സീറോ ബാലൻസ് സേവിം​ഗ്സ് അക്കൗണ്ടിന് 7.50% പലിശ! 8 ഇൻഷൂറൻസ് പരിരക്ഷ; ഇതാ തകർപ്പൻ അക്കൗണ്ട്

മികച്ച സൗകര്യങ്ങളുള്ള സേവിം​ഗ്സ് അക്കൗണ്ടുള്ളവരാണെങ്കിലും കയ്യിലൊരു സീറോ ബാലൻസ് അക്കൗണ്ട് സൂക്ഷിക്കുന്ന ശീലം പലർക്കുമുണ്ട്. ചെറിയ ചെലവുകൾക്കുള്ള പണം കരുതാനും എമർജൻസി ഫണ്ട് സൂക്ഷിക്കാനും മറ്റ് ആവശ്യങ്ങൾക്കും ഇവ ഉപകാരപ്പെടും.

കയ്യിലുള്ള സമ്പാദ്യം മികച്ച രീതിയിൽ ക്രമീകരിക്കനും ബാങ്കിം​ഗ് ഇടപാട് കാര്യക്ഷമമാക്കാനും ഒന്നിലധികം സേവിം​ഗ്സ് അക്കൗണ്ടുകൾ സഹായിക്കാറുണ്ട്. പുതിയൊരു സീറോ ബാലൻസ് അക്കൗണ്ട് തിരയുന്നവരാണെങ്കിൽ ആർബിഎൽ ബാങ്ക് അവതരിപ്പിച്ച ഏറ്റവും പുതിയ ഡിജിറ്റൽ സേവനമായ ​ഗോ സേവിംഗ്‌സ് അക്കൗണ്ട് പരി​ഗണിക്കാവുന്നതാണ്.

സീറോ ബാലൻസ്, മികച്ച പലിശ, അക്കൗണ്ട് ഉടമകൾക്കുള്ള വിവിധ വൗച്ചർ, ഓഫറുകൾ എന്നിവയാണ് ​ഗോ സേവിം​ഗ്സ് അക്കൗണ്ടിനെ ശ്രദ്ധേയമാക്കുന്നത്. ലളിതമായി അക്കൗണ്ട് തുറക്കാനും എളുപ്പത്തിൽ പ്രവർത്തിപ്പിക്കാനും സാധിക്കുന്ന ഡിജിറ്റൽ അക്കൗണ്ടാണിത്. പ്രായഭേദമന്യേ എല്ലാവർക്കും അക്കൗണ്ട് ആരംഭിക്കാം. വിശദാംശങ്ങൾ നോക്കാം.

​ഗുണങ്ങൾ

പ്രതിവർഷം 7.5 ശതമാനം വരെ ഉയർന്ന പലിശനിരക്കാണ് ​ഗോ സേവിം​ഗ്സ് അക്കൗണ്ടിന് ലഭിക്കുക. സേവിം​ഗ്സ് അക്കൗണ്ടിനൊപ്പം ലഭിക്കുന്ന പ്രീമിയം ഡെബിറ്റ് കാർഡിൽ വിവിധ ബ്രാൻഡുകൾക്ക് 1,500 രൂപയുടെ വൗച്ചറുകൾ ലഭിക്കും. ഡെബിറ്റ് കാർഡ് ഉപയോ​ഗിച്ച് എല്ലാ ആർബിഎൽ ബാങ്ക് എടിഎമ്മുകളിലും മറ്റു ബാങ്ക് എടിഎമ്മുകളിൽ നിന്നും സൗജന്യവും പരിധിയില്ലാത്തതുമായ എടിഎം ഉപയോഗം ലഭിക്കും.

​ഗോ സേവിം​ഗ്സ് അക്കൗണ്ട് ഉപയോഗിച്ച് പ്രതിവർഷം ഒരു സൗജന്യ ക്രെഡിറ്റ് റിപ്പോർട്ട് ലഭിക്കും. ക്രെഡിറ്റ് സ്കോർ അടിസ്ഥാനമാക്കി വ്യക്തിഗത വായ്പ ഓഫറുകളും ബാങ്കിൽ നിന്ന് നേടാം. ​ഗോ ഡെബിറ്റ് കാർഡിനൊപ്പം ഒരു കോടി രൂപ വരെ കവറേജുള്ള 8 തരം സൗജന്യ ഇൻഷുറൻസ് പരിരക്ഷ ലഭിക്കും.

