ഭവന വായ്പയുള്ളവർ ദിവസം 100 രൂപ മാറ്റിവെയ്ക്കൂ; 50 ലക്ഷത്തിന്റെ വായ്പയിൽ 12 ലക്ഷം ലാഭിക്കാം

സ്വപ്ന വീടിന് പിന്നാലെ പായുന്നവർക്ക് സാമ്പത്തിക ആശ്വാസമാണ് ഭവന വായ്പകൾ. വീടിന്റെ നിർമാണ ഘട്ടത്തിൽ വായ്പയാണ് സഹായത്തിനെത്തുന്നത്. ഭവനവായ്പകളുടെ കാലാവധി സാധാരണയായി 15 മുതൽ 20 വർഷം വരെയാണ്. പ്രായ പരിധിയും വായ്പ യോഗ്യതയും പരി​ഗണിച്ച് ബാങ്കുകൾ 25 മുതൽ 30 വർഷം വരെ നീണ്ട കാലയളവും അനുവദിക്കാറുണ്ട്.

കാലയളവ് കൂടുന്തോറും ഉയർന്ന പലിശ തുകയാണ് വായ്പയെടുത്തവർ നൽകേണ്ടി വരുന്നത്. വായ്പയുടെ ഇരട്ടി തുക പലിശയായി അടയ്ക്കേണ്ട സാഹചര്യം പോലും പല ഘട്ടങ്ങളിലും വരാറുണ്ട്. വായ്പ അടച്ചു തുടങ്ങുന്ന ഘട്ടത്തിലാണ് ഭവന വായ്പയിലെ പലിശ ഭാരം പലരും തിരിച്ചറിയുന്നത്. ഇവിടെ പലിശ ഭാരം കുറയ്ക്കാൻ വിദ​ഗ്ധർ നിർദ്ദേശിക്കുന്ന ഒരു രീതിയാണ് ഭവന വായ്പ പ്രീപെയ്മെന്റ. പലിശ ഭാരം കുറയ്ക്കുന്നതിനൊപ്പം വായ്പ തിരിച്ചടവ് കാലാവധി കുറയ്ക്കാനും ഇതിലൂടെ സാധിക്കും.

ഭവന വായ്പയുടെ മുതലിലേക്ക് എത്ര രൂപ മുൻകൂർ അടച്ചാലും പലിശ ഭാരം കുറയ്ക്കാം എന്നതിനാൽ കയ്യിലെത്തുന്ന നിസാര തുക പോലും ഭവന വായ്പയിൽ വലിയ മാറ്റം വരുത്തും. പലിശ ഉയർന്ന് നിൽക്കുന്ന വായ്പയുടെ ആദ്യ വർഷങ്ങളിൽ മുൻകൂർ വായ്പ അടച്ചാൽ വലിയ പ്രയോജനം ലഭിക്കും. ഓരോ തുകയ്ക്കും മുൻകൂറായി അടയ്ക്കുമ്പോൾ എത്ര രൂപയുടെ ലാഭം പലിശയിൽ ഉണ്ടാകുന്നു എന്ന് നോക്കാം.

മുൻകൂർ അടവ് രീതികൾ

വിവിധ രീതിയിൽ വായ്പ മുൻകൂർ അടയ്ക്കാൻ സാധിക്കും. ഓരോ വർഷവും വായ്പയുടെ ബാലൻസിന്റെ 5 ശതമാനം വീതം മുൻകൂറായി അടച്ചാൽ വായ്പകാരന് 20 വർഷത്തെ ഭവനവായ്പ 12 വർഷത്തിനുള്ളിൽ അടച്ചു തീർക്കാൻ സാധിക്കും. എല്ലാ വർഷവും ഒരു അധിക ഇഎംഐ മുൻകൂർ അടയ്ക്കുന്നതിലൂടെ 17 വർഷം കൊണ്ട് വായ്പ പൂർത്തിയാക്കാൻ സാധിക്കും.

എല്ലാ വർഷവും ഇഎംഐ തുക 5 ശതമാനം വർധിപ്പിച്ചാൽ 20 വർഷത്തെ ഭവന വായ്പ വെറും 13 വർഷത്തിനുള്ളിൽ അടച്ചു തീർക്കാനാകും.

ദിവസം 100 രൂപ മാറ്റിവെയ്ക്കാം

പ്രതിദിനം 100 രൂപ മാറ്റിവെയ്ക്കുന്നൊരാൾക്ക് വർഷാവസാനത്തിൽ മുൻകൂർ വായ്പ അടക്കാൻ 36,500 രൂപ ലഭിക്കും. 9.5 ശതമാനം പലിശ നിരക്കിൽ നിരക്കിൽ 20 വർഷ കാലാവധിയിലുള്ള 50 ലക്ഷം രൂപയുടെ ഭവന വായ്പ തിരിച്ചടയ്ക്കുന്ന വ്യക്തി ഈ തുക മുൻകൂർ തിരിച്ചടയ്ക്കാൻ ഉപയോ​ഗിച്ചാൽ ഏകദേശം 12 ലക്ഷം രൂപ ലാഭിക്കാം.

9.5 ശതമാനം പലിശ നിരക്കിൽ 50 ലക്ഷം രൂപയുടെ 25 വർഷത്തെ വായ്പ തിരിച്ചടക്കുന്ന വ്യക്തിക്ക് ലാഭം 20 ലക്ഷം രൂപയായിരിക്കും.

ദിവസം 200 രൂപ മാറ്റിവെച്ചാൽ

പ്രതിദിനം 200 രൂപ മാറ്റിവെയ്ക്കുമ്പോൾ വർഷാവസാനം മുൻകൂർ പേയ്‌മെന്റിനായി 73,000 രൂപ ലഭിക്കും. 9.5 ശതമാനം പലിശ നിരക്കിൽ എടുത്ത 20 വർഷത്തെ 50 ലക്ഷം രൂപയുടെ ഭവന വായ്പയിൽ നിക്ഷേപകന് ലാഭിക്കാൻ സാധിക്കുന്നത് 19 ലക്ഷം രൂപയാണ്. 9.5 ശതമാനം പലിശ നിരക്കിൽ 50 ലക്ഷം രൂപയുടെ 25 വർഷത്തെ വായ്പയാണെങ്കിൽ ഏകദേശം 32 ലക്ഷം രൂപയുടെ ലാഭമായിരിക്കുമിത്.

പ്രീ പെയ്മെന്റ് കാലാവധി എങ്ങനെ

മാസത്തിലോ ത്രൈമാസത്തിലോ അർധ വാർഷികമായോ വാർഷത്തിലോ ബാങ്കുകൾ മുൻകൂർ പണമടയ്ക്കൽ അനുവദിക്കും. അതോടൊപ്പം ക്രമരഹിതമായ ഇടവേളകളിൽ പോലും വായ്പയെടുത്ത വ്യക്തിക്ക് ചാർജുകളില്ലാതെ പണം അടയ്ക്കാം. സാധാരണയായി എല്ലാ ബാങ്കുകളും വായ്പ തുക മുൻകൂർ അടയ്ക്കുന്നതിന് അനുമതി നൽകാറുണ്ട്. എന്നാൽ വായ്പ തിരഞ്ഞെടുക്കുന്നതിന് മുൻപ് ബാങ്കിന്റെ നിബന്ധനകളും വ്യവസ്ഥകളും പരിശോധിക്കുന്നത് നല്ലതാണ്.