എസ്ബിഐ സ്ഥിര നിക്ഷേപമോ മ്യൂച്വൽ ഫണ്ടോ പിപിഎഫോ? വേഗത്തില്‍ പണം ഇരട്ടിപ്പിക്കുന്ന നിക്ഷേപം ഏത്

വേ​ഗത്തിൽ പണക്കാരനാവുക എന്നാലോചിച്ച് നിക്ഷപിക്കുന്നവര്‍ ധാരളമാണ്. അതിനായി എവിടെ നിക്ഷേപിക്കണം എന്നറിയേണ്ടത് പ്രധാനമാണ്. ഏത് നിക്ഷേപം വേ​ഗത്തിൽ ഇരട്ടിയാകും എന്ന് ആലോചിച്ചാൽ കൃത്യമായ ഉത്തരം ലഭിക്കുന്നില്ലെങ്കിൽ വിഷമിക്കേണ്ട. എത്ര കാലം കൊണ്ട് നിക്ഷേപം ഇരട്ടിയാക്കാം എന്ന് മനസിലാക്കാന്‍ ഉപയോഗിക്കുന്ന സാമ്പത്തിക ടൂളാണ് റൂള്‍ 72.

നിക്ഷേപത്തില്‍ നിന്ന് ലഭിക്കുന്ന പലിശ വരുമാനത്തെ 72 കൊണ്ട് ഹരിച്ചാല്‍ എത്ര കാലം കൊണ്ട് നിക്ഷേപം ഇരട്ടിയാകുമെന്ന് കണ്ടെത്താം. സ്ഥിര നിക്ഷേപം, മ്യൂച്വൽ ഫണ്ട്, പിപിഎഫ് എന്നിവ ഇരട്ടിയാകാൻ ആവശ്യമായ കാലയളവ് കണ്ടെത്താം.

സ്ഥിര നിക്ഷേപം ഇരട്ടിയാകാന്‍

ബാങ്കുകള്‍ സാധാരണയായി 7 ദിവസം മുതല്‍ 10 വര്‍ഷത്തേക്കാണ് സ്ഥിര നിക്ഷേപങ്ങള്‍ സ്വീകരിക്കുന്നത്. ബാങ്കുകള്‍ അനുസരിച്ച് പലിശ നിരക്കും വ്യത്യാസപ്പെടും. എസ്ബിഐ, ഐസിഐസിഐ ബാങ്ക് എന്നിവ 7 ദിവസം മുതല്‍ 10 വര്‍ഷത്തേക്ക് 3 ശതമാനം മുതല്‍ 7.10 ശതമാനം പലിശ നല്‍കും. എചച്ച്ഡിഎഫ്‌സി 3 ശതമാനം മുതല്‍ 7.25 ശതമാനം പലിശ നല്‍കും.

ഉദാഹരണമായി 1 ലക്ഷം രൂപ 7 ശതമാനം പലിശ നിരക്കില്‍ സ്ഥിര നിക്ഷേപിട്ടാല്‍ 10 വര്‍ഷമാണ് പണം ഇരട്ടിക്കാന്‍ വേണ്ടത്. 72/7 പ്രകാരം 10.28 വര്‍ഷത്തിന് ശേഷം നിക്ഷേപം 2 ലക്ഷം രൂപയായി പിന്‍വലിക്കാന്‍ സാധിക്കും.

7.50 ശതമാനം പലിശ നിരക്കില്‍ എസ്ബിഐ വീകെയര്‍ സ്ഥിര നിക്ഷേപത്തില്‍ 10 വര്‍ഷത്തേക്ക് നിക്ഷേപിക്കുന്നൊരാള്‍ക്ക് നിക്ഷേപം ഇരട്ടിയായാണ് തിരികെ ലഭിക്കുന്നത്. 1 ലക്ഷം രൂപ 10 വര്‍ഷത്തേക്ക് സ്ഥിര നിക്ഷേപമിടുന്നൊരാള്‍ക്ക് കാലാവധിയെത്തുമ്പോള്‍ 2.10 ലക്ഷം രൂപയായി മാറും.

