ദിവസവും 45 രൂപ മാറ്റിവച്ച് 25 ലക്ഷം നേടാം; എൽഐസിയുടെ മികച്ച സ്കീം അറിയാം

വരുമാനത്തിൽ നിന്ന് കുറച്ച് തുക മാറ്റിവച്ച് ഭാവി ജീവിതം സുരക്ഷിതമാക്കാൻ ഉപകരിക്കുന്ന നിക്ഷേപ പദ്ധതികളിൽ പങ്കാളികളാകാൻ പലരും ആഗ്രഹിക്കുന്നു. ചെറിയ സമ്പാദ്യത്തിൽനിന്നുപോലും വലിയ ഫണ്ട് സമ്പാദിക്കാനാകുമെന്ന തിരിച്ചറിവിൽ നിരവധി പേരാണ് നിക്ഷേപ പദ്ധതികളിൽ പണം നിക്ഷേപിക്കുന്നത്. രാജ്യത്തെ ഏറ്റവും വലിയ ഇൻഷുറൻസ് കമ്പനിയായ ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യയുടെ (എൽഐസി) സേവിംഗ് സ്കീമുകൾ സുരക്ഷയുടെയും വരുമാനത്തിന്റെയും കാര്യത്തിൽ വളരെ ജനപ്രിയമാണ്. എല്ലാ പ്രായത്തിലുമുള്ള ആളുകൾക്ക് എൽഐസിയിൽ പോളിസികൾ ലഭ്യമാണ്. അത്തരം ഒരു സ്കീമാണ് എൽഐസിയുടെ ജീവൻ ആനന്ദ് പോളിസി. അതിൽ പ്രതിദിനം 45 രൂപ നിക്ഷേപിച്ച് 25 ലക്ഷം രൂപയുടെ വലിയ ഫണ്ട് സ്വരൂപിക്കാം.

കുറഞ്ഞ പ്രീമിയത്തിൽ ഒരു വലിയ ഫണ്ട് സ്വരൂപിക്കാൻ നിങ്ങൾ ആഗ്രഹിക്കുന്നുവെങ്കിൽ, ജീവൻ ആനന്ദ് പോളിസി ഒരു മികച്ച ഓപ്ഷനാണ്. ഒരു തരത്തിൽ ഇതൊരു ടേം പോളിസി പോലെയാണ്. നിങ്ങളുടെ പോളിസി പ്രാബല്യത്തിൽ ഉള്ളിടത്തോളം കാലം നിങ്ങൾക്ക് പ്രീമിയം അടയ്ക്കാം. ഈ സ്കീമിൽ, പോളിസി ഉടമയ്ക്ക് ഒന്നല്ല, നിരവധി മെച്യൂരിറ്റി ആനുകൂല്യങ്ങൾ ലഭിക്കുന്നു. എൽഐസിയുടെ ഈ സ്കീമിൽ, കുറഞ്ഞത് ഒരു ലക്ഷം രൂപ ഉറപ്പുനൽകുന്നു, എന്നാൽ പരമാവധി പരിധി നിശ്ചയിച്ചിട്ടില്ല.

45 രൂപയിൽ നിന്ന് 25 ലക്ഷം എങ്ങനെ ഉണ്ടാക്കാം?

എൽഐസി ജീവൻ ആനന്ദ് പോളിസിയിൽ എല്ലാ മാസവും ഏകദേശം 1358 രൂപ നിക്ഷേപിച്ചാൽ 25 ലക്ഷം രൂപ ലഭിക്കും. അതായത് ദിവസത്തിൽ 45 രൂപ മാറ്റിവച്ചാൽ മതിയാകും. ഒരു ദിവസം 45 രൂപ വച്ച് 35 വർഷത്തേക്ക് നിക്ഷേപിക്കുകയാണെങ്കിൽ, ഈ സ്കീമിന്റെ കാലാവധി കഴിഞ്ഞാൽ നിങ്ങൾക്ക് 25 ലക്ഷം രൂപ ലഭിക്കും. വാർഷികാടിസ്ഥാനത്തിൽ നോക്കിയാൽ നിങ്ങൾ ലാഭിക്കുന്ന തുക ഏകദേശം 16,300 രൂപ വരും.

ഈ എൽഐസി പോളിസിയിൽ 35 വർഷത്തേക്ക് എല്ലാ വർഷവും 16,300 രൂപ നിക്ഷേപിക്കുകയാണെങ്കിൽ മൊത്തം നിക്ഷേപ തുക 5,70,500 രൂപയായിരിക്കും. പോളിസി ടേം അനുസരിച്ച്, അടിസ്ഥാന സം അഷ്വേർഡ് 5 ലക്ഷം രൂപ ആയിരിക്കും, മെച്യുരിറ്റി കാലയളവിനു ശേഷം, ഈ തുക കൂടി ചേർത്ത് 8.60 ലക്ഷം രൂപ റിവിഷണറി ബോണസും 11.50 ലക്ഷം രൂപ ഫൈനൽ ബോണസും നൽകും. എൽഐസിയുടെ ജീവൻ ആനന്ദ് പോളിസിയിൽ രണ്ട് തവണ ബോണസ് ലഭിക്കും. ഇതിന് നിങ്ങളുടെ പോളിസി 15 വർഷത്തേക്കായിരിക്കണം.

25000 നിക്ഷേപിച്ച് 8 കോടി നേടാൻ എത്ര വർഷമെടുക്കും? ചിട്ടിയേക്കാൾ മികച്ചതോ എസ്ഐപി?

നികുതി ഇളവില്ലെങ്കിലും വലിയ ആനുകൂല്യങ്ങൾ

ഈ എൽഐസി പോളിസിയിൽ പോളിസി ഹോൾഡർക്ക് നികുതി ഇളവിന്റെ ആനുകൂല്യം ലഭിക്കില്ല. പക്ഷേ, മറ്റു നിരവധി ആനുകൂല്യങ്ങൾ ലഭ്യമാണ്. ജീവന് ആനന്ദ് പോളിസിയിൽ 4 തരം റൈഡറുകൾ ലഭ്യമാണ്. ആക്‌സിഡന്റൽ ഡെത്ത് ആൻഡ് ഡിസെബിലിറ്റി റൈഡർ, ആക്‌സിഡൻ്റ് ബെനിഫിറ്റ് റൈഡർ, ന്യൂ ടേം ഇൻഷുറൻസ് റൈഡർ, ന്യൂ ക്രിട്ടിക്കൽ ബെനിഫിറ്റ് റൈഡർ എന്നിവ ഇതിൽ ഉൾപ്പെടുന്നു. ഈ പോളിസിയിൽ മരണാനന്തര ആനുകൂല്യവും ഉൾപ്പെടുത്തിയിട്ടുണ്ട്. അതായത്, പോളിസി ഉടമ മരിക്കുകയാണെങ്കിൽ, നോമിനിക്ക് പോളിസിയുടെ 125 ശതമാനം ലഭിക്കും. അതേ സമയം, പോളിസി കാലാവധി പൂർത്തിയാകുന്നതിന് മുമ്പ് പോളിസി ഉടമ മരിച്ചാൽ, നോമിനിക്ക് ഉറപ്പുനൽകിയ കാലാവധിക്ക് തുല്യമായ പണം ലഭിക്കും.