എസ്.ബി.ഐ എഫ്.ഡി: ഏത് സ്ഥിര നിക്ഷേപ പദ്ധതിയാണ് നിങ്ങൾക്ക് ഉയർന്ന വരുമാനം നൽകുന്നത്?

എസ്.ബി.ഐ സാധാരണ നിക്ഷേപകർക്കും മുതിർന്ന പൗരൻമാർക്കും വൈവിധ്യമാർന്ന നിക്ഷേപ പദ്ധതികൾ വാഗ്ദാനം ചെയ്യുന്നു. ഇതിൽ റെഗുലർ എഫ്‌ഡികൾ, അമൃത് വൃഷ്ടി പോലുള്ള പ്രത്യേക എഫ്‌ഡികൾ, മുതിർന്ന പൗരന്മാർക്കുള്ള പ്രത്യേക പദ്ധതികൾ എന്നിവ ഉൾപ്പെടുന്നു. കുറഞ്ഞ അപകട സാധ്യതയും ഉയർന്ന പലിശ നിരക്കുമാണ് സ്ഥിര നിക്ഷേപങ്ങളോടുള്ള ജനങ്ങളുടെ താത്പര്യം വർദ്ധിക്കാൻ കാരണം. സാധാരണയായി ഏഴ് ദിവസം മുതൽ 10 വർഷം വരെ എഫ്.ഡികളിൽ പണം നിക്ഷേപിക്കാം.

വ്യത്യസ്ത കാലാവധികളും പലിശ നിരക്കുകളുമുള്ള വ്യത്യസ്ത എഫ്‌ഡികൾ എസ്‌ബി‌ഐ വാഗ്ദാനം ചെയ്യുന്നു. ഇവ ഓരോന്നും വാ​ഗ്ദാനം ചെയ്യുന്ന നേട്ടങ്ങളും വ്യത്യസ്തമാണ്. നിങ്ങൾക്ക് ഉയർന്ന പലിശ ആവശ്യമെങ്കിൽ ഏത് എഫ്.ഡിയിൽ നിക്ഷേപിക്കും?

എസ്.ബി.ഐ എഫ്.ഡികളുടെ പ്രധാന പ്രത്യേകതകൾ...

ഇവിടെ നിങ്ങളുടെ നിക്ഷേപത്തിന്റെ കാലാവധി പുതുക്കണമെന്ന് ആ​ഗ്രഹമുണ്ടെങ്കിൽ അത് ഓട്ടോമാറ്റിക്കായി പുതുക്കപ്പെടും. നിക്ഷേപ കാലത്ത് സാമ്പത്തികമായി ആവശ്യം വന്നാൽ കാലാവധി പൂർത്തിയാവുന്നതിനു മുന്നേ പണം പിൻവലിക്കാൻ അനുമതിയുണ്ട്. മാത്രമല്ല ആവശ്യമെങ്കിൽ നിക്ഷേപത്തിൽ നിന്നും വായ്പയുടെ ആനുകൂല്യവും നിങ്ങൾക്ക് നേടാം. സാധാരണയായി മുതിർന്ന പൗരന്മാർക്ക് എഫ്ഡികൾക്ക് ബാങ്കുകൾ അധിക പലിശ വാഗ്ദാനം ചെയ്യുന്നു.

മൂന്ന് വർഷത്തെ എസ്.ബി.ഐ എഫ്.ഡിയാണോ അഞ്ചു വർഷത്തെ എസ്.ബി.ഐ എഫ്.ഡിയാണോ നിക്ഷേപകർക്ക് മികച്ച നേട്ടം വാ​ഗ്ദാനം ചെയ്യുന്നത്? ഈ രണ്ട് സ്ഥിര നിക്ഷേപങ്ങളിലും 2 ലക്ഷം, 4 ലക്ഷം, 6 ലക്ഷം എന്നിങ്ങനെ നിക്ഷേപിച്ചാൽ ഏത് എഫ്.ഡിയിലാണ് താരതമ്യേന കൂടുതൽ വരുമാനം ഉറപ്പാക്കുക. വിശദമായി നോക്കാം;

പലിശ നിരക്ക്...

