സേവിംഗ്‌സ് അക്കൗണ്ടില്‍ മാസത്തില്‍ സൂക്ഷിക്കേണ്ട മിനിമം ബാലന്‍സുണ്ടോ? ബാങ്കുകളുടെ മിനിമം ബാലൻസ് പരിധിയിതാ

ബാങ്ക് അക്കൗണ്ട് ഉപയോ​ഗിക്കുന്നവരാണെങ്കിൽ അലട്ടുന്ന പ്രധാന പ്രശ്നം സേവിം​ഗ്സ് അക്കൗണ്ടിൽ സൂക്ഷിക്കേണ്ട പ്രതിമാസ ശരാശരി ബാലൻസ് (AMB) ആണ്. സാലറി അക്കൗണ്ടുകൾക്കും ബേസിക് സേവിം​ഗ്സ് അക്കൗണ്ടുകളിലും സീറോ ബാലൻസ് സൗകര്യം ലഭിക്കുമെങ്കിലും മികച്ച സേവനങ്ങൾ ലഭിക്കണമെങ്കിൽ മിനിമം ബാലൻസ് സൂക്ഷിക്കുന്ന അക്കൗണ്ടുകൾ ആരംഭിക്കേണ്ടതുണ്ട്. ഓരോ ബാങ്ക് അനുസരിച്ചും വ്യത്യസ്ത നിബന്ധനകളാണ് മിനിമം ബാലൻസ് സംബന്ധിച്ച് ഈടാക്കുന്നത്.

മിനിമം ബാലൻസ് സൂക്ഷിക്കാത്ത അക്കൗണ്ടുകൾക്ക് വ്യത്യസ്ത നിരക്കിലുള്ള പിഴയും ബാങ്ക് ഈടാക്കും. പിഴകൾ ഒഴിവാക്കാൻ ഉപഭോക്താക്കൾ അവരുടെ സേവിംഗ്സ് അക്കൗണ്ടിൽ നിശ്ചിത മിനിമം ബാലൻസ് നിലനിർത്തേണ്ടതുണ്ട്. മിക്ക ബാങ്കുകളും അക്കൗണ്ടുള്ള ബ്രാഞ്ച് മെട്രോ, അർബൻ, റൂറൽ എന്നിങ്ങനെ ഏത് പ്രദേശത്താണ് സ്ഥിതി ചെയ്യുന്നത് എന്നതിനെ ആശ്രയിച്ചാണ് പ്രതിമാസ ശരാശരി ബാലൻസ് നിശ്ചയിക്കുന്നത്. രാജ്യത്തെ മുൻനിര ബാങ്കുകളുടെ പ്രതിമാസ ശരാശരി ബാലൻസ് പരിശോധിക്കാം.

എസ്ബിഐ

കോവിഡ് കാലത്ത് 2020 മാർച്ചിലാണ് എസ്ബിഐ സേവിം​ഗ്സ് അക്കൗണ്ടുകളുടെ പ്രതിമാസ ശരാശരി ബാലൻസ് അവസാനിപ്പിച്ചത്. ഈ ഇളവ് നൽകുന്നതിന് മുൻപ് മെട്രോ, ന​ഗര, ​ഗ്രാമീണ ബ്രാഞ്ചുകളിലെ സേവിം​ഗ്സ് അക്കൗണ്ട് ഉടമകൾ 3,000 രൂപ, 2,000 രൂപ, 1,000 രൂപ എന്നിങ്ങനെ മിനിമം ബാലൻസ് സൂക്ഷിക്കേണ്ടതുണ്ടായിരുന്നു.

പ്രതിമാസ ശരാശരി ബാലൻസ് സൂക്ഷിക്കാൻ സാധിക്കാത്തവരിൽ നിന്ന് 5 രൂപ മുതൽ 15 രൂപ വരെ ബാങ്ക് പിഴ ഈടാക്കിയിരുന്നു. പ്രതിമാസ ശരാശരി ബാലൻസ് 1 ലക്ഷം രൂപ നിലനിർത്തുന്ന ഉപഭോക്താക്കൾക്ക് മാസം പരിധിയില്ലാതെ എടിഎം ഉപയോ​ഗിക്കാൻ എസ്ബിഐ അനുവദിക്കുന്നുണ്ട്.

