ഉയര്‍ന്ന പലിശ നല്‍കുന്ന പോസ്റ്റ് ഓഫീസ് നിക്ഷേപങ്ങള്‍; 1 ലക്ഷം നിക്ഷേപിച്ചാല്‍ എത്ര രൂപ പലിശ ലഭിക്കും

രാജ്യത്ത് ജനകീയമായ നിരവധി നിക്ഷേപ പദ്ധതികൾ പോസ്റ്റ് ഓഫീസ് വഴി ലഭിക്കുന്നുണ്ട്. എളുപ്പത്തിൽ ആരംഭിക്കാമെന്നതും ചെറിയ തുക മുതൽ നിക്ഷേപം നടത്താമെന്നതും കേന്ദ്ര സർക്കാർ പിന്തുണയുള്ളൊരു നിക്ഷേപം എന്നതുമാണ് പോസ്റ്റ് ഓഫീസ് പദ്ധതികളുടെ നേട്ടം.

മിക്ക പദ്ധതികൾക്കും ബാങ്ക് നിക്ഷേപങ്ങളേക്കാൾ, പ്രത്യേകിച്ച് പൊതുമേഖലാ ബാങ്കുകളേക്കാൾ പലിശ പോസ്റ്റ് ഓഫീസിൽ നിന്ന് ലഭിക്കുന്നുണ്ട്. പോസ്റ്റ് ഓഫീസ് പദ്ധതികളിൽ 1 ലക്ഷം രൂപ നിക്ഷേപിച്ചാൽ എത്ര രൂപ പലിശ ലഭിക്കുമെന്നും കാലാവധിയിൽ എത്ര രൂപ നേടാമെന്നും നോക്കാം.

പോസ്റ്റ് ഓഫീസ് ടൈം ഡോപ്പോസിറ്റുകള്‍

ബാങ്ക് സ്ഥിര നിക്ഷേപത്തിന് സമാനമായ പദ്ധതിയാണ് പോസ്റ്റ് ഓഫീസ് ടൈം ഡോപ്പോസിറ്റുകള്‍. 1 വര്‍ഷം, 2 വര്‍ഷം, 3 വര്‍ഷം, 5 വര്‍ഷത്തേക്ക് നിക്ഷേപങ്ങള്‍ സ്വീകരിക്കും. ത്രൈമാസത്തിലാണ് പലിശ കണക്കാക്കുന്നത്. 1 വര്‍ഷ ടൈം ഡോപ്പോസിറ്റിന് 6.6 ശതമാനം പലിശ ലഭിക്കും. 1 ലക്ഷം രൂപ നിക്ഷേപിച്ചാല്‍ 6,765 രൂപ പലിശയായി ലഭിക്കും. 

2 വര്‍ഷ ടേം ഡെപ്പോസിറ്റിന് 6.8 ശതമാനം പലിശ ലഭിക്കും. 1 ലക്ഷം നിക്ഷേപിച്ചാല്‍ 14,437 രൂപ കാലാവധിയില്‍ പലിശയായി ലഭിക്കും. മൂന്ന വര്‍ഷത്തേക്ക് 6.9 ശതമാനം പലിശ ലഭിക്കും. 1 ലക്ഷത്തിന്റെ നിക്ഷേപത്തിന് 22,871 രൂപ പലിശയായി ലഭിക്കും. 5 വര്‍ഷത്തേക്ക് 7 ശതമാനം പലിശ ലഭിക്കും. 1 ലക്ഷം നിക്ഷേപിക്കുന്ന വ്യക്തിക്ക് 41,478 രൂപ പലിശ വരുമാനം നേടാം.

