തുടർച്ചയായി പലിശ നിരക്കുകള്‍ പുതുക്കുന്നു; പോസ്റ്റ് ഓഫീസ് പദ്ധതികൾ ആകർഷകം; മികച്ച പലിശ ഏത് നിക്ഷേപത്തിന്

രാജ്യത്ത് ജനകീയമായ നിക്ഷേപ പദ്ധതികളാണ് പോസ്റ്റ് ഓഫീസ് അവതരിപ്പിക്കുന്ന ലഘു സമ്പാദ്യ പദ്ധതി. കാലത്തിന് അനുസരിച്ച് പലിശ നിരക്ക് പുതുക്കും എന്നതാണ് ​ലഘു സമ്പാദ്യ പദ്ധതികളുടെ ​ഗുണം. സാമ്പത്തിക വർഷത്തിൽ എല്ലാ പാദങ്ങളിലും പോസ്റ്റ് ഓഫീസ് ലഘു സമ്പാദ്യ പദ്ധതികളുടെ നിരക്കുകൾ കേന്ദ്ര ധനമന്ത്രാലയം അവലോകനം ചെയ്യും.

സമാന കാലാവധിയുള്ള സർക്കാർ സെക്യൂരിറ്റികളുമായാണ് ലഘു സമ്പാദ്യ പദ്ധതികളുടെ പലിശ നിരക്ക് ബന്ധിപ്പിച്ചിട്ടുള്ളത്. ഇവയുടെ യീൽഡിനേക്കാൾ 0-100 അടിസ്ഥാന നിരക്ക് വരെ ഉയർന്ന നിരക്ക് പോസ്റ്റ് ഓഫീസ് ലഘു സമ്പാദ്യ പദ്ധതികൾക്ക് ലഭിക്കും. ഈ പാദത്തിൽ പലിശ നിരക്ക് പുതുക്കിയ പോസ്റ്റ് ഓഫീസ് ലഘു സമ്പാദ്യ പദ്ധതികളെ നോക്കാം.

പലിശ നിരക്ക് പുതുക്കി

ഒക്ടോബര്‍- ഡിസംബര്‍ പാദത്തിലുള്ള പോസ്റ്റ് ഓഫീസ് ലഘു സമ്പാദ്യ പദ്ധതികളുടെ പലിശ നിരക്ക് കഴിഞ്ഞ ദിവസം കേന്ദ്ര ധനമന്ത്രാലയം പ്രഖ്യാപിച്ചിരുന്നു. സീനിയര്‍ സിറ്റിസണ്‍ സേവിംഗ്‌സ് സ്‌കീം, പബ്ലിക്ക് പ്രൊവിഡന്റ് ഫണ്ട്, കിസാന്‍ വികാസ് പത്ര, സുകന്യ സമൃദ്ധി യോജന പദ്ധതികളുടെ പലിശ നിരക്ക് ഇത്തവണ വര്‍ധിപ്പിച്ചിട്ടില്ല. 5 വര്‍ഷ കാലാവധിയുള്ള ആവര്‍ത്തന നിക്ഷേപങ്ങളുടെ പലിശ നിരക്കാണ് ഇത്തവണ വര്‍ധിച്ചിട്ടുള്ളത്.

ആവര്‍ത്തന നിക്ഷേപം പലിശ നിരക്ക്

5 വര്‍ഷ കാലാവധിയുള്ള പോസ്റ്റ് ഓഫീസ് ആവര്‍ത്തന നിക്ഷേപത്തിന്റെ പലിശ നിരക്കില്‍ 20 അടിസ്ഥാന നിരക്കാണ് (0.20%) വര്‍ധനവുള്ളത്. നേരത്തെ 6.50 ശതമാനം പലിശ ലഭിച്ചിരുന്ന പദ്ധതിക്ക് ഒക്ടോബര്‍- ഡിസംബര്‍ പാദത്തില്‍ 6.75 ശതമാനം പലിശ ലഭിക്കും. തുടർച്ചയായ രണ്ടാം പാദത്തിലാണ് ആവർത്തന നിക്ഷേപങ്ങളുടെ പലിശ നിരക്ക് പുതുക്കുന്നത്. ജൂലായ്- സെപ്റ്റംബർ പാദത്തിൽ 0.30 ശതമാനം നിരക്ക് വർധിച്ചതോടെ 0.50 ശതമാനത്തിന്റെ വർധനവ് 2 പാദങ്ങളിലായി ലഭിച്ചു.