എച്ച്ഡിഎഫ്സി ബാങ്ക്

മുൻനിര സ്വകാര്യ ബാങ്കായ എച്ച്ഡിഎഫ്സി ബാങ്കിൽ സേവിം​ഗ്സ് അക്കൗണ്ട് ഉടമകൾ 10,000 രൂപ വരെ പ്രതിമാസ ശരാശരി ബാലൻസ് സൂക്ഷിക്കേണ്ടതുണ്ട്. മെട്രോ ന​ഗരങ്ങളിലുള്ളവർക്കാണ് 10,000 രൂപ പ്രതിമാസ ശരാശരി ബാലൻസ് വരുന്നത്. സെമി അർബൻ മേഖലയിൽ 5,000 രൂപയും ​ഗ്രാമീണ മേഖലകളിൽ 2,500 രൂപയുമാണ് പ്രതിമാസ ശരാശരി ബാലൻസ് ഈടാക്കുന്നത്. പ്രതിമാസ ശരാശരി ബാലൻസ് സൂക്ഷിക്കാത്തവരിൽ നിന്ന് ബാങ്ക് പിഴ ഈടാക്കുന്നുണ്ട്. 

ഐസിഐസിഐ ബാങ്ക്

ഐസിഐസിഐ ബാങ്ക് സേവിം​ഗ്സ് അക്കൗണ്ട് ഉടമകൾ മെട്രോ, സെമി അർബൻ, ​ഗ്രാമീണ മേഖലകളിലുള്ളവരാണെങ്കിൽ 10,000 രൂപ, 5,000 രൂപ, 2,000 രൂപ എന്നിങ്ങനെയാണ് പ്രതിമാസ ശരാശരി ബാലൻസ് സൂക്ഷിക്കേണ്ടത്. പ്രതിമാസ ശരാശരി ബാലൻസിൽ കുറവ് വരുന്ന പക്ഷം 500 രൂപയോ കുറവുള്ള തുകയുടെ 6 ശതമാനമോ ഏതാണ് കുറവ് എന്ന് പരിശോധിച്ച് ബാങ്ക് പിഴയായി ഈടാക്കും. 

പഞ്ചാബ് നാഷണൽ ബാങ്ക്

പൊതുമേഖലാ ബാങ്കായ പഞ്ചാബ് നാഷണൽ ബാങ്കിൽ ത്രൈമാസ അടിസ്ഥാനത്തിലാണ് മിനിമം ബാലൻസ് പരിശോധിക്കുന്നത്. മെട്രോ, ന​ഗര പ്രദേശങ്ങളിലുള്ള സേവിം​ഗ്സ് അക്കൗണ്ടുടമകൾ സേവിം​ഗ്സ് അക്കൗണ്ടിൽ ത്രൈമാസത്തിൽ 20,000 രൂപ ബാലൻസ് സൂക്ഷിക്കേണ്ടതുണ്ട്. സെമി അർബൻ മേഖലകലിൽ 1,000 രൂപയും ഗ്രാമപ്രദേശങ്ങളിൽ 500 രൂപയുമാണ് ത്രൈമാസ ശരാശരി മിനിമം ബാലൻസ്. 

കൊട്ടക് മഹീന്ദ്ര ബാങ്ക്

മറ്റൊരു സ്വകാര്യ ബാങ്കായ കൊട്ടക് മഹീന്ദ്ര ബാങ്കിൽ പ്രതിമാസ ശരാശരി ബാലൻസ് 10,000 രൂപ വരും. കൊട്ടക് മഹീന്ദ്ര ബാങ്ക് സേവിംഗ്‌സ് അക്കൗണ്ട് ഉടമകൾ മെട്രോ പ്രദേശങ്ങളിൽ ഉള്ളവരാണെങ്കിലാണ് പ്രതിമാസ ശരാശരി ബാലൻസ് 10,000 രൂപ ആവശ്യമായി വരുന്നത്.

മെട്രോ ഇതര മേഖലകളിൽ 5,000 രൂപയും പ്രതിമാസ ബാലൻസ് സൂക്ഷിക്കണം. ബാലൻസ് നിലനിർത്തുന്നതിൽ പരാജയപ്പെട്ടാൽ, പ്രതിമാസ ശരാശരി ബാലൻസ് കുറവുള്ള തുകയുടെ 6 ശതമാനം ബാങ്ക് പിഴ ഈടാക്കും.