പിഎം കിസാൻ 22-ാം ഗഡു ഉടൻ; അക്കൗണ്ടിലേക്ക് 2,000 രൂപ എത്താൻ ഈ കാര്യങ്ങൾ ശ്രദ്ധിക്കണം, അപേക്ഷിക്കുന്നില്ലേ?

രാജ്യത്തെ കർഷകരുടെ സാമ്പത്തിക ഭദ്രത ഉറപ്പാക്കുന്നതിനായി കേന്ദ്ര സർക്കാർ നടപ്പിലാക്കുന്ന ഏറ്റവും പ്രധാനപ്പെട്ട പദ്ധതികളിലൊന്നാണ് പിഎം-കിസാൻ സമ്മാൻ നിധി. 2019-ൽ ആരംഭിച്ച ഈ പദ്ധതിയിലൂടെ അർഹരായ കർഷകർക്ക് പ്രതിവർഷം 6,000 രൂപ വീതമാണ് ധനസഹായമായി നൽകുന്നത്. ഈ തുക 2,000 രൂപ വീതമുള്ള മൂന്ന് തുല്യ ഗഡുക്കളായി നേരിട്ട് കർഷകരുടെ ബാങ്ക് അക്കൗണ്ടുകളിലേക്ക് കൈമാറുന്നു.

ഇതുവരെ 21 ഗഡുക്കൾ വിജയകരമായി വിതരണം ചെയ്ത സർക്കാർ, നിലവിൽ 22-ാം ഗഡു വിതരണം ചെയ്യാനുള്ള തയ്യാറെടുപ്പിലാണ്. പദ്ധതി ആരംഭിച്ച് ഇതുവരെയായി ഏകദേശം 4.09 ലക്ഷം കോടി രൂപയിലധികം കർഷകർക്ക് കൈമാറിക്കഴിഞ്ഞു. പിഎം കിസാൻ പോർട്ടലിൽ കൃത്യമായ ഭൂമി വിവരങ്ങൾ, ആധാർ വിവരങ്ങൾ, ഇ-കെവൈസി എന്നിവ നിർബന്ധമാണ്. 2025 നവംബർ 19-നായിരുന്നു 21-ാം ഗഡു വിതരണം ചെയ്തത്. അന്ന് 9 കോടിയിലധികം വരുന്ന കർഷകർക്കായി ഏകദേശം 18,000 കോടി രൂപയാണ് സർക്കാർ വിതരണം ചെയ്തത്.

22-ാം ഗഡു വിതരണം ചെയ്യുന്നതിന് മുന്നോടിയായി ഗുണഭോക്തൃ പട്ടികയിൽ പേരുണ്ടെന്ന് കർഷകർ ഉറപ്പുവരുത്തേണ്ടതുണ്ട്. പിഎം കിസാൻ ഔദ്യോഗിക വെബ്സൈറ്റ് വഴിയോ പിഎം കിസാൻ മൊബൈൽ ആപ്പ് വഴിയോ ലളിതമായി ഇ-കെവൈസി നടപടികൾ പൂർത്തിയാക്കാവുന്നതാണ്.

യോഗ്യതാ മാനദണ്ഡം

• സംസ്ഥാനത്തെയോ, കേന്ദ്രഭരണ പ്രദേശത്തെയോ ഭൂ രേഖകളിൽ പേരുള്ള ഭൂവുടമയായ കർഷകന് പിഎം കിസാൻ പദ്ധതിയിൽ അപേക്ഷിക്കാം.
• 01.02.2019 ലെ സംസ്ഥാന/കേന്ദ്രഭരണ പ്രദേശങ്ങളിലെ ഭൂരേഖകളിൽ പേരുള്ള, 2 ഹെക്ടർ വരെ കൃഷിയോഗ്യമായ ഭൂമി കൈവശം വച്ചിരിക്കുന്ന എല്ലാ ഭൂവുടമ കർഷക കുടുംബങ്ങൾക്കും ഈ പദ്ധതിയുടെ ആനുകൂല്യം ലഭിക്കും.

ആർക്കെല്ലാം യോ​ഗ്യതയില്ല?

• സ്ഥാപന ഭൂവുടമകൾക്ക് പിഎം കിസാൻ പദ്ധതിയിൽ അപേക്ഷിക്കാൻ സാധിക്കില്ല.

• ഭരണഘടനാ പദവികൾ വഹിച്ചിട്ടുള്ള മുൻകാലത്തെയോ, നിലവിലുള്ളതോ ആയ വ്യക്തികൾ, മന്ത്രിമാർ/ സംസ്ഥാന മന്ത്രിമാർ, ലോക്‌സഭ/ രാജ്യസഭ/ സംസ്ഥാന നിയമസഭകൾ/ സംസ്ഥാന നിയമസഭകൾ എന്നിവയിലെ മുൻ/ ഇപ്പോഴത്തെ അംഗങ്ങൾ, മുൻ മുനിസിപ്പൽ കോർപ്പറേഷനുകളുടെ മേയർമാർ, ജില്ലാ പഞ്ചായത്തുകളുടെ മുൻ, ഇപ്പോഴത്തെ ചെയർപേഴ്‌സൺമാർ എന്നിവർ യോ​ഗ്യരല്ല.