ആവര്‍ത്തന നിക്ഷേപം

പോസ്റ്റ് ഓഫീസിലെ ആവര്‍ത്തന നിക്ഷേപത്തിന് ബാങ്ക് നിക്ഷേപങ്ങളേക്കാള്‍ കുറഞ്ഞ പലിശയാണ് ലഭിക്കുന്നത്. 5.8 ശതമാനമാണ് ഇപ്പോഴുള്ള പലിശ. ത്രൈമാസത്തില്‍ പലിശ കോമ്പൗണ്ട് ചെയ്യും. 5 വര്‍ഷത്തേക്ക് 100 രൂപ പ്രതിമാസം നിക്ഷേപിച്ചാല്‍ 6696 രൂപ ലഭിക്കും. നിക്ഷേപം 6 വര്‍ഷത്തേക്ക് നീട്ടിയാല്‍ 8,620 രൂപയും 10 വര്‍ഷത്തേക്ക് നീട്ടിയാല്‍ 16,264 രൂപയും ലഭിക്കും.

സീനിയര്‍ സിറ്റിസണ്‍ സേവിംഗ്‌സ് സ്‌കീം

8 ശതമാനം പലിശ ലഭിക്കുന്ന സീനിയര്‍ സിറ്റിസണ്‍ സേവിംഗ്‌സ് സ്‌കീമില്‍ നിക്ഷേപിക്കുന്നത് സ്ഥിര വരുമാനം നേടാന്‍ സഹായിക്കും. ത്രൈമാസത്തില്‍ പലിശ കണക്കാക്കി പലിശ അനുവദിക്കുന്നതാണ് സീനിയര്‍ സിറ്റിസണ്‍ സേവിംഗ്‌സ് സ്‌കീമിലെ രീതി. 1 ലക്ഷം രൂപ നിക്ഷേപിച്ചാല്‍ ത്രൈമാസത്തില്‍ 2,000 രൂപ വീതം വരുമാനം ലഭിക്കും. 5 വര്‍ഷത്തേക്ക് ആകെ 40,000 രൂപ പലിശയായി ലഭിക്കും.

പോസ്റ്റ് ഓഫീസ് മാസ വരുമാന പദ്ധതി

7.1 ശതമാനം പലിശയാണ് പോസ്റ്റ് ഓഫീസ് മാസ വരുമാന പദ്ധതിക്ക് ലഭിക്കുന്നത്. 5 വര്‍ഷ കാലാവധിയുള്ള പദ്ധതിയില്‍ 1 ലക്ഷം രൂപ നിക്ഷേപിച്ചാല്‍ മാസന്തോറും 592 രൂപ ലഭിക്കും.

നാഷണല്‍ സേവിംഗ്‌സ് സര്‍ട്ടിഫിക്കറ്റ്

5 വര്‍ഷത്തേക്ക് ലോക്-ഇന്‍ പിരിയഡുള്ള നിക്ഷേപമാണ് നാഷണല്‍ സേവിംഗ്‌സ് സര്‍ട്ടിഫിക്കറ്റ്. 7 ശതമാനം പലിശ നിക്ഷേപത്തിന് ലഭിക്കുന്നു. വര്‍ഷത്തിലാണ് പലിശ കണക്കാക്കുന്നത്.

നാഷണല്‍ സേവിംഗ്‌സ് സര്‍ട്ടിഫിക്കറ്റില്‍ നിക്ഷേപിക്കുന്ന 1 ലക്ഷം രൂപ കാലാവധിയില്‍ 1,40,255 രൂപയായി പിന്‍വലിക്കാം. 40,255 രൂപയാണ് പലിശയായി ലഭിക്കുക.

കിസാന്‍ വികാസ് പത്ര

7.2 ശതമാനം പലിശ നല്‍കുന്ന കിസാന്‍ വികാസ് പത്രയില്‍ വര്‍ഷത്തിലാണ് പലിശ കണക്കാക്കുന്നത്. നിക്ഷേപം ഇരട്ടിയാകുന്നത്രയും വര്‍ഷമാണ് പദ്ധതിയുടെ കാലാവധി. നിലവിലെ പലിശ നിരക്ക് പ്രകാരം 120 മാസം (10 വര്‍ഷം) കൊണ്ട് നിക്ഷേപം ഇരട്ടിയാകും. 1 ലക്ഷം രൂപ കിസാന്‍ വികാസ് പത്രയില്‍ നിക്ഷേപിക്കുന്നൊരാള്‍ക്ക കാലാവധിയില്‍ 2 ലക്ഷം രൂപ പിന്‍വലിക്കാന്‍ സാധിക്കും.