ശമ്പളത്തിന് സുരക്ഷ നൽകും; അറിയാം വരുമാനത്തെ സംരക്ഷിക്കുന്ന ഇൻഷൂറൻസ് പോളിസികൾ

പല കുടുംബങ്ങളിലും വരുമാന സ്രോതസ് ഒരാൾ മാത്രമായിരിക്കും. വരുമാനമെത്തുന്നവരുടെ മരണ ശേഷം എന്ത് എന്നത് ആരും ചിന്തിക്കാൻ പോലും ആ​ഗ്രഹിക്കാത്ത കാര്യമാണ്. എന്നാലിതൊരു യാഥാർഥ്യമാണ്. കോവിഡ് സമയത്ത് ഒറ്റ വരുമാന സ്രോതസിന്റെ ബുദ്ധിമുട്ട് പലരും അറിഞ്ഞതാണ്. പല മരണങ്ങളും പല കുടുംബങ്ങളെയും അനാഥമാക്കി. മുന്നിലെന്ത് സംഭവിക്കുമെന്ന് ആർക്കും പ്രവചിക്കാൻ സാധിക്കാത്തതിനാൽ വരുമാനത്തിന് സംരക്ഷണം നൽകേണ്ടത് പ്രധാനമാണ്. ഇതിന് മികച്ച ഓപ്ഷനാണ് സാലറി പ്രൊട്ടക്ഷന്‍ ഇന്‍ഷൂറന്‍സ് ഇന്‍ഷൂറന്‍സുകള്‍.

മിക്ക ലൈഫ് ഇന്‍ഷൂറന്‍സ് കമ്പനികളും നിലവില്‍ സാലറി പ്രൊട്ടക്ഷന്‍ ഇന്‍ഷൂറന്‍സുകള്‍ നല്‍കുന്നുണ്ട്. ഒറ്റത്തവണ നിക്ഷേപത്തിലൂടെ സ്ഥിര വരുമാനം നേടാന്‍ സാധിക്കുന്ന ഒരു ടേം ഇന്‍ഷൂറന്‍സ് പോളിസിയാണിത്. ഇന്‍കം പ്രൊട്ടക്ഷന്‍ പോളിസി എന്നും ഇത് അറിയപ്പെടുന്നുണ്ട്.

ടേം പോളിസി തിരഞ്ഞെടുക്കുന്ന സമയത്ത് അക്വേഡ് തുക ഒറ്റത്തവണയായി ലഭിക്കണമോ, റെഗുലര്‍ ഇന്‍കം പേഔട്ട് വേണമോയെന്ന് പോളിസി ഉടമയ്ക്ക് തീരുമാനിക്കാം. മെച്യൂരിറ്റി ബെനിഫിറ്റ് ഒന്നുമില്ലാത്ത ടേം പോളിസിയാണിത്. പോളസി ഉടമയുടെ മരണ ശേഷം നോമിക്ക് അഷ്വേഡ് തുക ലഭിക്കും. ഇത് റെഗുലര്‍ പേഔട്ട് രീതിയില്‍ വാങ്ങാം.

മാസത്തില്‍ എത്ര മാസ വരുമാനമായി കുടുംബത്തിന് ലഭിക്കണമെന്ന് സാലറി ഇന്‍ഷൂറന്‍സ് പോളിസി വാങ്ങുന്ന സമയത്ത് തിരഞ്ഞെടുക്കണം. ഇത് നിലവിലുള്ള മാസ ശമ്പളമോ, ഇതില്‍ തുകയോ ആയിരിക്കണം. ഇതിന് ശേഷം പോളിസി തിരഞ്ഞെടുത്ത് പോളിസി അടയ്ക്കുന്ന കാലാവധിയും തിരഞ്ഞെടുക്കണം.

