10 കോടിയിൽ നിന്ന് 12 കോടിയിലേക്ക്; മോടി ഒട്ടും ചോരാതെ പൂജ ബംപർ; ബംപറടിച്ചില്ലെങ്കിലും ഇത്തവണ കോടിപതി

ഒന്നിന് പിന്നാലെ ഓരോന്നായി ബംപറുകൾ വിപണിയിലെത്തിക്കുകയാണ് കേരള ലോട്ടറി വകുപ്പ്. കോടീശ്വരനാകാൻ അടുത്ത അവസരം പൂജ ബംപറാണ്. ഓണം ബംപറിന്റെ അത്ര ​ഗമയില്ലെങ്കിലും കോടി വിട്ടൊരു കളി പൂജ ബംപറിനുമില്ല. കഴിഞ്ഞ തവണത്തെ 10 കോടിയിൽ നിന്ന് 12 കോടിയിലേക്ക് ബംപർ സമ്മാനം ഉയർത്തിയിട്ടുണ്ട്. ഇതോടൊപ്പം മറ്റു സമ്മാനങ്ങളിലും കാര്യമായ വ്യത്യാസമുണ്ട്. ഇത് കൂടുതൽ കോടീശ്വരന്മാരെ ഇത്തവണ സൃഷ്ടിക്കുമെന്ന് ഉറപ്പാണ്. പൂജ ബംപറിന്റെ വിശദാംശങ്ങൾ നോക്കാം.

വിൽപ്പന ചൂടോടെ

ജെഎ, ജെബി, ജെസി, ജെഡി, ജെഇ എന്നിങ്ങനെ അഞ്ച് സീരിസുകളിലാണ് പൂജ ബംപർ വിപണിയിലുള്ളത്. ഓണം ബംപർ കേരളത്തിൽ വലിയ തംര​ഗമാണ് സൃഷ്ടിച്ചത്. 25 കോടി രൂപ ഒന്നാം സമ്മാനം നൽകിയ ഓണം ബംപറെടുക്കാനുള്ള ആവേശം പൂജാ ബംപറിലും കാണാം.

20 ലക്ഷത്തോളം പൂജാ ബമ്പര്‍ ടിക്കറ്റുകളാണ് ഒക്ടോബർ മാസ അവസാനത്തോടെ വിറ്റഴിഞ്ഞത്. ഇതുവരെ 25 ലക്ഷം ടിക്കറ്റുകളാണ് പൂജ ബംപറിനായി അച്ചടിച്ചിട്ടുള്ളത്. സമ്മാനഘടന പ്രകാരം പൂജാ ബമ്പറിനായി പരമാവധി 45 ലക്ഷം ടിക്കറ്റുകള്‍ അച്ചടിക്കാൻ സാധിക്കും.

കോടിപതികൾ കൂടും

കഴിഞ്ഞ വർഷം 10 കോടി ആയിരുന്ന പൂജാ ബമ്പറിന്റെ ഒന്നാം സമ്മാനം ഇത്തവണ 12 കോടിയാണ്. രണ്ടാം സമ്മാനം ഒരു കോടി വീതം നാല് പേർ‌ക്ക് ലഭിക്കും. ഒന്നും രണ്ടും സമ്മാനങ്ങളിൽ നിന്നായി പൂജ ബംപറിന് നാല് കോടീശ്വരന്മാരെ ലഭിക്കും. ഒരു ലക്ഷം രൂപയാണ് സമാശ്വാസ സമ്മാനം. മൂന്നാം സമ്മാനം 10 ലക്ഷം രൂപയാണ്. ഒരു സീരീസിന് രണ്ട് സമ്മാനം എന്ന നിലയിൽ 10 പേർക്ക് സമ്മാനം ലഭിക്കും.

മൂന്ന് ലക്ഷം വീതം അഞ്ച് പേർക്കാണ് നാലാം സമ്മാനം. ഓരോ പരമ്പരയിലും ഓരോ വിജയികളുണ്ടാകും. അഞ്ചാം സമ്മാനം 2 ലക്ഷം രൂപ വീതം അഞ്ച് പേർക്ക് ലഭിക്കും. ഓരോ പരമ്പരയിലും ഓരോ വിജയികളുണ്ടാകും.

5,000 രൂപയാണ് ആറാം സമ്മാനം. 10,800 പേർക്ക് ആറാം സമ്മാനം ലഭിക്കും. 7-ാം സമ്മാനമായ 1,000 രൂപ 64,800 പേർക്ക് ലഭിക്കും. എട്ടാം സമ്മാനം 500 രൂപയാണ്. 1,21,500 പേരാണ് എട്ടാം സമ്മാനത്തിന് അർഹരമാവുക. 300 രൂപയാണ് ഒൻപതാം സമ്മാനം. 1,37,700 പേർക്ക് 300 രൂപ വീതം നൽകും. ആകെ 3,34,829 പേർക്ക് സമ്മാനങ്ങൾ ലഭിക്കും. 

ടിക്കറ്റ് വില

സമ്മനാനങ്ങൾക്കൊപ്പം ടിക്കറ്റ് വിലയിലും ഇത്തവണ വർധനവുണ്ട്. 300 രൂപയാണ് ഇത്തവണ പൂജ ബമ്പർ ടിക്കറ്റ് വില. കഴിഞ്ഞ വർഷം ഇത് 250 രൂപ ആയിരുന്നു. 2023 ലെ പൂജ ബംപർ നവംബര്‍ 22 നാണ് നറുക്കെടുക്കുന്നത്. നിലവിൽ ആറ് ബംപർ ലോട്ടറി ടിക്കറ്റുകളാണ് കേരള ലോട്ടറി പുറത്തിറക്കുന്നത്.

ക്രിസ്മസ്- പുതുവത്സര ബംപർ, സമ്മർ ബംപർ, വിഷു ബംപർ, മൺസൂൺ ബംപർ, തിരുവോണം ബംപർ, പൂജാ ബംപർ എന്നിങ്ങനെയാണ് ബംപർ ലോട്ടറികൾ. 25 കോടി രൂപ ഒന്നാം സമ്മാനം നൽകുന്ന ഓണം ബംപറാണ് ഇതിൽ സമ്മാനത്തിൽ ഒന്നാം സ്ഥാനത്ത്.

കഴിഞ്ഞ വർഷം 16 കോടി ആയിരുന്നു ക്രിസ്മസ് ബംപറിന്റെ ഒന്നാം സമ്മാനം. ഇത്തവണ അതിൽ മാറ്റം വരുമോ എന്ന കാര്യത്തിൽ വ്യക്തത വന്നിട്ടില്ല. സമ്മർ, മൺസൂൺ ബംപറുകൾ 10കോടി രൂപയും വിഷു ബംപർ 12 കോടി രൂപയുമാണ് ഒന്നാം സമ്മാനമായി നൽകുന്നത്.