ഇതിലും ഉയർന്ന പലിശ സ്വപ്നങ്ങളിൽ മാത്രം, ഹ്രസ്വകാലം കൊണ്ട് കൂടുതൽ നേട്ടം, എസ്ബിഐയുടെ ഈ പദ്ധതിയിൽ ചേരു

നിക്ഷേപകരുടെ ഏറ്റവും പ്രിയപ്പെട്ട നിക്ഷേപ പദ്ധതികളിൽ ഒന്ന് സ്ഥിര നിക്ഷേപമാണ്. കുറഞ്ഞ കാലയളവ് മുതൽ 10 വർഷം വരെ നീണ്ട് നിൽക്കുന്ന നിക്ഷേപ പദ്ധതികൾ ഉണ്ട്. നിക്ഷേപ കാലാവധി മാറുന്നതിനനുസരിച്ച് ലഭിക്കുന്ന പലിശ നിരക്കിലും മാറ്റങ്ങളുണ്ടാകും. അതു കൊണ്ടു തന്നെ സാമ്പത്തിക ലക്ഷ്യം കൃത്യമായി മനസിലാക്കി അതിന് അനുയോജ്യമായ നിക്ഷേപ പദ്ധതി തിരഞ്ഞെടുക്കണം.

കാലാവധിക്ക് മുൻപ് പണം പിൻവലിക്കാൻ കഴിയാത്ത സ്ഥിര നിക്ഷേപങ്ങളുടെ പരിധി റിസർവ് റിസർവ് ബാങ്ക് ഓഫ് ഇന്ത്യ അടുത്തിടെ 15 ലക്ഷം രൂപയിൽ നിന്ന് ഒരു കോടി രൂപയായി ഉയർത്തി. പണം ഒരു  നിശ്ചിത കാലയളവിലേക്ക് ലോക്ക് ഇൻ ചെയ്‌തിരിക്കുന്നതിനാൽ, പിൻവലിക്കാൻ കഴിയാത്ത എഫ്‌ഡികൾക്ക് ബാങ്കുകൾ സാധാരണയായി ഉയർന്ന പലിശ നിരക്ക് വാഗ്ദാനം ചെയ്യുന്നുണ്ട്. 2 വർഷകാലയളവിൽ ഉയർന്ന പലിശ വാഗ്ദാനം ചെയ്യുന്ന, കാലാവധിക്ക് മുൻപ് പണം പിൻവലിക്കാൻ കഴിയാത്ത എസ്ബിഐയുടെ നിക്ഷേപ പദ്ധതിയാണ്
സർവ്വോത്തം നിക്ഷേപ പദ്ധതി.

സർവ്വോത്തം നിക്ഷേപ പദ്ധതി

ഇന്ത്യയിലെ ഏറ്റവും വലിയ വാണിജ്യ ബാങ്കും പൊതുമേഖല സ്ഥാപനവുമായ സ്റ്റേറ്റ് ബാങ്ക് ഓഫ് ഇന്ത്യ സ്ഥിര നിക്ഷേപങ്ങൾക്ക് മികച്ച പലിശയാണ് വാഗ്ദാനം ചെയ്യുന്നത്. ഇവയിൽ വിവിധങ്ങളായ ആനുകൂല്യങ്ങളും നേട്ടങ്ങളും ഉൾപ്പെടുത്തിയിട്ടുണ്ട്.

നിക്ഷേപ കാലാവധിക്ക് മുൻപ് പണം പിൻവലിക്കാൻ കഴിയാത്ത ഒരു നോൺ കോളബിൾ സ്ഥിര നിക്ഷേപ പദ്ധതിയാണ് സർവ്വോത്തം നിക്ഷേപ പദ്ധതി. ഉയർന്ന പലിശനിരക്കാണ് ഈ സ്ഥിരനിക്ഷേപപദ്ധതിയെ ആകർഷകമാക്കുന്നത്. എസ്ബിഐയിൽ ഏറ്റവും കൂടുതൽ പലിശ ലഭിക്കുന്ന സ്ഥിര നിക്ഷേപ പദ്ധതികളിൽ ഒന്നാണ് സർവ്വോത്തം സ്ഥിര നിക്ഷേപമെന്ന് സാരം. പദ്ധതിയിൽ നിക്ഷേപിക്കാനുള്ള ഏറ്റവും കുറഞ്ഞ തുക ഒരു കോടി രൂപയാണ്. നേരത്തെ 15 ലക്ഷം രൂപയായിരുന്നു ഏറ്റവും കുറഞ്ഞ നിക്ഷേപ തുക.

പലിശ നിരക്ക്

എസ്ബിഐ സർവ്വോത്തം നിക്ഷേപത്തിന്റെ പലിശ നിരക്കുകൾ വിശദമായി നോക്കാം.

2 വർഷം കാലവധിയുള്ള നിക്ഷേപത്തിന് വാഗ്ദാനം ചെയ്യുന്ന പലിശ നിരക്ക് 7.40 ശതമാനമാണ്. ഒരു വർഷം കാലാവധിയുള്ള നിക്ഷേപത്തിന് 7.10 ശതമാനം പലിശ ലഭിക്കും. മുതിർന്ന പൗരന്മാർക്ക് 0.50 ശതമാനം ഉയർന്ന പലിശനിരക്ക് ലഭിക്കും. രണ്ട് വർഷത്തിനുള്ളിൽ കാലാവധി പൂർത്തിയാകുന്ന നിക്ഷേപങ്ങൾക്ക് മുതിർന്ന പൗരന്മാർക്ക് 7.9 ശതമാനം പലിശ ലഭിക്കും. ഒരു വർഷത്തേക്ക് അവർക്ക് 7.6 ശതമാനം പലിശ ലഭിക്കും.

കാലാവധി പൂർത്തിയാക്കിയാൽ പദ്ധതി പ്രകാരം ലഭിക്കുന്ന തുക അക്കൗണ്ട് ഉടമയുടെ സേവിംഗ്‌സ് അക്കൗണ്ടിലേക്ക് ക്രെഡിറ്റ് ആകും.

പദ്ധതിയിൽ ചേരാം

ഇന്ത്യൻ പൗരന്മാരായ ഇന്ത്യയിൽ താമസിക്കുന്ന ആർക്കും എസ്ബിഐ സർവോത്തം പദ്ധതിയിൽ പങ്കാളിയാകാം. പ്രായപൂർത്തിയാകാത്തവർക്കും എൻആർആകൾക്കും പദ്ധതിയിൽ നിക്ഷേപിക്കാൻ സാധിക്കില്ല. എസ്ബിഐ ശാഖകൾ വഴി പദ്ധതിയിൽ നിക്ഷേപം നടത്താൻ സാധിക്കും.

എസ്ബിഐ സാധാരണ നിക്ഷേപങ്ങൾക്ക് നൽകുന്ന പലിശ നിരക്കുകൾ കൂടി പരിശോധിക്കാം.

1. 6 മാസം മുതൽ 1 വർഷം വരെ - 5.25 മുതൽ 5.75 ശതമാനം വരെ

2. 1 വർഷം മുതൽ 2 വർഷം വരെ - 6.8 മുതൽ 7.1 ശതമാനം വരെ

3. 2 വർഷം മുതൽ 3വർഷം വരെ - 7 ശതമാനം വരെ

4. 3 വർഷം മുതൽ 5 വർഷം വരെ - 6.5 ശതമാനം വരെ

5. 5 വർഷത്തിൽ കൂടുതൽ - 6.5 ശതമാനം വരെ