ഈട് നൽകാതെ 10 ലക്ഷം വരെ കിട്ടും, സ്ത്രീകൾക്ക് മികച്ച പലിശയിളവും; മുദ്രാ ലോണിലൂടെ ലക്ഷ്യം നേടാം

സാധാരണക്കാരായ ജനങ്ങൾക്ക് വേണ്ടി സർക്കാർ നിരവധി വായ്പാ പദ്ധതികൾ അവതരിപ്പിക്കാറുണ്ട്. ഓരോ പദ്ധതികളും കുറഞ്ഞ രേഖകളോടെ കുറഞ്ഞ ജാമ്യ വ്യവസ്ഥകളോടെയാണ് സാധാരണക്കാർക്ക് നൽകുന്നത്. അത്തരത്തിലുള്ള മികച്ച വായ്പാ പദ്ധതിയാണ് പ്രധാൻ മന്ത്രി മുദ്ര യോജന (PMMY). താരതമ്യേന കുറഞ്ഞ പലിശ നിരക്കിലാണ് മുദ്രാ ലോൺ നൽകുന്നത് എന്നതും ശ്രദ്ധേയം.

പ്രധാനമന്ത്രി മുദ്ര യോജനയെ കുറിച്ച് കൂടുതൽ അറിയാം..

ചെറുകിട, കാർഷികേതര, കോർപ്പറേറ്റ് ഇതര സംരംഭങ്ങൾക്ക് ധനസഹായം എളുപ്പമാക്കുന്ന ഇന്ത്യാ ഗവൺമെന്റിന്റെ ഒരു പ്രധാന പദ്ധതിയാണിത്. ബാങ്കുകൾ, മൈക്രോഫിനാൻസ് സ്ഥാപനങ്ങൾ, ബാങ്ക് ഇതര ധനകാര്യ സ്ഥാപനങ്ങൾ എന്നിവ വഴിയാണ് ഈ വായ്പകൾ നൽകുന്നത്. വായ്പ തുകയെ ആശ്രയിച്ച് മുദ്ര വായ്പകൾ മൂന്ന് വിഭാഗങ്ങളായി തിരിച്ചിരിക്കുന്നു;

• ശിശു: പുതിയ ബിസിനസുകൾക്ക് പ്രത്യേകിച്ച പ്രാരംഭ ഘട്ടത്തിലാണെങ്കിൽ 50,000 രൂപ വരെ വായ്പ നൽകുന്നു.

• കിഷോർ: സംരംഭ വികസനത്തിനായി 50,001 രൂപ മുതൽ 5 ലക്ഷം വരെ വായ്പ.

• തരുൺ: വലിയ നിക്ഷേപം ആവശ്യമുള്ള ബിസിനസുകൾക്ക് 5,00,001 ലക്ഷം മുതൽ 10 ലക്ഷം വരെ വായ്പ ലഭിക്കും.

10 ലക്ഷം വരെയുള്ള വായ്പയ്ക്ക് 9.30% മുതലാണ് പലിശ ഈടാക്കുന്നത്. 10 ലക്ഷം വായ്പയെടുത്താൽ 7 വർഷം വരെയാണ് വായ്പാ തിരിച്ചടവ് വരുന്നത്.

മുദ്ര ലോണിന്റെ പ്രത്യേകതകൾ...

• ഈട് ആവശ്യമില്ല: മുദ്ര ലോണിന് യാതൊരു ഈടും നൽകേണ്ടതില്ല.

• കാലാവധി നീട്ടാം: 12 മാസം മുതൽ 5 വർഷം വരെയാണ് കാലാവധി. ആവശ്യമെങ്കിൽ കാലാവധി നീട്ടാനും കഴിയും.

• ഫോർക്ലോഷർ ചാർജുകളില്ല: ലോൺ തുക നേരത്തെ തിരിച്ചടയ്ക്കാൻ ആഗ്രഹിക്കുന്നവരോട് അധിക ചാർജുകളൊന്നും ഈടാക്കില്ല.

• പ്രത്യേക ഇളവുകൾ: വനിതാ സംരംഭങ്ങൾക്ക് പ്രത്യേക കിഴിവുകൾ ഉണ്ട്.