• കേന്ദ്ര/സംസ്ഥാന സർക്കാർ മന്ത്രാലയങ്ങൾ/ഓഫീസുകൾ/വകുപ്പുകൾ, അവയുടെ ഫീൽഡ് യൂണിറ്റുകൾ, കേന്ദ്ര/സംസ്ഥാന പൊതുമേഖലാ സ്ഥാപനങ്ങൾ, സർക്കാരിനു കീഴിലുള്ള അറ്റാച്ച്ഡ് ഓഫീസുകൾ/സ്വയംഭരണ സ്ഥാപനങ്ങൾ എന്നിവയിൽ സേവനമനുഷ്ഠിക്കുന്നതോ വിരമിച്ചതോ ആയ ഉദ്യോഗസ്ഥരും ജീവനക്കാരും, തദ്ദേശ സ്വയംഭരണ സ്ഥാപനങ്ങളിലെ സ്ഥിരം ജീവനക്കാരും ഈ പദ്ധതിക്ക് അപേക്ഷിക്കാൻ യോ​ഗ്യരല്ല.

• 10,000 രൂപയോ അതിൽ കൂടുതലോ പ്രതിമാസ പെൻഷൻ ലഭിക്കുന്ന എല്ലാ സൂപ്പർആന്വേറ്റഡ്/റിട്ടയർഡ് പെൻഷൻകാർക്കും അപേക്ഷിക്കാൻ സാധിക്കില്ല.

• ഡോക്ടർമാർ, എഞ്ചിനീയർമാർ, അഭിഭാഷകർ, ചാർട്ടേഡ് അക്കൗണ്ടന്റുമാർ, ആർക്കിടെക്റ്റുകൾ തുടങ്ങിയ പ്രൊഫഷണലുകൾക്ക് അപേക്ഷിക്കാൻ സാധിക്കില്ല.

പിഎം-കിസാൻ രജിസ്ട്രേഷൻ പ്രക്രിയ (ഓൺലൈൻ)

• ആദ്യം pmkisan.gov.in എന്ന ഔദ്യോഗിക പോർട്ടൽ വഴി PM-KISAN പദ്ധതിയിൽ രജിസ്റ്റർ ചെയ്യാം.
• പോർട്ടലിൽ "പുതിയ കർഷക രജിസ്ട്രേഷൻ" എന്ന ലിങ്കിൽ ക്ലിക്ക് ചെയ്യുക.
• അതിനു ശേഷം നിങ്ങളുടെ ആധാർ നമ്പറും മറ്റ് ആവശ്യമായ വിശദാംശങ്ങളും നൽകുക.
• ഇനി ആനുകൂല്യങ്ങൾ നേരിട്ട് കൈമാറുന്നതിന് നിങ്ങളുടെ ബാങ്ക് അക്കൗണ്ട് നമ്പറും IFSC കോഡും നൽകുക.
• വിവരങ്ങൾ പരിശോധിച്ച ശേഷം അപേക്ഷ സമർപ്പിക്കുക.

ഐസിഐസിഐ ബാങ്ക് ക്രെഡിറ്റ് കാർഡ് ഉടമകൾ ശ്രദ്ധിക്കുക; ജനുവരി 15 മുതൽ പുതിയ നിയമങ്ങൾ വരുന്നു

ഓഫ്‌ലൈനായി അപേക്ഷിക്കുന്നത് എങ്ങനെ?

• അടുത്തുള്ള പൊതു സേവന കേന്ദ്രം (CSC), അല്ലെങ്കിൽ പ്രാദേശിക കൃഷി ഓഫീസ് സന്ദർശിക്കുക.
• ആധാർ, ഭൂമി രേഖ, ബാങ്ക് വിശദാംശങ്ങൾ, മൊബൈൽ നമ്പർ തുടങ്ങിയ ആവശ്യമായ രേഖകൾ നൽകുക.
• സി‌എസ്‌സി ഓഫീസർ രേഖകൾ പരിശോധിച്ച ശേഷം രജിസ്ട്രേഷൻ പൂർത്തിയാക്കും.

പിഎം കിസാൻ 22ാം ​ഗഡു എപ്പോൾ?

21ാം ​ഗഡു നവംബറിലായിരുന്നു. അതിനാൽ ഫെബ്രുവരി അല്ലെങ്കിൽ മാർച്ചിൽ തന്നെ 22ാം ​ഗഡു വിതരണം ചെയ്യേണ്ടതാണ്. എന്നാൽ ഇനിയും 22ാം ​ഗഡു എപ്പോൾ എത്തുമെന്ന പ്രഖ്യാപനങ്ങളൊന്നും സർക്കാർ നടത്തിയിട്ടില്ല.