40 വയസ് കഴിഞ്ഞവരാണോ; വിരമിക്കുന്നതിന് മുൻപ് ഈ നിക്ഷേപങ്ങളിലൊന്നിൽ ചേരാം

നാഷണൽ പെൻഷൻ സിസ്റ്റം

കേന്ദ്രസര്‍ക്കാറിന്റെ പെന്‍ഷന്‍ പദ്ധതിയാണ് എന്‍പിഎസ്. കേന്ദ്രസര്‍ക്കാറിന്റെ പെന്‍ഷന്‍ പദ്ധതിയായ എന്‍പിഎസ് കേന്ദ്രസര്‍ക്കാര്‍ ജീവനക്കാര്‍ക്കായി 2004 ലാണ് അവതരിപ്പിച്ചത്. പിന്നീട് 2009 ല്‍ രാജ്യത്തെ മുഴുവന്‍ ജനങ്ങള്‍ക്കും ചേരാവുന്ന തരത്തിലേക്ക് പദ്ധതി മാറ്റി. രാജ്യത്തെ പൗരന്മാരുടെ വാര്‍ധക്യ കാല സുരക്ഷയാണ് പദ്ധതി ലക്ഷ്യമിടുന്നത്.രാജ്യത്തെ എല്ലാ തൊഴിലാളികള്‍ക്കും ഈ പെന്‍ഷന്‍ പദ്ധതിയിലേക്ക് ചേരാം. ജോലി കാലത്ത് പെന്‍ഷന്‍ അക്കൗണ്ടിലേക്ക് നിശ്ചിത തുക നിക്ഷേപിക്കണം. ജോലിയില്‍ നിന്ന് വിരമിക്കുന്ന കാലത്ത് ഒരു ശതമാനം തുക പിന്‍വലിക്കാനും മറ്റൊരു ശതമാനം പെന്‍ഷനായി മാറ്റിവെയ്ക്കുകയും ചെയ്യാം. ടെയര്‍-1, ടെയര്‍-2 എന്നിങ്ങനെ രണ്ട് തരം അക്കൗണ്ടുകള്‍ എന്‍പിഎസിലുണ്ട്. ടെയര്‍-1 അക്കൗണ്ടിന് 60 വയസ് പൂര്‍ത്തിയാകുന്നത് വരെ നിക്ഷേപം പിന്‍വലിക്കാന്‍ സാധിക്കില്ല. ടെയര്‍-2 അക്കൗണ്ട് ഉടമയ്ക്ക് എപ്പോള്‍ വേണമെങ്കിലും നിക്ഷേപം പിന്‍വലിക്കാം.

പബ്ലിക്ക് പ്രൊവിഡന്റ് ഫണ്ട്

സര്‍ക്കാറിന്റെ പിന്തുണയുള്ള മറ്റൊരു വിരമിക്കല്‍ സമ്പാദ്യ പദ്ധതിയാണ് പബ്ലിക്ക് പ്രൊവിഡന്റ് ഫണ്ട്. എംപ്ലോയീസ് പ്രൊവിഡന്റ് ഫണ്ടില്‍ ഉള്‍പ്പെടാത്ത അസംഘടിത മേഖലയിലെ തൊഴിലാളികള്‍ക്കാണ് പിപിഎഫ് കൂടുതലായും ആശ്വാസമാകുന്നത്. രാജ്യത്തെ പ്രധാന ബാങ്കുകളില്‍ നിന്നും പോസ്റ്റ് ഓഫീസില്‍ നിന്നും പിപിഎഫില്‍ ചേരാനാകും. പതിനഞ്ച് വര്‍ഷമാണ് പിപിഎഫിന്റെ കാലാവധി. ഉയര്‍ന്ന പലിശ പിപിഎഫ് വാഗാദ്‌നം ചെയ്യുന്നുണ്ട്. 

