സൗജന്യ എടിഎം പരിധി കഴിഞ്ഞോ? എസ്ബിഐ അക്കൗണ്ട് ഉടമകൾക്ക് പുതിയ സർവീസ് ചാർജ് ബാധകമാകും

രാജ്യത്തെ ഏറ്റവും വലിയ പൊതുമേഖലാ ബാങ്കായ എസ്ബിഐ, എടിഎം ഇടപാടുകൾക്കുള്ള നിയമങ്ങളിൽ ഭേദഗതി വരുത്തി. നിശ്ചിത സൗജന്യ പരിധിക്ക് ശേഷമുള്ള എടിഎം ഇടപാടുകൾക്ക് ഈടാക്കുന്ന ഫീസ് നിരക്കാണ് ബാങ്ക് പരിഷ്കരിച്ചത്. എസ്ബിഐയുടെ സേവിങ്സ്, സാലറി, കറന്റ് അക്കൗണ്ട് ഉടമകളെ ഈ മാറ്റം നേരിട്ട് ബാധിക്കും. പ്രത്യേകിച്ച് മറ്റ് ബാങ്കുകളുടെ എടിഎം സംവിധാനങ്ങൾ സ്ഥിരമായി ഉപയോഗിക്കുന്നവർക്ക് ഈ പരിഷ്കാരം അധിക സാമ്പത്തിക ബാധ്യതയുണ്ടാക്കും.

നിലവിലെ നിയമമനുസരിച്ച്, മെട്രോ നഗരങ്ങളിൽ ഒരു മാസത്തിൽ 5 തവണയും മറ്റ് നഗരങ്ങളിൽ 3 തവണയും സൗജന്യ ഇടപാടുകൾ നടത്താം. ഈ പരിധി പിന്നിട്ടാൽ ഓരോ പിൻവലിക്കലിനും നിശ്ചിത തുകയും ജിഎസ്ടിയും സർവീസ് ചാർജായി ഈടാക്കും. പണം പിൻവലിക്കുന്നത് കൂടാതെ ബാലൻസ് പരിശോധന, മിനി സ്റ്റേറ്റ്‌മെന്റ് തുടങ്ങിയ സാമ്പത്തിക ഇതര ഇടപാടുകൾക്കും സൗജന്യ പരിധിക്ക് ശേഷം ചെറിയ തുക ഫീസായി നൽകേണ്ടി വരും.

ഡിജിറ്റൽ ബാങ്കിംഗ് പ്രോത്സാഹിപ്പിക്കുന്നതിനും എടിഎം പരിപാലന ചെലവുകൾ ക്രമീകരിക്കുന്നതിനുമാണ് ബാങ്ക് ഇത്തരം നിയന്ത്രണങ്ങൾ കർശനമാക്കുന്നത്. യോനോ ആപ്പ് വഴിയുള്ള ക്യാഷ്‌ലെസ് പിൻവലിക്കലുകളും ഇന്റർനെറ്റ് ബാങ്കിംഗും പരമാവധി ഉപയോഗപ്പെടുത്തുന്നതിലൂടെ ഇത്തരം ചാർജുകൾ ഒഴിവാക്കാൻ ഉപഭോക്താക്കൾക്ക് സാധിക്കും.

സ്റ്റേറ്റ് ബാങ്ക് ഓഫ് ഇന്ത്യ മറ്റ് ബാങ്കുകളുടെ എടിഎം ഇടപാടുകൾക്കുള്ള സർവീസ് ചാർജുകൾ പരിഷ്കരിച്ചു. ഇന്റർചേഞ്ച് ഫീസിലുണ്ടായ വർദ്ധനവ് കണക്കിലെടുത്താണ് ബാങ്കിന്റെ ഈ നടപടി. പുതുക്കിയ നിരക്കുകൾ പ്രകാരം, മറ്റ് ബാങ്ക് എടിഎമ്മുകളിൽ നിശ്ചിത സൗജന്യ പരിധിക്ക് ശേഷമുള്ള ഓരോ പിൻവലിക്കലിനും ഇനി മുതൽ 23 രൂപയും ജിഎസ്ടിയും നൽകേണ്ടി വരും. നേരത്തെ ഈ നിരക്ക് 21 രൂപയായിരുന്നു.

സാമ്പത്തികേതര ഇടപാടുകൾക്കും നിരക്ക് വർദ്ധിപ്പിച്ചിട്ടുണ്ട്. അതിന് സൗജന്യ പരിധി കഴിഞ്ഞാൽ 11 രൂപയും ജിഎസ്ടിയും ഈടാക്കും. സാധാരണ സേവിംഗ്സ് അക്കൗണ്ട് ഉടമകൾക്ക് മറ്റ് ബാങ്ക് എടിഎമ്മുകളിൽ പ്രതിമാസം അനുവദിച്ചിട്ടുള്ള 5 സൗജന്യ ഇടപാടുകളിൽ മാറ്റം വരുത്തിയിട്ടില്ല.

എന്നാൽ, സാലറി അക്കൗണ്ട് ഉടമകൾക്ക് ഇതുവരെ ലഭ്യമായിരുന്ന പരിധിയില്ലാത്ത സൗജന്യ ഇടപാടുകൾ നിർത്തലാക്കി. ഇനി മുതൽ സാലറി അക്കൗണ്ട് ഉള്ളവർക്ക് പ്രതിമാസം 10 സൗജന്യ ഇടപാടുകൾ മാത്രമേ മറ്റ് ബാങ്ക് എടിഎമ്മുകളിലൂടെ നടത്താൻ സാധിക്കുകയുള്ളൂ.

ഫീസ് നിരക്കിൽ വമ്പൻ പരിഷ്കാരങ്ങൾ ഉണ്ടായെങ്കിലും ചില ഉപഭോക്താക്കൾക്ക് ഈ പരിഷ്കാരം ബാധിക്കില്ലെന്ന് ബാങ്ക് വ്യക്തമാക്കിയിട്ടുണ്ട്. ഏതെല്ലാമാണ് ഈ മാറ്റമില്ലാത്ത വിഭാ​ഗങ്ങളെന്ന് വിശദമായി അറിയാം;

എസ്ബിഐ എടിഎമ്മുകൾ: എസ്ബിഐ ഡെബിറ്റ് കാർഡ് ഉപയോഗിച്ച് സ്വന്തം ബാങ്കിന്റെ എടിഎമ്മുകളിൽ നടത്തുന്ന ഇടപാടുകൾ ഇപ്പോഴും സൗജന്യമായിരിക്കും.

കാർഡ്‌ലെസ്സ് പിൻവലിക്കൽ: എസ്ബിഐ എടിഎമ്മുകളിൽ നിന്ന് യോനോ ആപ്പ് വഴി കാർഡ് ഇല്ലാതെ പണം പിൻവലിക്കുമ്പോൾ അതിന് അധിക ചാർജൊന്നും ഈടാക്കുന്നില്ല. മാത്രമല്ല പരിധിയില്ലാതെ പണം പിൻവലിക്കാനും സാധിക്കും.

ബിഎസ്ബിഡി അക്കൗണ്ടുകൾ: ബേസിക് സേവിംഗ്സ് ബാങ്ക് ഡെപ്പോസിറ്റ് (BSBD) അക്കൗണ്ടുകൾക്ക് നിലവിലുള്ള നിരക്കുകളിൽ മാറ്റമില്ല.

കെസിസി അക്കൗണ്ടുകൾ: കിസാൻ ക്രെഡിറ്റ് കാർഡ് ഉടമകളെ ഈ പരിഷ്കരണം ബാധിക്കുന്നില്ല.