ബാങ്ക് എഫ്ഡിയേക്കാള്‍ മുന്നിൽ റിസര്‍വ് ബാങ്ക് നിക്ഷേപങ്ങള്‍; മാസ വരുമാനം നേടാൻ ഫ്‌ളോട്ടിംഗ് റേറ്റ് ബോണ്ടുകൾ

സുരക്ഷിതത്വം കണക്കിലെടുത്ത് ബാങ്കിൽ നിക്ഷേപിക്കുന്നവർക്ക് ഇതിനേക്കാൾ സുരക്ഷയിൽ ബാങ്കിനേക്കാൾ പലിശ നൽകുന്നൊരു നിക്ഷേപമാണ് പരിചയപ്പെടുത്തുന്നത്. റിസർവ് ബാങ്ക് റിപ്പോ നിരക്ക് ഉയർത്തിയത്തിന് പിന്നാലെ ബാങ്കുകൾ നിക്ഷേപ പലിശ നിരക്ക് വർധിപ്പിച്ചിട്ടുണ്ട്. എന്നാൽ 7 ശതമാനത്തിന് മുകളിലേക്ക് പലിശ എത്തിയ ബാങ്കുകൾ കുറവാണ്.

7.15 ശതമാനം നിരക്കിലേക്ക് എത്തിയ ബാങ്കുകൾ വിരളവും. പൊതുമേഖലാ ബാങ്കുകൾ 6 ശതമാനത്തിന് താഴെയാണ് സാധാരണക്കാർക്ക് നൽകുന്ന പലിശ നിരക്ക്. ഈ സാഹചര്യത്തിൽ റിസർവ് ബാങ്കിൽ 7.15 ശതമാനം പലിശ നൽകുന്ന ഫ്ലോട്ടിംഗ് റേറ്റ് ബോണ്ടുകൾ നിക്ഷേപകർക്ക് എന്തുകൊണ്ടും ​ഗുണകരമാണ്. കൂടാതെ എല്ലാ ആറു മാസത്തിലും ഫ്ലോട്ടിംഗ് റേറ്റ് ബോണ്ടുകളുടെ പലിശ നിരക്ക് പുനഃപരിശോധിക്കുമെന്നതും ശ്രദ്ധിക്കേണ്ടതാണ്. 

പലിശ നിരക്ക്

നാഷണല്‍ സേവിംഗ്സ് സര്‍ട്ടിഫിക്കറ്റിന്റെ പലിശ നിരക്കുമായി ബന്ധപ്പെടുത്തിയാണ് ഫ്ളോട്ടിം​ഗ് റേറ്റ് സേവിം​ഗ്സ് ബോണ്ടുകളുടെ പലിശ കണക്കാക്കുക. നാഷണല്‍ സേവിംഗ്സ് സര്‍ട്ടിഫിക്കറ്റിന്റെ പലിശയ്ക്കൊപ്പം 0.35 ശതമാനം അധിക പലിശ സേവിംഗ്സ് ബോണ്ടിന് ലഭിക്കും.

നിലവിലെ നാഷണല്‍ സേവിംഗ്സ് സര്‍ട്ടിഫിക്കറ്റ് പലിശ നിരക്കായ 6.80 ശതമാനത്തിനൊപ്പം 0.35 ശതമാനം ചേര്‍ത്താണ് 7.15 ശതമാനം പലിശ ഫ്ളോട്ടിം​ഗ് റേറ്റ് ബോണ്ടുകൾക്ക് നൽകുന്നത്. വര്‍ഷത്തില്‍ രണ്ടു തവണകളിലായി ജനുവരി 1നും ജൂലായ് 1നുമാണ് സേവിം​ഗ്സ് ബോണ്ടുകളുടെ പലിശ പവിതരണം ചെയ്യുക.

പലിശ കണക്കാക്കുന്നത്

ഓരോ മൂന്ന് മാസത്തിലും നാഷണൽ സേവിം​ഗ്സ് സ്കീമിന്റെ പലിശ നിരക്ക് സര്‍ക്കാര്‍ വിലയിരുത്തും. ശ്യാമള ഗോപിനാഥ് കമ്മിറ്റിയുടെ റിപ്പോർട്ട് അനുസരിച്ച്, സമാന കാലാവധിയുള്ള സര്‍ക്കാര്‍ ബോണ്ടുകളുടെ ആദായത്തേക്കാള്‍ 0.25 മുതല്‍ 1% വരെ കൂടുതലായിരിക്കണം നാഷണൽ സേവിം​ഗ്സ് സ്കീമിന്റെ പലിശ നിരക്ക്. ഇത് അനുസരിച്ച് 6 മാസം കൂടുമ്പോൾ ഫ്ളോട്ടിംഗ് റേറ്റ് സേവിംഗ്സ് ബോണ്ടുകളുടെ പലിശ നിരക്ക് വിലയിരുത്തും.