3 വർഷത്തെ എസ്.ബി.ഐ എഫ്.ഡി സാധാരണ പൗരന്മാർക്ക് 6.75 ശതമാനം പലിശനിരക്ക് നൽകുന്നു. എന്നാൽ 5 വർഷത്തെ എസ്.ബി.ഐ എഫ്.ഡി സാധാരണ പൗരന്മാർക്ക് 6.50 ശതമാനം പലിശനിരക്ക് നൽകുന്നു. ഇനി സാധാരണ നിക്ഷേപകരുടെ എഫ്.ഡി വരുമാനത്തെ കുറിച്ച് നോക്കാം.

3 വർഷത്തെ എഫ്‌.ഡി - 2 ലക്ഷം, 4 ലക്ഷം, 6 ലക്ഷം എന്നിങ്ങനെ നിക്ഷേപിച്ചാൽ നേട്ടം എത്ര?

മൂന്ന് വർഷത്തിനുള്ളിൽ രണ്ട് ലക്ഷം രൂപയുടെ നിക്ഷേപത്തിന് 2,44,479 രൂപ മെച്യൂരിറ്റിയായി ലഭിക്കും. ഇതേ കാലാവധിയിലേക്ക് സാധാരണ നിക്ഷേപകർ 4 ലക്ഷം രൂപ നിക്ഷേപിച്ചാൽ കാലാവധി പൂർത്തിയാകുമ്പോൾ നിങ്ങൾക്ക് 4,88,957 രൂപ ലഭിക്കും. എന്നാൽ 3 വർഷത്തെ എഫ്‌ഡിയിൽ നിങ്ങൾ 6 ലക്ഷം രൂപ നിക്ഷേപിച്ചാൽ കാലാവധി പൂർത്തിയാകുമ്പോൾ മെച്യൂരിറ്റി തുകയായി ലഭിക്കുന്നത് 7,33,436 രൂപയാണ്.

എസ്‌.ബി‌.ഐ 5 വർഷത്തെ എഫ്‌.ഡി - 2 ലക്ഷം, 4 ലക്ഷം, 6 ലക്ഷം എന്നിങ്ങനെ നിക്ഷേപിച്ചാൽ നേട്ടം എത്ര?

5 വർഷത്തെ എഫ്‌.ഡി സ്കീമിൽ എസ്‌.ബി‌.ഐ 2 ലക്ഷം രൂപ നിക്ഷേപിച്ചാൽ നിങ്ങൾക്ക് ലഭിക്കുന്ന മൊത്തം മെച്യൂരിറ്റി തുക 2,76,084 രൂപയാണ്. എന്നാൽ 5 വർഷത്തെ എഫ്‌.ഡി കാലാവധിയിൽ നിങ്ങൾ 4 ലക്ഷം രൂപ നിക്ഷേപിച്ചാൽ കാലാവധി പൂർത്തിയാകുമ്പോൾ നിങ്ങൾക്ക് 5,52,168 രൂപ ലഭിക്കും. ഇതേ കാലാവധിയിൽ നിങ്ങൾ 6 ലക്ഷം രൂപ നിക്ഷേപിച്ചാൽ കാലാവധി പൂർത്തിയാവുമ്പോൾ നിങ്ങൾക്ക് 8,28,252 രൂപ ലഭിക്കും.

ഇവിടെ പലിശ നിരക്ക് നോക്കിയാൽ 3 വർഷത്തെ എഫ്.ഡിയാണ് കൂടുതൽ റിട്ടേൺ നൽകുന്നത്. എന്നാൽ 5 വർഷത്തെ കാലാവധിയിലേക്ക് എത്തുമ്പോൾ പലിശ നിരക്ക് താരതമ്യേന കുറവാണെങ്കിലും കാലാവധി കൂടുതലായതിനാൽ ലഭിക്കുന്ന മെച്യൂരിറ്റി തുകയും ഉയർന്നതാവുന്നു.