എന്‍പിഎസും പിപിഎഫും

18 നും 65 നും ഇടയില്‍ പ്രായമുള്ളവര്‍ക്കാണ് എന്‍പിഎസില്‍ ചേരാനാവുക. എന്നാല്‍ പിപിഎഫില്‍ പ്രായപരിധിയില്ല. പ്രായപൂര്‍ത്തിയാവാത്തവരുടെ പേരില്‍ രക്ഷിതാക്കള്‍ക്ക് പണം നിക്ഷേപിക്കാം. നിക്ഷേപകര്‍ക്ക് 60 വയസ് വരെ എന്‍പിഎസില്‍ നിക്ഷേപിക്കാം. 70 വയസ് വരെ അക്കൗണ്ട് തുടരാന്‍ പറ്റും. 15 വര്‍ഷമാണ് പിപിഎഫ് നിക്ഷേപത്തിന്റെ കാലാവധി. അഞ്ച് വര്‍ഷം വീതം പിപിഎഫ് നിക്ഷേപം തുടര്‍ന്നു കൊണ്ടു പോകാം. നിക്ഷേപം ആരംഭിച്ച് ആറ് വര്‍ഷം പൂര്‍ത്തിയായാല്‍ ഭാഗികമായ പിന്‍വലിക്കല്‍ പിപിഎഫ് അനുവദിക്കുന്നത്. 

സാമ്പത്തിക വര്‍ഷത്തിന്റെ എല്ലാ പാദത്തിലും പിപിഎഫ് അക്കൗണ്ടുകളുടെ പലിശ പുനര്‍ നിശ്ചയിക്കും. നിലവില്‍ 7.1 ശതമാനമാണ് പലിശ. 2022-23 സാമ്പത്തിക വര്‍ഷത്തിലെ ആദ്യ പാദം അവസാനിക്കുന്ന ജൂണില്‍ പലിശ പുനര്‍ നിശ്ചയിക്കും. ഇക്വിറ്റി, കോര്‍പ്പറേറ്റ് ബോണ്ട്, സര്‍ക്കാര്‍ സെക്യൂരിറ്റി എന്നിവയില്‍ നിന്നുള്ള ആദായം അനുസരിച്ചാണ് എന്‍പിഎസ് നിക്ഷേപകര്‍ക്ക് ആദായം നല്‍കുന്നത്. വിപണിയുടെ സ്ഥിരതയും ഫണ്ട് മാനേജരുടെ പ്രകടനവും തിരഞ്ഞെടുത്ത ഫണ്ടിന്റ പ്രകടവും അടിസ്ഥാനമാക്കിയാണ് ആദായം ലഭിക്കുക.

വര്‍ഷത്തില്‍ പിപിഎഫിലും എന്‍പിഎസിലും നിക്ഷേപിക്കാനുള്ള ചുരുങ്ങിയ പരിധി 500 രൂപയാണ്. പിപിഎഫില്‍ 1.5 ലക്ഷത്തില്‍ കൂടുതല്‍ വര്‍ഷത്തില്‍ നിക്ഷേപിക്കാന്‍ സാധിക്കില്ല. എന്‍പിഎസില്‍ നിക്ഷേപത്തിന് നിശ്ചിത പരിധി പറയുന്നില്ല. അതേസമയം നിക്ഷേപം ശമ്പളത്തിന്റെ 10 ശതമാനം കടക്കാന്‍ പാടില്ല. പിപിഎഫില്‍ സാമ്പത്തിക വര്‍ഷത്തില്‍ നടത്തുന്ന നിക്ഷേപത്തിന് 1.5 ലക്ഷം വരെ ആദായ നികുതി ഇളവുണ്ട്. കാലാവധിക്ക് ശേഷം പിന്‍വലിക്കുമ്പോഴുള്ള പലിശയ്ക്ക് പൂര്‍ണമായും നികുതി ഇളവുണ്ട്. എന്‍പിഎസിലെ നിക്ഷേപത്തിനും 1.5 ലക്ഷം രൂപ വരെ നികുതിയിളവുണ്ട്. 50,000 രൂപയുടെ അധിക നികുതിയിളവും എന്‍പിഎസ് നിക്ഷേപത്തിനുണ്ട്.