ്പം വലിയ സാമ്പത്തിക നേട്ടവും ലഭിക്കും. എന്നാൽ ചിട്ടി പണം പിൻവലിക്കാൻ ആ​ഗ്രഹിക്കുന്നൊരാൾ മേൽ ബാധ്യതയ്ക്ക് തുല്യമായ തുകയ്ക്ക് ജാമ്യം നൽകേണ്ടതുണ്ട്. ലേലം വിളിക്കുന്നത് വരെ അടച്ച തുക ജാമ്യമില്ലാതെ പിൻവലിക്കാം.

ബാക്കി തുകയ്ക്കാണ് ജാമ്യം നൽകേണ്ടത്. സർക്കാർ ജീവനക്കാരുടെ സാലറി സർട്ടിഫിക്കറ്റ്, സ്വർണം, വിളിക്കാത്ത ചിട്ടി പാസ് ബുക്ക്, എൽഐസി പോളിസി, ബാങ്ക് ഗ്യാരണ്ടി, വസ്തു ജാമ്യം മുതലായവയാണ് ചിട്ടിയിൽ സ്വീകരിക്കുന്ന പ്രധാന ജാമ്യങ്ങൾ. ഒന്നിലധികം ജാമ്യങ്ങൾ ഉപയോ​ഗിച്ചും ചിട്ടി പണം പിൻവലിക്കാം.

എവിടെ ലഭിക്കും

കെഎസ്എഫ്ഇയുടെ എറണാകുളം മൂത്തകുന്നം, ആലപ്പുഴ III ബ്രാഞ്ച്, മുഹമ്മ, തിരുവനന്തപുരം ആര്യനാട് ശാഖകളിൽ ഉടൻ ആരംഭിക്കുന്ന ചിട്ടികളുടെ കൂട്ടത്തിൽ മുകളിൽ വിശദമാക്കിയ മൾട്ടി ഡിവിഷൻ ചിട്ടിയുണ്ട്. കെഎസ്എഫ്ഇ ആരംഭിക്കുന്ന പുതിയ ചിട്ടികളെ പറ്റി അറിയാൻ ഓൺലൈൻ സംവിധാനമുണ്ട്. ksfeonline.com എന്ന വെബ്സൈറ്റ് വഴിയാണ് പുതിയ ചിട്ടികൾ ഏതൊക്കെ എന്നറിയാം. New Chits എന്ന സെക്ഷനിൽ ജില്ലയും ബ്രാഞ്ചും തിരഞ്ഞെടുത്ത് ഓരോ ബ്രാഞ്ചിലെയും ആരംഭിക്കാനിരിക്കുന്ന ചിട്ടികൾ അറിയാൻ സാധിക്കും.