ബംപറടിക്കാത്തതിന്റെ വിഷമം വേണ്ട; മാസം 500 രൂപ നീക്കിവെച്ചാൽ ലക്ഷങ്ങൾ നേടാം; എസ്ഐപി തുടങ്ങാം

അങ്ങനെ ഓണം ബംപറും നറുക്കെടുത്തു. ഒന്നാം സമ്മാനമായ 25 കോടി രൂപ TE 230662 എന്ന ടിക്കറ്റ് കൊണ്ടു പോയി. രണ്ടാം സമ്മാനമായ 1 കോടി വീതം നേടുന്ന 20 പേരെയും കണ്ടെത്തി. ഓണം ബംപർ ഇത്തവണയും കയ്യിന്ന് പോയാൽ വിഷമിക്കേണ്ട. അൽപം കാത്തിരുന്നാൽ നിങ്ങളും ലക്ഷാധിപതിയും കോടിപതിയുമാകും. 

അടുത്ത ഓണം ബംപറിനുള്ള കാത്തിരിപ്പാണെന്ന് കരുതിയാൽ തെറ്റി. എസ്ഐപി വഴി കഴിയുന്ന ചെറിയ തുക അച്ചടക്കത്തോടെ നിക്ഷേപിച്ചാൽ വരും നാളിലെ കോടിപതിയും ലക്ഷാധിപതിയുമാണ് നിങ്ങൾ.

ഓണം ബംപറെടുക്കാൻ ഈ മാസം 500 രൂപ മാറ്റിവെച്ചവരാണെങ്കിൽ ഒരു മടിയും കൂടാതെ മാസത്തിൽ 500 രൂപ നിക്ഷേപത്തിനായി മാറ്റിവെയ്ക്കണം. മ്യൂച്വൽ ഫണ്ടിൽ സിസ്റ്റമാറ്റിക്ക് ഇൻവെസ്റ്റ്മെന്റ് പ്ലാൻ (എസ്ഐപി) വഴി നിക്ഷേപിക്കുന്നതിന് പണം ഉപയോ​ഗിക്കാം. ചെറിയ തുകയിൽ തുടങ്ങുന്ന എസ്ഐപി ദീർഘകാലത്തേക്ക് നീട്ടുമ്പോൾ എങ്ങനെ ലക്ഷങ്ങളായി വളരുമെന്ന് നോക്കാം.

500 രൂപയുടെ പ്രതിമാസ എസ്ഐപി

ഇത്തവണത്തെ ഓണം ബംപറിന്റെ ടിക്കറ്റ് വിലയായ 500 രൂപയിൽ പ്രതിമാസ എസ്ഐപി ആരംഭിച്ചാലുള്ള റിട്ടേൺ ആദ്യം പരിശോധിക്കാം. 100 രൂപ മുതൽ പ്രതിമാസ എസ്ഐപി അനുവദിക്കുന്ന ഫണ്ടുകളുണ്ട്. പ്രതിമാസം 500 രൂപയുടെ എസ്ഐപി 10 വർഷത്തേക്ക് നടത്തുമ്പോൾ 15 ശതമാനം വാർഷിക റിട്ടേൺ പ്രതീക്ഷിച്ചാൽ 60,000 രൂപയുടെ നിക്ഷേപം 1,39,329 രൂപയായി വളരും.

10 വർഷം കൊണ്ട് 79,329 രൂപയാണ് ഈ നിക്ഷേപത്തിലൂടെ ഉണ്ടാക്കിയ ലാഭം. മാസം 2,000 രൂപ എസ്ഐപി വഴി നിക്ഷേപിക്കുന്നൊരാൾക്ക് 10 വർഷത്തേക്ക് 15 ശതമാനം റിട്ടേൺ ലഭിക്കുമ്പോൾ 5,57,315 രൂപ നേടാനാകും. 2.40 ലക്ഷത്തിന്റെ നിക്ഷേപത്തിൽ നിന്ന് 3,17,315 രൂപ ലാഭമുണ്ടാക്കാൻ സാധിക്കും.

10 വർഷം കൊണ്ട് 1 കോടി

മ്യൂച്വൽ ഫണ്ടിൽ എത്ര കാലം നിക്ഷേപിക്കണം എന്നത് ഓരോരുത്തരുടെയും നിക്ഷേപ ലക്ഷ്യം അനുസരിച്ചിരിക്കും. 12 ശതമാനം റിട്ടേണ്‍ പ്രതീക്ഷിക്കുന്നൊരു മ്യൂച്വല്‍ ഫണ്ടിൽ നിന്ന് 10 വർഷം കൊണ്ട് ഒരു കോടി രൂപ നേടാൻ മാസത്തിൽ 44,000 രൂപയുടെ പ്രതിമാസ എസ്ഐപി ആവശ്യമായി വരും. 15 വര്‍ഷത്തേക്ക് നിക്ഷേപം നിശ്ചയിക്കുമ്പോൾ എസ്ഐപി അടവ് കുറയും.

12 ശതമാനം റിട്ടേൺ പ്രതീക്ഷിക്കുമ്പോൾ 19,819 രൂപ മാസത്തിൽ എസ്ഐപി വഴി നിക്ഷേപിക്കണം. റിട്ടേണ്‍ നിരക്ക് 10 ശതമാനമാണെങ്കില്‍ മാസത്തിൽ 24,000 രൂപയുടെ എസ്ഐപി ചെയ്യണം. 12 ശതമാനം റിട്ടേൺ പ്രതീക്ഷിക്കുമ്പോൾ 11,500 രൂപയുടെ എസ്ഐപി ആരംഭിച്ച് വർഷത്തിൽ എസ്ഐപി തുക 10 ശതമാനം ടോപ്പ്ആപ്പ് ചെയ്താലും 15 വർഷം കൊണ്ട് 1 കോടി രൂപ നേടാം.

ശ്രദ്ധിക്കേണ്ട കാര്യങ്ങൾ

മ്യൂച്വൽ ഫണ്ട് വിപണി അധിഷ്ഠിതമായ നിക്ഷേപമാണ്. അതിനാൽ റിട്ടേൺ മുൻകൂട്ടി പ്രവചിക്കുക അസാധ്യമാണ്. വിപണി ചാഞ്ചാട്ടവും ഫണ്ടുകളുടെ പ്രകടനം അനുസരിച്ച് റിട്ടേൺ വ്യാത്യാസപ്പെടാം. ഓരോരുത്തരുടെയും നിക്ഷേപ ലക്ഷ്യം, റിസ്‌കെടുക്കാനുള്ള ശേഷി എന്നിവ പരിഗണിച്ച് വേണം ഏത് വിഭാഗത്തിലെ ഫണ്ട് ആവശ്യമെന്ന് തിരഞ്ഞെടുക്കേണ്ടത്.

ഫണ്ടിന്റെ സമാന വിഭാഗത്തിലുള്ള മറ്റ ഫണ്ടുകളെക്കാളും ബെഞ്ച്മാര്‍ക്കിനേക്കാളും തുടര്‍ച്ചയായി മികച്ച പ്രകടനം നടത്തുന്നതാണെന്ന് പരിശോധിക്കേണ്ടതുണ്ട്. എന്നാൽ മുൻകാല പ്രകടനം മാത്രം പരി​ഗണിച്ച് നിക്ഷേപം നടത്താനും പാടില്ല.