കഴിഞ്ഞ ആറു മാസത്തെ നിരക്കില്‍ വ്യത്യാസമില്ലാത്തതിനാല്‍ ജൂലൈ 2022 മുതല്‍ ഡിസംബര്‍ 31 വരെ 7.15 ശതമാനം കൂപ്പണ്‍ റേറ്റാണ് അനുവദിക്കുക എന്നാണ് റിസർവ് ബാങ്ക് സർക്കുലർ പറയുന്നത്. 

കാലാവധി

7 വർഷമാണ് ഫ്ളോട്ടിം​ഗ് റേറ്റ് സേവിം​ഗ്സ് ബോണ്ടുകളുടെ കാലാവധി. നേരത്തെ പിൻവലിക്കാനോ സെക്കൻഡറി മാർക്കറ്റിൽ വില്പന നടത്താനോ സാധിക്കില്ല. ഫ്‌ളോട്ടിംഗ് റേറ്റ് സേവിംഗ്‌സ് ബോണ്ടില്‍ നിക്ഷേപിക്കുന്ന 60-70 വയസിന് ഇടയില്‍ പ്രായമുള്ളൊരാള്‍ക്ക് 6 വര്‍ഷമാണ് കാലാവധി. 70-80 വയസിനിടയിലുള്ളവര്‍ക്ക് 5 വര്‍ഷത്തേക്കാണ് നിക്ഷേപം തുടരേണ്ടത്. 80 വയസിന് മുകളില്‍ പ്രായമുള്ളവര്‍ക്ക് 4 വര്‍ഷമാണ് കാലാവധി. 

മറ്റു പ്രത്യേകതകൾ

* ഇന്ത്യൻ പൗരന്മാർക്കും ഹിന്ദു അഭിവക്ത കുടുംബത്തിനുമാണ് റിസർവ് ബാങ്കിന്റെ ഫ്ളോട്ടിം​ഗ് റേറ്റ് സേവിം​ഗ്സ് ബോണ്ടുകളിൽ നിക്ഷേപിക്കാനവുക.

* പൊതുമേഖലാ ബാങ്ക്, തിരഞ്ഞെടുത്ത സ്വകാര്യ ബാങ്ക് എന്നിവിടങ്ങളിൽ നിന്ന് ഫ്‌ലോട്ടിംഗ് റേറ്റ് സേവിംഗ്സ് ബോണ്ടുകള്‍ വാങ്ങാം.

* 1,000 രൂപയാണ് നിക്ഷേപത്തിന് ആവശ്യമായ ചുരുങ്ങിയ തുക. എത്ര രൂപ വേണമെങ്കിലും ബോണ്ടിൽ നിക്ഷേപിക്കാം.

* സാധാരണ നിക്ഷേപകർക്ക് 7 വർഷമാണ് കാലാവധി. 60 വയസിന് ശേഷം പ്രായത്തിന് അുസരിച്ചാണ് കാലാവധി നിശ്ചയിച്ചിരിക്കുന്നത്.

* ക്യുമുലേറ്റീവ് രീതിയില്‍, കാലാവധിയില്‍ പലിശ ലഭിക്കില്ല, എല്ലാ വര്‍ഷവും ജനുവരി 1, ജൂലായ് 1 തീയതികളില്‍ പലിശ ലഭിക്കും.

* ട്രാന്‍സ്ഫര്‍ ചെയ്യാന്‍ സാധിക്കാത്ത ബോണ്ടുകളാണ്. സെക്കന്‍ഡറി മാര്‍ക്കറ്റില്‍ വില്പന നടത്താന്‍ സാധിക്കില്ല. നിക്ഷേപകന്റെ മരണ ശേഷം നോമനിക്കോ അവകാശികള്‍ക്കോ മാത്രമെ ട്രാന്‍സ്ഫര്‍ ചെയ്യാന്‍ സാധിക്കുകയുള്ളൂ.