സ്ഥിര നിക്ഷേപകർക്ക് നേട്ടം; ഒറ്റയടിക്ക് 1.25% പലിശ നിരക്കുയർത്തി പൊതുമേഖലാ ബാങ്ക്; വിട്ടുകളയേണ്ട

ഒക്ടോബർ മാസത്തിൽ സ്ഥിര നിക്ഷേപങ്ങളുടെ പലിശ നിരക്ക് കൂടിയും കുറഞ്ഞുമിരിക്കുകയാണ്. ചില ബാങ്കുകൾ നിരക്കുയർത്തുമ്പോൾ മറ്റു ചില ബാങ്കുകൾ നിരക്ക് കുറയ്ക്കുകയാണ്. റിപ്പോ നിരക്ക് മാറ്റമില്ലാതെ തുടരുന്നതും ബാങ്കുകളിൽ ഉയർന്ന പണലഭ്യതയുമാണ് നിരക്ക് കുറയ്ക്കാനുള്ള കാരണം. 2,000 രൂപ നോട്ട് പിൻവലിച്ചതോടെ ബാങ്കുകളിൽ ലിക്വിഡിറ്റി ഉയർന്നിട്ടുണ്ട്. അതേസമയം സ്ഥിര നിക്ഷേപത്തിൽ 1.25 ശതമാനത്തിന്റെ വർധവ് വരുത്തിയിരിക്കുകയാണ് ഈ പൊതുമേഖലാ ബാങ്ക്.

പലിശ നിരക്കുയർത്തി ബാങ്ക് ഓഫ് മഹാരാഷ്ട്ര

ബാങ്ക് ഓഫ് മഹാരാഷ്ട്രയാണ് സ്ഥിര നിക്ഷേപങ്ങളുടെ പലിശ നിരക്ക് 125 അടിസ്ഥാന നിരക്ക് (1.25 ശതമാനം) വരെ വർധിപ്പിച്ചത്. 46 ദിവസം മുതൽ 90 ദിവസത്തേക്കുള്ള സ്ഥിര നിക്ഷേപത്തിനാണ് 1.25 ശതമാനം പലിശ നിരക്കുയർത്തിയത്. 4.75 ശതമാനം പലിശ ലഭിക്കും. ഒരു വർഷ കാലാവധിയുള്ള നിക്ഷേപങ്ങൾക്ക് 0.25 ശതമാനം പലിശ നിരക്കുയർത്തി. 6.25 ശതമാനമാണ് പുതുക്കിയ നിരക്ക്. പുതിയ നിരക്കുകൾ 2023 ഒക്ടോബർ 12 മുതൽ പ്രാബല്യത്തിൽ വന്നു.

ബാങ്ക് ഓഫ് മഹാരാഷ്ട്രയിൽ 200 ദിവസത്തേക്കും 400 ദിവസത്തേക്കും 2 പ്രത്യേക സ്ഥിര നിക്ഷേപങ്ങളാണുള്ളത്. യഥാക്രമം 7 ശതമാനം, 6.75 ശതമാനം എന്നിങ്ങനെ പലിശ ലഭിക്കും. മുതിർന്ന താമസക്കാർക്ക് 0.50 ശതമാനത്തിന്റെ അധിക നിരക്ക് ലഭിക്കും. 200 ദിവസത്തേക്ക് 7.50 ശതമാനവും 400 ദിവസത്തേക്ക് 7.25 ശതമാനവുമാണ് പലിശ നിരക്ക്.