തുടരെ പലിശ നിരക്ക് വർധനവ്

ജൂലായ്- സെപറ്റംബര്‍ പാദത്തിലും നിക്ഷേപങ്ങളുടെ പലിശ നിരക്കുയര്‍ത്തിയിരുന്നു. 1 വര്‍ഷ കാലാവധിയുള്ളതും മൂന്ന് വര്‍ഷ കാലാവധിയുള്ളതുമായി സ്ഥിര നിക്ഷേപങ്ങള്‍ക്ക് 10 അടിസ്ഥാന നിരക്ക് (0.10%) വീതം പലിശ വര്‍ധിപ്പിച്ചു.

5 വര്‍ഷ കാലാവധിയുള്ള ആവര്‍ത്തന നിക്ഷേപത്തിന് 30 അടിസ്ഥാന നിരക്കു (0.30%) മാണ് ജൂലായില്‍ വര്‍ധിപ്പിച്ചത്. 2020 ഏപ്രില്‍- ജൂണ്‍ പാദത്തില്‍ 7.90 ശതമാനത്തില്‍ നിന്ന് 7.10 ശതമാനമായി പലിശ നിരക്ക് കുറച്ചതിന് ശേഷം പിപിഎഫ് നിക്ഷേപങ്ങളുടെ പലിശ നിരക്കില്‍ മാറ്റം വരുത്തിയിട്ടില്ല.

പോസ്റ്റ് ഓഫീസ് പലിശ നിരക്ക്

പോസ്റ്റ് ഓഫീസ് സേവിംഗ്‌സ് അക്കൗണ്ടില്‍ 4 ശതമാനം പലിശ ലഭിക്കും. 1 വർഷത്തെ ടൈം ഡെപ്പോസിറ്റിന് 6.90 ശതമാനം പലിശയും 2 വര്‍ഷ ടൈം ഡെപ്പോസിറ്റിന് 7 ശതമാനം പലിശയും ലഭിക്കും. 3 വർഷത്തേക്ക് സ്ഥിര നിക്ഷേപമിട്ടാലും പോസ്റ്റ് ഓഫീസിൽ നിന്ന് 7 ശതമാനം പലിശ ലഭിക്കും.

5 വര്‍ഷത്തേക്ക് 7.50 ശതമാനം പലിശയും ലഭിക്കും. സീനിയര്‍ സിറ്റസണ്‍ സേവിംഗ്‌സ് സ്‌കീമിനാണ് ലഘു സമ്പാദ്യ പദ്ധതിയില്‍ ഏറ്റവും ഉയര്‍ന്ന പലിശ നിരക്ക് ലഭിക്കുന്നത്. 8.20 ശതമാനം പലിശ ലഭിക്കും.

പോസ്റ്റ് ഓഫീസ് മാസ വരുമാന പദ്ധതിക്ക് 7.40 ശതമാനം, നാഷണല്‍ സേവിംഗ്‌സ് സ്‌കീം 7.70 ശതമാനം, പബ്ലിക്ക് പ്രൊവിഡന്റ് ഫണ്ട് 7.10 ശതമാനം, കിസാന്‍ വികാസ് പത്ര 7.50 ശതമാനം, സുകന്യ സമൃദ്ധി യോജന 8 ശതമാനം എന്നിങ്ങനെയാണ് പലിശ നിരക്ക്.