30 വയസുള്ളൊരാള്‍ക്ക് 15 വര്‍ഷത്തേക്ക് പോളിസി തിരഞ്ഞെടുക്കാം. മാസ വരുമാനത്തിലുള്ള വര്‍ധനവ് പോളിസി കമ്പനികളാണ് തീരുമാനിക്കുന്നത്. ഉദാഹരണത്തിന് 6 ശതമാനം വാര്‍ഷിക വര്‍ധനവ് തീരുമാനിച്ചാല്‍ ഓരോ പോളിസി വര്‍ഷവും, പ്രതിമാസ തുക മുന്‍വര്‍ഷത്തെ പ്രതിമാസ വരുമാനത്തിന്റെ 106% ആയിരിക്കും.

മാസ വരുമാനം 50,000 രൂപയായി തീരുമാനിച്ച് പോളിസി വാങ്ങിയാല്‍ രണ്ടാം വര്‍ഷം മുതല്‍ മാസ വരുമാനം 53,000 രൂപയായി ഉയരും. തൊട്ടടുത്ത വര്‍ഷം 56,180 രൂപ ലഭിക്കും. പോളിസി കാലയളവില്‍ അഞ്ചാം വര്‍ഷം പോളിസി ഉടമ മരണപ്പെട്ടാല്‍ പോളിസി ഉടമയ്ക്ക് അഷ്വേഡ് മരണ ആനുകൂല്യമായി 7.6 ലക്ഷം രൂപയും മാസത്തില്‍ 63,124 രൂപയും ലഭിക്കും. ടേം പോളിസി കാലാവധിയുടെ ശേഷിക്കുന്ന കാലയളവില്‍ നോമിനിക്ക് മാസ വരുമാനം ലഭിക്കും.

പോളിസി എടുക്കുന്നത് വഴി പോളിസി ഉടമയുടെ മരണ ശേഷം കുടുംബത്തിന് സാമ്പത്തിക പിന്തുണ ഉറപ്പാക്കുന്നു. കുടുംബാംഗങ്ങള്‍ക്ക് അവരുടെ നിലവിലുള്ള ജീവിതശൈലി തുടരാനും കുട്ടികളുടെ വിദ്യാഭ്യാസത്തിനോ വിവാഹത്തിനോ പണം ചെലവഴിക്കാനും ഉപയോഗിക്കാവുന്ന പ്രതിമാസ വരുമാനം ഉറപ്പാക്കും. സ്ഥിര വരുമാനം ലഭിക്കുന്നത് വഴി കുടുംബത്തിന് സാധാരണ ജീവിത നിലവാരം നിലനിര്‍ത്താം. അഷ്വേഡ് മരണ ആനൂകൂല്യങ്ങള്‍ പെട്ടന്ന് ലഭിക്കുന്നതിനാല്‍ പോളിസി ഉടമയ്ക്ക് ജീവിത കാലത്തുണ്ടായിരുന്ന കടങ്ങള്‍ തീര്‍ക്കാനും സഹായിക്കും.

തൊഴിൽ രഹിത ഇൻഷൂറൻസ്

ഇതുപോലെ ജീവിതകാലയളവിൽ തൊഴിൽ നഷ്ടപ്പെട്ടാൽ സാമ്പത്തിക സഹായം ലഭിക്കുന്ന പോളിസിയാണ് തൊഴിൽ രഹിത ഇൻഷൂറൻസ് പോളിസി. വ്യക്തിയുടെ സ്വന്തം തെറ്റിന്റെ പേരിലല്ലാതെ ജോലി നഷ്ടപ്പെടുന്ന സാഹചര്യത്തില്‍ താല്‍ക്കാലിക സാമ്പത്തിക സഹായം തൊഴിലില്ലായ്മ ഇന്‍ഷൂറന്‍സ് വഴി ലഭിക്കും. കമ്പനി അടച്ചു പൂട്ടല്‍, സ്ഥാപനത്തിന്റെ സാമ്പത്തിക സ്ഥിതി മോശമായാല്‍, ഡിവിഷനല്‍ ഓഫീസ് അടയ്ക്കല്‍, കമ്പനിയുടെ ഏറ്റെടുക്കല്‍, ലയനം എന്നിവ വഴിയുണ്ടാകുന്ന തൊഴില്‍ നഷ്ടങ്ങള്‍ക്ക് ഇന്‍ഷൂറന്‍സ് ലഭിക്കും.