പൊന്നേ, ഐ ലവ് യൂ..! പ്രണയ ദിനത്തിൽ വില കുറഞ്ഞ് സ്വർണം, ഈ മാസം കുറഞ്ഞത് 1000 രൂപ വരെ

പ്രണയ ദിനമാണ് ഫെബ്രുവരി 14. പരസ്പരം പ്രണയിക്കുന്നവർ സമ്മാനങ്ങൾ പരസ്പരം കൈമാറുന്ന ദിവസം. സ്വർണാഭരണങ്ങളോ സ്വർണ നാണയങ്ങളോ സമ്മാനം നൽകാൻ ആഗ്രഹിക്കുന്നവർക്ക് സന്തോഷത്തിനുള്ള വകയുണ്ട്. കാരണം സ്വർണ വിലയിൽ ഇന്ന് കുറവ് രേഖപ്പെടുത്തിയിട്ടുണ്ട്.

ഇന്നത്തെ വില

46,080 രൂപയായിരുന്നു ചൊവ്വാഴ്ചയിലെ സ്വർണ വില. 80 രൂപ പവന് കുറഞ്ഞാണ് 46,080ലെത്തിയത്. ഇന്ന് വീണ്ടും സ്വർണത്തിന്റെ വില കുറഞ്ഞു. 480 രൂപയാണ് പ്രണയ ദിനത്തിൽ ഒരു പവൻ സ്വർണത്തിന് കുറഞ്ഞത്.

45,600 രൂപയിലാണ് ബുധനാഴ്ച സ്വർണ വ്യാപാരം നടക്കുന്നത്. ഗ്രാമിന് 5,700 രൂപ. ഫെബ്രുവരി മാസം സ്വർണത്തിന് രേഖപ്പെടുത്തുന്ന ഏറ്റവും കുറഞ്ഞ വിലയാണ് ഇന്നത്തേത്.

ഫെബ്രുവരി മാസത്തെ സ്വർണ വില

46,520 രൂപയായിയുന്നു ഫെബ്രുവരി ഒന്നിലെ സ്വർണ വില. രണ്ടാം തീയ്യതി സ്വർണ വില 120 രൂപ കൂടി 46,640 രൂപയിലെത്തി. ഫെബ്രുവരിയിൽ ഇതുവരെ രേഖപ്പെടുത്തിയ ഏറ്റവും ഉയർന്ന സ്വർണ വിലയാണിത്. 46480 രൂപയായിരുന്നു മൂന്നാം തീയ്യതിയിലെ വില. അഞ്ചാം തീയ്യതി 46360 ലേക്കും ആറാം തീയ്യതി 46200 രൂപയിലേക്കും സ്വർണ വില കുറഞ്ഞു. 46400 രൂപയിലാണ് ഏഴാം തീയ്യതിയും 8 ആം തീയ്യതിയും സ്വർണ വ്യാപാരം നടന്നത്. 10 ആം തീയ്യതി ഫ്രെബ്രുവരി മാസത്തെ ഏറ്റവും കുറഞ്ഞ നിരക്കിലെത്തി. 46,160 രൂപയായിരുന്നു അന്നത്തെ വില. 12 ആം തീയ്യതി വരെ ഇതേ വിലയിലാണ് സ്വർണ വ്യാപാരം നടന്നത്.

ഫെബ്രുവരി മാസം 1040 രൂപയാണ് സ്വർണത്തിന് ഇതുവരെ കുറഞ്ഞത്. ഇതേ പ്രവണത വരും ദിവസങ്ങളിലും തുടരുമെന്നാണ് ആഭരണ പ്രേമികളുടെ പ്രതീക്ഷ.

ഗോൾഡ് അഡ്വാൻസ് ബുക്കിം​ഗ്

സ്വർണ വില കുറയുന്നത് വാങ്ങാനുള്ള അവസരമായി ഉപയോ​ഗപ്പെടുത്തുന്നവർക്ക് ​ഗോൾഡ് അഡ്വാൻസ് ബുക്കിം​ഗ് ഉപയോ​ഗപ്പെടുത്താം. മുഴുവൻ തുക ചെലവാക്കാതെ കുറഞ്ഞ വിലയിൽ സ്വർണം ബുക്കക് ചെയ്തിടാനുള്ള മാർ​ഗമാണിത്. വിവാഹത്തിന് ഒരുങ്ങുന്നവർക്ക് അഡ്വാൻസ് ബുക്കിം​ഗ് ഏറെ പ്രയോജനം ചെയ്യും. ഇന്നത്തെ കുറഞ്ഞ വിലയിൽ സ്വർണം ബുക്ക് ചെയ്യാനും ആവശ്യ വില ഉയർന്നാൽ കുറഞ്ഞ വിലയിൽ വാങ്ങാനും ഉപകരിക്കും. അഡ്വാൻസ് ബുക്കിം​ഗിന് സ്വർണ വിലയുടെ നിശ്ചിത ശതമാനം ജുവലറികൾ അഡ്വാൻസ് ബുക്കിം​ഗ് ചാർജായി ഈടാക്കും.

