പാൻ കാർഡ് ഇന്ന് മുതൽ 'ഡെഡ്' ആയോ? പാൻ- ആധാർ ലിങ്ക് ചെയ്യാത്തവർ ഈ കാര്യം അറിഞ്ഞിരിക്കണം

പാൻ കാർഡുമായി നിങ്ങളുടെ ആധാർ ലിങ്ക് ചെയ്തോ? 2025 ഡിസംബർ 31 വരെയായിരുന്നു ഇതിനുള്ള സമയപരിധി. പല തവണയായി ഈ സമയത്തിനുള്ളിൽ ഇവ പരസ്പരം ലിങ്ക് ചെയ്യണമെന്ന് ആവശ്യപ്പെട്ടിരുന്നു. എന്നിട്ടും പലരും ഈ തിയ്യതി മറന്നു പോയിട്ടുണ്ട്. സത്യത്തിൽ ഈ സമയത്തിനുള്ളിൽ ഇവ ബന്ധിപ്പിച്ചിട്ടില്ലെങ്കിൽ വലിയ പ്രതിസന്ധികൾ നേരിടേണ്ടി വരും. പ്രധാനമായും നിങ്ങളുടെ പാൻ പ്രവർത്തന രഹിതമാവാൻ സാധ്യതയുണ്ട്. ഇത് ഉയർന്ന നികുതികൾ, റീഫണ്ടുകൾ തടയൽ, നിയന്ത്രിത സാമ്പത്തിക ഇടപാടുകൾ തുടങ്ങി നിരവധി പ്രശ്നങ്ങൾക്ക് കാരണമാവും.

പാൻ കാർഡ് പ്രവർത്തനരഹിതമാണോ?

ബാങ്കോ തൊഴിലുടമയോ ഒരു സാധാരണ നിരക്കിലാണ് ടിഡിഎസ് കുറയ്ക്കുന്നത്. എന്നാൽ ആധാറുമായി പാൻ ലിങ്ക് ചെയ്തിട്ടില്ലെങ്കിൽ നിങ്ങളിൽ നിന്ന് ഉയർന്ന നിരക്കിൽ ടിഡിഎസ് അല്ലെങ്കിൽ ടിസിഎസ് ഈടാക്കും.

പാൻ പ്രവർത്തിക്കുന്നില്ലെങ്കിൽ സ്ഥിര നിക്ഷേപങ്ങളിലൂടെയും മറ്റും ലഭിക്കുന്ന പലിശ വരുമാനങ്ങൾക്ക് ഉയർന്ന ടിഡിഎസ് ഈടാക്കും. അതായത് സാധാരണ 10 ശതമാനം ഈടാക്കുന്നുണ്ടെങ്കിൽ നിങ്ങളിൽ നിന്നും 20 ശതമാനം ഈടാക്കും.

പാൻ പ്രവർത്തന രഹിതമാണെങ്കിൽ പ്രതിമാസം ശമ്പളം വാങ്ങുന്നവരിൽ നിന്നും വലിയ നിരക്കിലായിരിക്കും നികുതി കുറക്കുന്നത്.

ആധാറും പാനും ലിങ്ക് ചെയ്തില്ലെങ്കിൽ എന്തു സംഭവിക്കും?

• നിങ്ങളുടെ പാൻ ആക്ടിവേറ്റ് ചെയ്യുന്നതുവരെ, നിങ്ങളുടെ ഫോം 26AS-ൽ ടിഡിഎസ്, ടിസിഎസ് എന്നിവ ദൃശ്യമാകില്ല.
• സാധുവായ ഒരു ടിഡിഎസ് സർട്ടിഫിക്കറ്റ് നൽകാൻ കഴിയില്ല.
• നിങ്ങളുടെ മൊത്തം വരുമാനം നികുതി പരിധിക്ക് താഴെയാണെങ്കിലും, പലിശ വരുമാനത്തിന്മേലുള്ള ടിഡിഎസ് ഒഴിവാക്കാൻ ഫോം 15G അല്ലെങ്കിൽ 15H സമർപ്പിക്കാനുള്ള അവകാശം നിങ്ങൾക്ക് നഷ്ടപ്പെടും.
• റീഫണ്ടുകൾ മരവിപ്പിക്കുകയും പിഴകൾ ഈടാക്കുകയും ചെയ്യും.

നിങ്ങളുടെ പാൻ ലിങ്ക് ചെയ്യാതെ റീഫണ്ട് ലഭിക്കില്ലെന്ന് ആദായനികുതി വകുപ്പ് വ്യക്തമാക്കിയിട്ടുണ്ട്. നിങ്ങളുടെ പാൻ പ്രവർത്തനരഹിതമാണെങ്കിൽ ഏതെങ്കിലും നികുതി റീഫണ്ട് തടഞ്ഞുവയ്ക്കപ്പെടും.

പാൻ കാർഡ് എങ്ങനെ വീണ്ടും ആക്ടിവേറ്റ് ചെയ്യാം?

പാൻ-ആധാർ ലിങ്ക് ചെയ്യുന്നതിനുള്ള സമയപരിധി കഴിഞ്ഞു. എങ്കിലും നിങ്ങൾക്ക് ഇപ്പോഴും ലിങ്ക് ചെയ്യാനുള്ള ഒരു ഓപ്ഷൻ നിലനിൽക്കുന്നുണ്ട്. എന്നാൽ അതിന് നിശ്ചിത തുക പിഴയായി അടക്കേണ്ടി വരും എന്ന് മാത്രം. പിഴയായി നികുതിദായകർ 1,000 രൂപ അടക്കേണ്ടി വരും. പ്രവർത്തനരഹിതമായ പാൻ എങ്ങനെ വീണ്ടും ആക്ടിവേറ്റ് ചെയ്യാമെന്ന് നോക്കാം;

• ആദ്യം 1,000 രൂപ ഫീസ് അടക്കണം. അത് ഔദ്യോഗിക പോർട്ടലിലെ ഇ-പേ ടാക്സ് ഫെസിലിറ്റി വഴിയാണ് അടക്കേണ്ടത്.
• പിഴ അടച്ചതിനുശേഷം, പാൻ-ആധാർ ലിങ്കിംഗ് പ്രക്രിയ പൂർത്തിയാക്കാൻ കഴിയും.
• പിഴ അടച്ച് ആക്ടിവേറ്റ് ആവുന്നതിന് ഏകദേശം 7 മുതൽ 30 ദിവസം വരെ സമയം എടുക്കും. ഈ പ്രക്രിയ ചെയ്യുന്നതു വരെ പാൻ കാർഡിൻ്റെ സ്റ്റാറ്റസ് 'ഇനോപ്പറേറ്റീവ്' എന്ന ഫോർമാറ്റിലായിരിക്കും. ഇത് ആക്ടിവേറ്റായാൽ സ്റ്റാറ്റസ് പരിശോധിച്ചാൽ 'ആക്റ്റീവ്' എന്ന നിലയിലേക്ക് മാറും.