ബാങ്ക് ഓഫ് മഹാരാഷ്ട്ര പലിശ നിരക്ക്

7 മുതൽ 30 ദിവസ കാലാവധിയുള്ള സ്ഥിര നിക്ഷേപങ്ങൾക്ക് ബാങ്ക് ഓഫ് മഹാരാഷ്ട്ര 2.75 ശതമാനം പലിശ നൽകുന്നുണ്ട്. 31 മുതൽ 45 ദിവസത്തിനുള്ളിൽ കാലാവധി പൂർത്തിയാകുന്ന നിക്ഷേപങ്ങൾക്ക് 3 ശതമാനമാണ് പലിശ നിരക്ക്. 46 മുതൽ 90 ദിവസം വരെ കാലാവധിയുള്ള നിക്ഷേപങ്ങൾക്ക് 4.75 ശതമാനമായി പലിശ നിരക്കുയർന്നു. 91 മുതൽ 119 ദിവസം വരെ കാലാവധിയുള്ളവയ്ക്ക് 4.90 ശതമാനം പലിശ ലഭിക്കും.

120 ദിവസത്തിനും 180 ദിവസത്തിനും ഇടയിൽ കാലാവധിയുള്ള സ്ഥിര നിക്ഷേപങ്ങൾക്ക് 5.10 ശതമാനം പലിശയാണ് ബാങ്ക് നൽകുന്നത്. ബാങ്ക് ഓഫ് മഹാരാഷ്ട്രയിൽ 181 മുതൽ 270 ദിവസ കാലാവധിയിൽ നിക്ഷേപങ്ങൾക്ക് 5.50 ശതമാനം പലിശ നൽകും.

ഒരു വർഷത്തേക്ക് 6.50 ശതമാനവും ഒരു വർഷം മുതൽ 3 വർഷം വരെയുള്ള നിക്ഷേപങ്ങൾക്ക് 6.25 ശതമാനം പലിശയും ലഭിക്കും. 3 വർഷം മുതൽ 5 വർഷത്തേക്ക് 6 ശതമാനം പലിശ ലഭിക്കും. 91 ദിവസത്തിന് മുകളിലേക്കുള്ള കാലാവധിയിൽ മുതിർന്ന പൗരന്മാരായ നിക്ഷേപകർക്ക് 0.50 ശതമാനം പലിശ ലഭിക്കും.

നിരക്കുയർത്തിയ മറ്റൊരു ബാങ്ക്

പൊതുമേഖലാ ബാങ്കായ ബാങ്ക് ഓഫ് ബറോഡ കഴിഞ്ഞ ദിവസം നിക്ഷേപ പലിശ നിരക്ക് പുതുക്കിയിരുന്നു. 2 കോടിയിൽ താഴെയുള്ള സ്ഥിര നിക്ഷേപങ്ങളുടെ പലിശ നിരക്കാണ് ബാങ്ക് ഓഫ് ബറോഡ പുതുക്കിയത്. 3 വർഷം വരെയുള്ള നിക്ഷേപങ്ങൾക്ക് 0.50 ശതമാനം പലിശ നിരക്കാണ് വർധിപ്പിച്ചത്. പുതുക്കിയ നിരക്കുകൾ 2023 ഒക്‌ടോബർ 9 മുതൽ പ്രാബല്യത്തിൽ വന്നു.

2 മുതൽ 3 വർഷം വരെയുള്ള കാലയളവിൽ ബാങ്ക് ഓഫ് ബറോഡ 7.40 ശതമാനം വരെ പലിശ നൽകും. മുതിർന്ന പൗരന്മാർക്കുള്ള 0.50 ശതമാനം അധിക നിരക്കിനൊപ്പം 7.90 ശതമാനം പലിശ 2-3 വർഷത്തേക്ക് ലഭിക്കും. ഇതോടൊപ്പം 399 ദിവസത്തേക്കുള്ള തിരംഗ പ്ലസ് ഡെപ്പോസിറ്റ് സ്കീമിന്റെ പലിശ നിരക്കുകളും ബാങ്ക് പുനഃക്രമീകരിച്ചു. നോൺ കോളബിൾ സ്ഥിര നിക്ഷേപങ്ങൾക്ക് മുതിർന്ന പൗരന്മാർക്ക് 7.80 ശതമാനം വരെ പലിശ ലഭിക്കും.