ജൂണ്‍ 7 മുതല്‍ പുതിയ ഇ ഫയലിംഗ് പോര്‍ട്ടല്‍; നികുതി അടയ്‌ക്കേണ്ടത് എങ്ങനെയെന്ന് അറിയാം

ആദായ നികുതി വകുപ്പ് നികുതി ദായകര്‍ക്കായി പുതിയ വെബ് പോര്‍ട്ടല്‍ ഉടന്‍ പ്രവര്‍ത്തനമാരംഭിക്കും. ആദായ നികുതി റിട്ടേണ്‍ ഫയല്‍ ചെയ്യുന്നതുള്‍പ്പെടെയുള്ള പ്രവര്‍ത്തനങ്ങള്‍ കൂടുതല്‍ എളുപ്പമാക്കുന്നതിനാണ് ഈ മാറ്റം. നിലവിലുള്ള വെബ് പോര്‍ട്ടല്‍ ജൂണ്‍ 1 മുതല്‍ 6 വരെയുള്ള 6 ആറ് ദിവസങ്ങളില്‍ പ്രവര്‍ത്തിക്കുകയില്ല എന്നും വകുപ്പ് ഉദ്യോഗസ്ഥര്‍ അറിയിച്ചു.

ജൂണ്‍ ഏഴാം തീയ്യതി മുതല്‍ നികുതി ദായകര്‍ക്കായി ആദായ നികുതി വകുപ്പിന്റെ പുതിയ വെബ് പോര്‍ട്ടല്‍ പ്രവര്‍ത്തനക്ഷമാമുകയും ചെയ്യും. www.incometaxindiaefiling.gov.in എന്ന നിലവിലെ പോര്‍ട്ടില്‍ നിന്നും www.incometaxgov.in എന്ന പോര്‍ട്ടലിലേക്കാണ് ജൂണ്‍ 7 മുതല്‍ മാറ്റം സംഭവിക്കുക. പുതിയ പോര്‍ട്ടലിന്റെ ലോഞ്ചിംഗ് പ്രവര്‍ത്തനങ്ങളും ഡാറ്റാ കൈമാറ്റ പ്രക്രയികളും നടക്കുന്നതിനാലാണ് ജൂണ്‍ 1 മുതല്‍ 6 വരെ നിലവിലെ വെബ്‌സൈറ്റിന്റെ പ്രവര്‍ത്തനം നിര്‍ത്തിവച്ചിരിക്കുന്നത്. ഈ സമയത്ത് നികുതി ദായകര്‍ക്കും ആദായ നികുതി ഉദ്യോഗസ്ഥര്‍ക്കും പോര്‍ട്ടല്‍ ലഭ്യമാവുകയില്ല.

നികുതി ദായകര്‍ ഈ കാലയളവില്‍ നേരത്തെ നിശ്ചയിച്ചിട്ടുള്ള കാര്യങ്ങളുണ്ടെങ്കില്‍ അത് പുനക്രമീകരിക്കേണ്ടതായി വരും. ആദായ നികുതി റിട്ടേണ്‍ ഫയല്‍ ചെയ്യുന്നതിനും റീഫണ്ടുകള്‍ക്കായുള്ള പരാതികള്‍ രജിസ്റ്റര്‍ ചെയ്യുന്നതിനും നികുതി വകുപ്പുമായുള്ള മറ്റ് അനുബന്ധ കാര്യങ്ങള്‍ക്കുമായാണ് നികുതി ദായകര്‍ ഇ ഫയലിംഗ് പോര്‍ട്ടല്‍ ഉപയോഗിക്കുന്നത്.

അതേ സമയം ഈ സാമ്പത്തിക വര്‍ഷത്തില്‍ 24,792 കോടി രൂപയ്ക്ക് മുകളിലാണ് 15 ലക്ഷത്തിലധികം നികുതി ദായകര്‍ക്ക് നികുതി വകുപ്പ് റീഫണ്ട് അനുവദിച്ചിരിക്കുന്നത്. ഇതില്‍ വ്യക്തിഗത വരുമാനത്തില്‍ 14.98 ലക്ഷം പേര്‍ക്കായി 7,458 കോടി രൂപയാണ് നല്‍കിയിരിക്കുന്നത്. ്43,661 നികുതി ദായകര്‍ക്കായി കോര്‍പറേറ്റ് നികുതി റീഫണ്ട് 17,334 കോടി രൂപയാണ് നല്‍കിയിരിക്കുന്നത്.