അപകട, ട്രാവൽ ഇൻഷൂറൻസുകൾ ഇതിൽ ഉൾപ്പെടും. ​ഗോ അക്കൗണ്ടിൽ ചേരുന്ന ആദ്യ വർഷത്തേക്ക് 1 ലക്ഷം രൂപ വരെയുള്ള സൗജന്യ സൈബർ ഇൻഷുറൻസ് പരിരക്ഷയും ഉപഭോക്താവിന് ലഭിക്കും.

സബ്സ്ക്രിപ്ഷൻ രീതി

ആർബിഎൽ ബാങ്കിന്റെ ​ഗോ അക്കൗണ്ട് ആരംഭിക്കുന്നതിന് സബ്സ്ക്രിപ്ഷൻ രീതിയാണ് ബാങ്ക് പിന്തുടരുന്നത്. അക്കൗണ്ടിന് 1,999 രൂപയും ജിഎസ്ടിയും ചേർന്നുള്ള ജോയനിം​ഗ് ഫീസ് ഉപഭോക്താവ് അടയ്ക്കണം. അക്കൗണ്ട് പുതുക്കുന്നതിന് 599 രൂപയും ജിഎസ്ടിയുമാണ് ചാർജ് വരുന്നത്. കഴിഞ്ഞ വർഷം ​ഗോ ഡെബിറ്റ് കാർഡ് ഉപയോഗിച്ച് 1 ലക്ഷം രൂപയോ അതിന് മുകളിലുള്ള തുകയോ ചെലവാക്കുമ്പോൾ പുതുക്കൽ ഫീസ് ഒഴിവാക്കും.

ഡിജിറ്റലായി അക്കൗണ്ട് ആരംഭിക്കാം

ആർബിഎൽ ബാങ്കിന്റെ ​ഗോ സേവിം​ഗ്സ് അക്കൗണ്ട് ഡിജിറ്റലായി മാത്രമേ ആരംഭിക്കാൻ സാധിക്കുകയുള്ളൂ. ബാങ്ക് വെബ്സൈറ്റിലെ ലിങ്ക് ഉപയോ​ഗിച്ച് മിനിറ്റുകൾക്കുള്ളിൽ ​ഗോ സേവിംഗ്സ് അക്കൗണ്ട് തുറക്കാൻ സാധിക്കും. ഇതിനായി ആധാർ, പാൻ വിവരങ്ങളും മറ്റു വ്യക്തി വിവരങ്ങളും നൽകണം. കെവൈസി നടപടികളും ഓൺലൈനായി പൂർത്തിയാക്കാം. ഈ നടപടിക്ക് ശേഷം ജോയനിം​ഗ് ഫീസ് അടച്ചാൽ അക്കൗണ്ട് സജ്ജമായി.

പലിശ നിരക്ക്

സേവിം​ഗ്സ് അക്കൗണ്ടിലെ പലിശ നിരക്ക് ബാലൻസിനെ അടിസ്ഥാനമാക്കിയാണ്. 1 ലക്ഷം രൂപ വരെയുള്ള സേവിംഗ്‌സ് അക്കൗണ്ട് ബാലന്‍സുകള്‍ക്ക് 4.25 ശതമാനമാണ് പലിശ നിരക്ക്. 1 ലക്ഷത്തിന് മുകളില്‍ 10 ലക്ഷം രൂപ വരെയുള്ള ബാലന്‍സിന് 5.50 ശതമാനവും 10 ലക്ഷത്തിന് മുകളില്‍ 25 ലക്ഷം രൂപ വരെയുള്ള ബാലന്‍സിന് 6 ശതമാനവും പലിശ ലഭിക്കും.

25 ലക്ഷത്തിനും 2 കോടിക്കും ഇടയിലുള്ള സേവിംഗ്‌സ് ബാലന്‍സ് ബാലന്‍സിനാണ് 7.50 ശതമാനം പലിശ നല്‍കുന്നത്. 2 കോടിക്കും 3 കോടി രൂപയ്ക്കും ഇടയില്‍ 7 ശതമാനവനും 3 കോടി മുതല്‍ 7.50 കോടി വരെ 6.50 ശതമാനം പലിശയും ലഭിക്കും.