വിരമിക്കൽ കാലത്ത് മാസ വരുമാനം ആവശ്യമുണ്ടോ? 20,000 രൂപ വരുമാനം നേടാൻ 5 പദ്ധതികളിതാ

വിരമിക്കൽ കാലത്ത് മാസ വരുമാനം എന്നത് ആവശ്യ ചെലവുകളെ നേരിടാനുള്ള തുകയാണ്. ആരോ​ഗ്യ ചെലവുകൾ, ആഹാരം, യാത്രകൾ തുടങ്ങിയവയ്ക്കായി സ്വന്തം തീരുമാന പ്രകാരം ചെലവാക്കാൻ കയ്യിൽ പണമുണ്ടെങ്കിൽ അതുതന്നെയാണ് വിരമിക്കൽ കാലത്തെ സുവർണകാലമാക്കുന്നത്.

വിരമിക്കൽ കാലത്തേക്കായി കരിയറിൽ തന്നെ മികച്ച പദ്ധതികളിൽ ചേർന്ന് നല്ല തുക കണ്ടെത്താനാകും. വിരമിച്ച ശേഷം കയ്യിൽ വരുന്ന തുക ഉപയോ​ഗിച്ചും വിരമിക്കൽ കാലത്തേക്ക് വരുമാനം കണ്ടെത്താൻ സാധിക്കും. ഈ വിഭാ​ഗത്തിൽ ഉൾപ്പെടുന്ന 5 പദ്ധതികളെ പരിചയപ്പെടാം.

അടൽ പെൻഷൻ യോജന

വിരമിച്ചതിന് ശേഷം സ്ഥിര വരുമാനം ആ​ഗ്രഹിക്കുന്നവർക്ക് കേന്ദ്ര സർക്കാർ നടത്തുന്ന സാമൂഹ്യ സുരക്ഷാ പദ്ധതിയാണ് അടൽ പെൻഷൻ യോജന. ബാങ്ക് അക്കൗണ്ടുള്ള 18 നും 40 നും ഇടയിൽ പ്രായമുള്ള ആർക്കും പദ്ധതിയിൽ അംഗമാകാം. ആദായ നികുതി റിട്ടേൺ സമർപ്പിക്കുന്നവർക്ക് പദ്ധതിയിൽ ചേരാനാകില്ല.

വരിക്കാർക്ക് 1,000 രൂപ, 2,000 രൂപ, 3,000 രൂപ, 4,000 രൂപ, 5,000 രൂപ വരെ പ്രതിമാസ പെൻഷൻ ലഭിക്കും. തിരഞ്ഞെടുക്കുന്ന പെൻഷനും ചേരുന്ന സമയത്തെ പ്രായവും അടിസ്ഥാനമാക്കിയാണ് പ്രീമിയം കണക്കാക്കുന്നത്. 60-ാം വയസ് മുതൽ പെൻഷൻ ലഭിക്കും. 

സീനിയർ സിറ്റിസൺ സേവിം​ഗ്സ് സ്കീം

60 വയസ് കഴിഞ്ഞവർക്ക് സ്ഥിര വരുമാനം ലഭിക്കുന്നതിനുള്ളൊരു പദ്ധതിയാണ് സീനിയർ സിറ്റിസൺ സേവിം​ഗ്സ് സ്കീം. കുറഞ്ഞത് 1,000 രൂപയും പരമാവധി 30 ലക്ഷം രൂപയുമാണ് നിക്ഷേപ പരിധി. വ്യക്തി​ഗത അക്കൗണ്ടോ പങ്കാളിയുമൊത്ത് സംയുക്ത അക്കൗണ്ടോ ആരംഭിക്കാം.

നിക്ഷേപിക്കുന്ന തുകയ്ക്ക് ആദായ നികുതി നിയമത്തിലെ സെക്ഷൻ 80സി പ്രകാരമുള്ള നികുതി ഇളവ് ലഭിക്കും. ത്രൈമാസത്തിലാണ് പലിശ നൽകുന്നത്. 8.2 ശതമാനമാണ് ഏപ്രിൽ- ജൂൺ പാദത്തിലെ പലിശ നിരക്ക്. 10 ലക്ഷം രൂപ നിക്ഷേപിച്ചാൽ ത്രൈമാസത്തിൽ 20,500 രൂപ ലഭിക്കും. 

