എസ്ബിഐയുടെ കവച് വ്യക്തിഗത വായ്പ എടുക്കാന്‍ തീരുമാനിച്ചോ? ഈ കാര്യങ്ങള്‍ അറിഞ്ഞിരിക്കാം

കോവിഡ് ചികിത്സയ്ക്കായി സാമ്പത്തീക ബുദ്ധിമുട്ടുകള്‍ നേരിടുന്ന വ്യക്തികളെ സഹായിക്കുന്നതിനായി കുറഞ്ഞ പലിശ നിരക്കില്‍ എസ്ബിഐ അവതരിപ്പിച്ചിരിക്കുന്ന വായ്പാ പദ്ധതിയാണ് എസ്ബിഐ കവച്. കോവിഡ് ബാധിതരായ അക്കൗണ്ട് ഉടമകള്‍ക്ക് അവരുടേയും കുടുംബാംഗങ്ങളുടെയും കോവിഡ് ചികിത്സാ ചിലവിനായി ഈ വായ്പയ്ക്ക് അപേക്ഷിക്കാവുന്നതാണ്. 2021 ഏപ്രില്‍ 1ന് ശേഷം കോവിഡ് ബാധിതരായ വ്യക്തികള്‍ക്ക് മാത്രമേ ഈ വായ്പാ സേവനം ലഭിക്കുകയുള്ളൂ.

മാസവരുമാനക്കാര്‍ക്കു, പെന്‍ഷന്‍കാര്‍ക്കും അങ്ങനെ എല്ലാ ഗണത്തിലുള്ളവര്‍ക്കാം എസ്ബിഐ കവച് വായ്പയ്ക്കായി അപേക്ഷിക്കുവാന്‍ സാധിക്കും. വായ്പ അനുവദിച്ച് ലഭിക്കുന്നതിനായി അപേക്ഷകന്‍ കോവിഡ് പോസിറ്റീവ് ആയത് തെളിയിക്കുന്ന രേഖകള്‍ ബാങ്ക് ശാഖയില്‍ സമര്‍പ്പിക്കേണ്ടതുണ്ട്.

വായ്പാ അപേക്ഷകന്റെ തിരിച്ചടവ് ശേഷി അനുസരിച്ച് ഏറ്റവും ചുരുങ്ങിയത് 25,000 രൂപ മുതല്‍ പരമാവധി 5 ലക്ഷം രൂപ വരെ കോവിഡ് ചികിത്സാ വായ്പയായി ലഭിക്കും. 5 വര്‍ഷമാണ് വായ്പാ തിരിച്ചടവ് കാലാവധി. ഇതില്‍ മൂന്ന് മാസത്തെ മോറട്ടോറിയം കാലയളവ് കൂടി ഉള്‍പ്പെടും. അപേക്ഷകന്റെ ക്രെഡിറ്റ് സ്‌കോറും തിരിച്ചടവ് ശേഷിയും വിലയിരുത്തിയാണ് ബാങ്ക് വായ്പ അനുവദിക്കുക. 8.5 ശതമാനമാണ് എസ്ബിഐ കവച് വ്യക്തിഗത വായ്പകളുടെ പലിശ നിരക്ക്. ഈടില്ലാത്ത വായ്പയ്ക്ക് ലഭിക്കുന്ന ഏറ്റവും താഴ്്ന്ന പലിശ നിരക്കാണിത്.

നിലവില്‍ 5 വര്‍ഷം വരെയുള്ള എസ്ബിഐയുടെ വ്യക്തിഗത വായ്പകള്‍ക്ക് ഈടാക്കുന്ന പലിശ നിരക്ക് 9.6 ശതമാനം മുതല്‍ 13.85 ശതമാനം വരെയാണ്. അതിനൊപ്പം വായ്പാ ഉപയോക്താവ് വായ്പാ തുകയുടെ 1.5 ശതമാനം പ്രൊസസിംഗ് ചാര്‍ജായും നല്‍കണം. കൂടാതെ ചക്ക് സേവന നികുതിയും.

സമീപത്തുള്ള എസ്ബിഐ ബാങ്ക് ശാഖയില്‍ ചെന്ന് കവച് വ്യക്തിഗത വായ്പയ്ക്കായി അപേക്ഷിക്കാം. എസ്ബിഐ മൊബൈല്‍ ബാങ്കിംഗ് സേവനങ്ങള്‍ ഉപയോഗിക്കുന്ന ഉപയോക്താക്കള്‍ക്ക് ഡിജിറ്റല്‍ രീതിയിലും വായ്പ നേടാം. ഈ വായ്പ ലഭിക്കുന്നതിനായി അപേക്ഷകന്‍ ബാങ്കില്‍ ഈടൊന്നും തന്നെ സമര്‍പ്പിക്കേണ്ടതില്ല. ഒപ്പം പ്രൊസസിംഗ് ചാര്‍ജുകളോ, സെക്യൂരിറ്റി ഡെപ്പോസിറ്റോ തുടങ്ങിയ അധിക ചാര്‍ജുകളൊന്നും തന്നെ കവച് വ്യക്തിഗത വായ്പകള്‍ക്കില്ല.

ചെറിയ തുകയായതിനാല്‍ എത്രയും വേഗത്തില്‍ വായ്പ അടച്ചു തീര്‍ത്താല്‍ പലിശ ഇനത്തില്‍ ചിലവാകുന്ന തുക കുറയ്ക്കുവാനും സാധിക്കും.