പിപിഎഫ് ഇരട്ടിയാകാന്‍

പബ്ലിക്ക് പ്രൊവിഡന്റ് ഫണ്ടിന് 7.10 ശതമാനം പലിശ നിരക്കാണ് ലഭിക്കുന്നത്. 2020 ഏപ്രിലിലാണ് അവസാനമായി പലിശ നിരക്ക് പുതുക്കിയത്. 7.10 ശതമാനം പലിശ നിരക്കില്‍ 10 വര്‍ഷം കൊണ്ട് നിക്ഷേപം ഇരട്ടിയാകാം. റൂള്‍ 72 പ്രകാരം 72/7.1 കണക്കാക്കിയാൽ 10.14 വര്‍ഷമാണ് ഇരട്ടിയാകാന്‍ ആവശ്യമായി വരുന്ന സമയം. പിപിഎഫ് നിക്ഷേപത്തിന്റെ കാലാവധി 15 വര്‍ഷമാണ്. വര്‍ഷത്തില്‍ 1.50 ലക്ഷം വീതം നിക്ഷേപിക്കുമ്പോള്‍ 40,68,209 രൂപ കാലാവധിയില്‍ ലഭിക്കും.

ഇക്വിറ്റിയിൽ ഇരട്ടിയാകാൻ

കൃത്യമായ റിട്ടേൺ കണക്കാക്കാൻ സാധിക്കാത്ത ഇക്വിറ്റി നിക്ഷേപങ്ങളിൽ റൂൾ 72 കണക്കാക്കാൻ പ്രയാസമുണ്ട്. നിഫ്റ്റിയുടെ റിട്ടേൺ പരിഗണിക്കുകയാണെങ്കിൽ കഴിഞ്ഞ വർഷം 13.5 ശതമാനം റിട്ടേണാണ് നൽകിയത്. അഞ്ച് വർഷത്തിനുള്ളിൽ 80 ശതമാനമാണ് റിട്ടേൺ. അതിനാൽ ഇക്വിറ്റികളിൽ നിക്ഷേപിച്ച ഒരു ലക്ഷം രൂപയുടെ നിക്ഷേപം കഴിഞ്ഞ അഞ്ച് വർഷത്തിനുള്ളിൽ ഇരട്ടിയായെന്ന് അനുമാമിക്കാം.

റൂൾ 72 പ്രകാരം 72/13.5 കണക്കാക്കിയാൽ 5.33 വർഷം കൊണ്ട് നിക്ഷേപം ഇരട്ടിയാകും. ഓരോ ഓഹരികളുടെ പ്രകടനം അനുസരിച്ചാണ് വിപണിയിലെ നിക്ഷേപം വളരുന്നത് എന്നതിനാൽ റൂൾ 72 പൂർണമായും പ്രയോ​ഗിക്കാൻ സാധിക്കില്ല.

മ്യൂച്വൽ ഫണ്ടിൽ ഇരട്ടിയാകാം

അച്ചടക്കത്തോടെ നിക്ഷേപിച്ചാൽ ദീർഘകാലാടിസ്ഥാനത്തിൽ സമ്പന്നനാകാനുള്ള മാർ​ഗമാണ് മ്യൂച്വൽ ഫണ്ടുകൾ. മ്യൂച്വൽ ഫണ്ടുകൾക്ക് ഏകദേശം 12-15 ശതമാനം റിട്ടേൺ ദീർഘകാലത്തേക്ക് നൽകാൻ സാധിക്കുമെന്നാണ് സാമ്പത്തിക വിദ​ഗ്ധർ നൽകുന്ന സൂചന. അതിനാൽ, റൂൾ 72 പ്രകാരം മ്യൂച്വൽ ഫണ്ടുകളിലെ ഒരു ലക്ഷം രൂപയുടെ നിക്ഷേപം ആറ് വർഷത്തിനുള്ളിൽ ഇരട്ടിയാകുമെന്ന് കണക്കാക്കാം. റൂൾ 72 പ്രയോ​ഗിച്ചാൽ 12 ശതമാനം വാർഷിക റിട്ടേൺ ലഭിക്കുന്ന ഫണ്ടിൽ 6 വർഷം (72/12) കൊണ്ട് നിക്ഷേപം ഇരട്ടിയാകും.