കാലാവധി വരെ മാസം 9,250 രൂപ പെൻഷൻ; ശേഷം കയ്യിൽ 15 ലക്ഷം; കേന്ദ്രസർക്കാർ പദ്ധതിക്ക് ആരൊക്കെ യോ​ഗ്യർ

വിരമിക്കൽ കാലത്തേക്ക് നല്ല ആദായം ലഭിക്കാൻ വിവിധ പെൻഷൻ പദ്ധതികൾ കേന്ദ്രസർക്കാർ അവതരിപ്പിച്ചിട്ടുണ്ട്. നാഷണൽ പെൻഷൻ സിസ്റ്റവും പബ്ലിക്ക് പ്രൊവിഡന്റ് ഫണ്ടും ഇത്തരത്തിലുള്ള പെൻഷൻ പദ്ധതിയാണ്. ഈ പദ്ധതികളിൽ ജോലിക്കാലത്ത് തന്നെ ചേരേണ്ടതുണ്ട്. എന്നാൽ അറുപത് വയസിന് ശേഷം ചേർന്ന് നിക്ഷേപവും മാസത്തിൽ പെൻഷനും നടത്താൻ പറ്റുന്ന പദ്ധതി കേന്ദ്രസർക്കാർ അവതരിപ്പിച്ചിട്ടുണ്ട്. പ്രധാനമന്ത്രി വയ വന്ദന്‍ ജോയന വഴി മാസത്തിൽ 9,250 രൂപയും കാലവധിയെത്തുമ്പോൾ 15 ലക്ഷം രൂപയും നേടാനാകും. ലൈഫ് ഇന്‍ഷൂറന്‍സ് കോര്‍പ്പറേഷനാണ് വഴിയാണ് പദ്ധതി നടപ്പിലാക്കുന്നത്. ഇതില്‍ ചേരാനുള്ള കാലാവധി 2023 മാര്‍ച്ച് 31 വരെ നീട്ടിയിട്ടുണ്ട്. വര്‍ഷത്തില്‍ 7.4 ശതമാനം പലിശ നിരക്കില്‍ പെന്‍ഷന്‍ അനുവദിക്കും. ഇത് മാസത്തില്‍ വിതരണം ചെയ്യും.

ആർക്കൊക്കെ ചേരാം

60 വയസ് കഴിഞ്ഞവര്‍ക്കാണ് പ്രധാനമന്ത്രി വയ വന്ദന്‍ ജോയനയില്‍ ചേരാന്‍ സാധിക്കുക. ഉയര്‍ന്ന പ്രായ പരിധിയില്ല. പത്ത് വര്‍ഷമാണ് പോളിസിയുടെ കാലാവധി. മാസത്തിലോ ത്രൈമാസത്തിലോ അർധ വർഷത്തിലോ വാർഷികമായോ പെൻഷൻ വാങ്ങാം. ഇത് നിക്ഷേപകന്റെ തീരുമാനമാണ്. മാസത്തില്‍ ചുരുങ്ങിയ പെന്‍ഷന്‍ 1,000 രൂപയാണ് ലഭിക്കുക. ത്രൈമാസത്തിൽ 3,000 രൂപ, അർധ വർഷത്തിൽ 6,000 രൂപ, വർഷത്തിൽ 12,000 എന്നിങ്ങനെയാണ് ചുരുങ്ങിയ പെൻഷൻ. മാസത്തിൽ ലഭിക്കുന്ന ഉയര്‍ന്ന പെന്‍ഷന്‍ 9,250 രൂപയാണ്. ത്രൈമാസത്തിൽ 27,750 രൂപയായോ അർധ വർഷത്തിൽ 55,500 രൂപയോ വർഷത്തിൽ 1,11,000 രൂപയായോ പെൻഷൻ വാങ്ങാം.

എത്ര രൂപ നിക്ഷേപിക്കണം

ഒറ്റത്തവണ പണമടച്ച് പോളിസി വാങ്ങിയാണ് പദ്ധതിയിൽ ചേരാനാവുക. ഒരാളുടെ പേരിൽ നിക്ഷേപിക്കാനാവുന്ന ഉയർന്ന തുക 15 ലക്ഷമാണ്. മാസത്തില്‍ 1,000 രൂപ പെന്‍ഷന്‍ ലഭിക്കണമെങ്കില്‍ 1,62,162 രൂപ അടച്ച് പോളിസി വാങ്ങണം. 15 ലക്ഷം രൂപയ്ക്ക് പോളിസി വാങ്ങിയാലാണ് മാസത്തിൽ ഉയര്‍ന്ന പെന്‍ഷനായ 9,250 രൂപ മാസം ലഭിക്കുക. വര്‍ഷത്തില്‍ 12,000 രൂപ പെന്‍ഷന്‍ ലഭിക്കാന്‍ അടക്കേണ്ട തുക 1,56,658 രൂപയാണ്. ത്രൈമാസത്തിൽ 3,000 രൂപ ലഭിക്കണമെങ്കിൽ 1,61,074 രൂപ അടക്കണം. 27,750 രൂപ ത്രൈമാസത്തിൽ ലഭിക്കാൻ 14,89,993 രൂപ അടക്കണം. അർധ വർഷത്തിൽ 6,000 രൂപ ലഭിക്കാൻ 1,59,574 രൂപയും 55,500 രൂപ ലഭിക്കാൻ 14,76,064 രൂപയും അടക്കണം. കാലവധിയോളം തുക പെൻഷനായി ലഭിക്കുകയും ശേഷം അടച്ച തുക തിരിച്ചു നൽകുകയും ചെയ്യും.

 

മറ്റ് നേട്ടങ്ങൾ

പ്രധാനമന്ത്രി വയവന്ദന്‍ യോജനയില്‍ നിന്ന് വായ്പ ലഭിക്കും എന്നതാണ് മറ്റൊരു നേട്ടം. പോളിസി പര്‍ച്ചേസ് വിലയുടെ 75 ശതമാനം തുക വായ്പയായി ലഭിക്കും. പെന്‍ഷന്‍ തുകയില്‍ നിന്ന് വായ്പയുടെ പലിശ കുറച്ച ശേഷമാണ് നല്‍കുക. പോളിസി കാലയളവില്‍ നിക്ഷേപകന്‍ മരണപ്പെടുകയാണെങ്കില്‍ അയാളുടെ നോമിനിയ്ക്ക് നിക്ഷേപം നടത്തിയിട്ടുള്ള മുഴുവന്‍ തുകയും ലഭിക്കും. പദ്ധതിയില്‍ ചേരുന്ന വ്യക്തികള്‍ക്ക് നികുതി കിഴിവ്, ജിഎസ്ടി കിഴിവ് എന്നീ നേട്ടങ്ങളും ലഭിക്കും. നിക്ഷേപം നടത്തിയിരിക്കുന്ന വ്യക്തിയ്‌ക്കോ പങ്കാളിയ്‌ക്കോ ഗുരുതരമായ രോഗ ബാധയുണ്ടായാല്‍ നിക്ഷേപ തുക കാലാവധിയെത്തും മുമ്പ് പിന്‍വലിക്കുവാനും അനുവദിക്കും. പോളിസിയില്‍ ചേര്‍ന്ന് 15 ദിവസത്തിനകം പിന്‍വാങ്ങാനുള്ള അവസരമുണ്ട്. ഇത്തരത്തില്‍ പിന്മാറുമ്പോള്‍ പോളിസി തുക പൂര്‍ണമായും തിരികെ നല്‍കും.