മികച്ച പലിശ നിരക്ക് എങ്ങനെ നേടാം?

• ഓഫറുകൾ താരതമ്യം ചെയ്യുക: വിവിധ ബാങ്കുകളുടെയും എൻ‌.ബി‌.എഫ്‌.സികളുടെയും പലിശ നിരക്കുകളും വ്യവസ്ഥകളും താരതമ്യം ചെയ്ത് വായ്പയെ കുറിച്ച് മനസിലാക്കുക.

• ഉയർന്ന ക്രെഡിറ്റ് സ്കോർ നിലനിർത്തുക: ഉയർന്ന ക്രെഡിറ്റ് സ്കോർ പലിശ നിരക്കുകൾ കുറയ്ക്കാൻ സഹായിച്ചേക്കും. മാത്രമല്ല പെട്ടെന്ന് തന്നെ വായ്പ അംഗീകരിക്കാനും സാധ്യതയുണ്ട്.

• വാർഷിക വിറ്റുവരവ്: വായ്പ പരി​ഗണിക്കുമ്പോൾ സ്ഥിരവും മികച്ച വരുമാനം നൽകുന്നതുമായ കമ്പനികൾക്കാണ് മുൻ തൂക്കം.

• തിരിച്ചടവ് കാലാവധി: മികച്ച ലോൺ തുകയും തിരിച്ചടവ് കാലാവധിയും ഇ.എം.ഐ-കൾ നേടുന്നതിനും സാമ്പത്തിക സുസ്ഥിരത കൈവരിക്കുന്നതിനും സഹായകമാകും.

അറിഞ്ഞില്ലേ.. എസ്.ബി.ഐ എഫ്.ഡിയുടെ പലിശ നിരക്കുകൾ ഇതാ: 1 ലക്ഷം നിക്ഷേപിച്ചാൽ നിങ്ങൾക്ക് എത്ര രൂപ ലഭിക്കും?

മുദ്ര യോജന പദ്ധതികൾ

• മൈക്രോ എന്റർപ്രൈസ് ക്രെഡിറ്റ്: ചെറുകിട ബിസിനസുകൾ ആരംഭിക്കാനും സാമ്പത്തികമായി സുരക്ഷിതമാവാനും ആളുകളെ പ്രോത്സാഹിപ്പിക്കുന്നതിനാണ് ഈ പദ്ധതി രൂപപ്പെടുത്തിയത്.

• മഹിളാ ഉദ്യമി യോജന: ഈ വനിതാ സംരംഭക പരിപാടിയിലൂടെ സ്ത്രീ വായ്പക്കാർക്ക് മുദ്ര ലോണുകളുടെ പലിശ നിരക്ക് 0.25 ശതമാനം കുറയ്ക്കുന്നു.

• റീഫിനാൻസ് പ്രോഗ്രാം: ഇത് എം.എസ്.എം.ഇകളെ അവരുടെ വായ്പകൾ റീഫിനാൻസ് ചെയ്തുകൊണ്ട് സഹായിക്കുന്നു, ഒപ്പം അവരുടെ മൊത്തം സാമ്പത്തിക ഭാരം കുറയ്ക്കുകയും ചെയ്യുന്നു.

• മുദ്ര കാർഡ്: മുദ്ര ലോണുമായി ബന്ധിപ്പിച്ചിരിക്കുന്ന പണരഹിത ഇടപാടുകൾ ഉറപ്പാക്കുന്നതിന് തയ്യാറാക്കിയ ഒരു ഡെബിറ്റ് കാർഡാണിത്.

• ഉപകരണ ധനസഹായം: മൈക്രോ ബിസിനസുകൾക്ക് പുതിയ ഉപകരണങ്ങൾ വാങ്ങുന്നതിന് സഹായം നൽകുന്ന സ്കീമാണ് ഇത്. ഇതുവഴി അവരുടെ ബിസിനസ് പ്രവർത്തനങ്ങൾ മെച്ചപ്പെടുകയും അതിലൂടെ ലാഭം ഉറപ്പാക്കാനും സാധിക്കുന്നു.