മ്യൂച്വൽ ഫണ്ട്

ജോലിക്കാലത്ത് എസ്ഐപി നിക്ഷേപത്തിലൂടെ നല്ലൊരു തുക സമ്പാദിക്കാനും വിരമിക്കൽ കാലത്ത് സിസ്റ്റമാറ്റിക്ക് വിത്ത്ഡ്രോവൽ പ്ലാൻ വഴി മാസ വരുമാനം നേടാനും മ്യൂച്വൽ ഫണ്ട് സഹായിക്കും. കയ്യിലുള്ള മ്യൂച്വൽ ഫണ്ട് യൂണിറ്റുകൾ മാസത്തിൽ നിശ്ചിത ശതമാനം വില്പന നടത്തി ആവശ്യമായ തുക പിൻവലിക്കുന്നതാണ് എസ്ഡബ്ലുപി. 15 ലക്ഷം രൂപയുടെ സമ്പാദ്യമുണ്ടെങ്കിൽ 12 ശതമാനം റിട്ടേൺ ലഭിക്കുന്ന ഫണ്ടിൽ നിന്ന് 10 വർഷത്തേക്ക് 20,000 രൂപ മാസത്തിൽ ലഭിക്കും.

പോസ്റ്റ് ഓഫീസ് മാസ വരുമാന പദ്ധതി

കുറഞ്ഞത് 1,000 രൂപയും പരമാവധി 9 ലക്ഷം രൂപയുമാണ് പോസ്റ്റ് ഓഫീസ് മാസ വരുമാന പദ്ധതിയിൽ നിക്ഷേപിക്കാവുന്ന തുക. സംയുക്ത അക്കൗണ്ടിൽ പരമാവധി 15 ലക്ഷം രൂപ വരെ നിക്ഷേപിക്കാം. 5 വർഷമാണ് നിക്ഷേപ കാലാവധി. 7.4 ശതമാനമാണ് നിക്ഷേപത്തിന് ലഭിക്കുന്ന പലിശ നിരക്ക്. വ്യക്തി​ഗത അക്കൗണ്ടിൽ 9 ലക്ഷം രൂപ നിക്ഷേപിച്ചാൽ 5,550 രൂപ മാസത്തിൽ ലഭിക്കും. 15 ലക്ഷം രൂപ നിക്ഷേപിച്ചാൽ മാസത്തിൽ 9,250 രൂപ ലഭിക്കും. 

നാഷണൽ പെൻഷൻ സ്കീം

വിരമിക്കൽ കാലത്തേക്കുള്ള സമ്പാദ്യം ഉണ്ടാക്കിയെടുക്കാൻ കേന്ദ്ര സർക്കാർ ആരംഭിച്ച പദ്ധതിയാണ് നാഷണൽ പെൻഷൻ സ്കീം. ഈ സ്കീമിന് കീഴിൽ ടയർ 1, ടയർ 2 എന്നിങ്ങനെ രണ്ട് തരം അക്കൗണ്ടുകൾ തുറക്കാം. ടയർ 1 അക്കൗണ്ടിൽ കുറഞ്ഞത് 500 രൂപയും ടയർ 2 അക്കൗണ്ട‌ിൽ 1,000 രൂപയും നിക്ഷേപിക്കണം.

ടയർ 1 അക്കൗണ്ടിലെ നിക്ഷേപമാണ് പെൻഷനായി മാറ്റുന്നത്. ഈ നിക്ഷേപത്തിന് ആദായനികുതി നിയമത്തിലെ സെക്ഷൻ 80സിസിഡി, 80സി പ്രകാരമുള്ള കിഴിവുകൾ ക്ലെയിം ചെയ്യാം. 60-ാം വയസ് മുതൽ പെൻഷൻ ലഭിക്കും. 27 വയസുകാരന്‍ മാസത്തില്‍ 4,000 രൂപ വീതം നിക്ഷേപിച്ചാല്‍ 10 ശതമാനം റിട്ടേണ്‍ പ്രതീക്ഷിച്ചാല്‍ 60-ാം വയസില്‍ 24,921 രൂപ പെന്‍ഷന്‍ നേടാം.