ഏറ്റവും ഉയർന്ന വില 47,120

2023 ഡിസംബർ 27 നാണ് സ്വർണത്തിന് ചരിത്രത്തിലെ ഏറ്റവും ഉയർന്ന വില രേഖപ്പെടുത്തിയത്. അന്ന് ഒരു പവന് 47,120 രൂപയിലേക്കാണ് വില ഉയർന്നത്. ഗ്രാമിന് 5890 രൂപയായിരുന്നു. ഡിസംബർ 4ലെ വില 47080 രൂപയാണ് ഇതുവരെയുള്ള രണ്ടാമത്തെ ഉയർന്ന വിലനിലവാരം.

നിലവിൽ ലോകത്തിലെ ഏറ്റവും വലിയ സ്വർണ ഉപഭോക്താക്കളാണ് ഇന്ത്യ. 2008 മുതൽ കൃത്യമായി പറഞ്ഞാൽ ലോകത്തെ പിടിച്ചുകുലുക്കിയ ആഗോള സാമ്പത്തികമാന്ദ്യത്തിനു ശേഷമാണ് നിക്ഷേപകരുടെ നോട്ടം സ്വർണത്തിൽ പതിഞ്ഞത്. സ്വർണത്തിൽ നിക്ഷേപിച്ചാൽ നഷ്ടമുണ്ടാകില്ലെന്ന വിശ്വാസവും ഇതിന് ആക്കം കൂട്ടുന്നു. 2007 കാലയളവിൽ വെറും 10,000 രൂപയുണ്ടായിരുന്ന സ്വർണത്തിന് ഇന്ന് വില നാലിരട്ടിയാണ്.

സ്വർണം വാങ്ങുന്നതിന് മുൻപ് ശ്രദ്ധിക്കേണ്ട ചില കാര്യങ്ങളുണ്ട്. അവ പരിശോധിക്കാം.

പണിക്കൂലി : സ്വർണ്ണത്തിന്റെ വിപണി വിലയ്ക്ക് പുറമെയാണ് പണിക്കൂലി ഈടാക്കുന്നത്. സ്വർണ്ണം ആഭരണം ആക്കി മാറ്റുന്നതിനുള്ള ചിലവിനെയാണ് പണിക്കൂലി എന്നതുകൊണ്ട് ഉദ്ദേശിക്കുന്നത്. പണിക്കൂലി ഓരോ ജ്വല്ലറികളിലും വ്യത്യസ്ത തരത്തിലാണ്. പണിക്കൂലി സാധാരണയായി നിലവിലെ സ്വർണ്ണ വിലയുടെ ഒരു ശതമാനമാണ്.

വിലനിർണ്ണയം : സ്വർണ്ണത്തിന്റെ വില നിർണ്ണയം ആഗോള മാർക്കറ്റുകളുടെ ചാഞ്ചാട്ടത്തിന്റെ അടിസ്ഥാനത്തിലാണ്. അതോടൊപ്പം പ്രാദേശിക കാര്യങ്ങളും വിലയിരുത്തും. അതുകൊണ്ടുതന്നെ സ്വർണ്ണത്തിന്റെ വില ഓരോ ദിവസവും മാറ്റങ്ങൾക്ക് വിധേയമാണ്.

3. വിലകൾ താരതമ്യം ചെയ്യുക : പണിക്കൂലി അടക്കം ചില ജ്വല്ലറികൾ സ്വർണ്ണത്തിന്റെ വില ഈടാക്കാറുണ്ട്. തിടുക്കപ്പെട്ടു വാങ്ങാതെ വിലകൾ താരതമ്യം ചെയ്ത് വാങ്ങുന്നത് സാമ്പത്തിക നഷ്ടം കുറയ്ക്കാൻ സഹായകരമാകും.