60 കഴിഞ്ഞാലും ലാഭം ഉറപ്പാണ്; എസ്.ബി.ഐ എഫ്.ഡിയിൽ 3 ലക്ഷം വരെ നിക്ഷേപിച്ചാൽ മികച്ച ലാഭം കിട്ടും

സാധാരണക്കാരെ പോലെ മുതിർന്ന പൗരൻമാർക്കും വിവിധ നിക്ഷേപ ഓപ്ഷനുകളുണ്ട്. മുതിർന്ന പൗരൻമാർ സാധാരണയായി സുരക്ഷിത നിക്ഷേപങ്ങളിലാണ് ഇൻവെസ്റ്റ് ചെയ്യുവാൻ താത്പര്യം പ്രകടിപ്പിക്കുന്നത്. അതിനാൽ തന്നെ സ്ഥിര നിക്ഷേപങ്ങളോടാണ് മുതിർന്ന പൗരൻമാർക്ക് കൂടുതൽ ഇഷ്ടം. രാജ്യത്തെ എല്ലാ ബാങ്കുകളും സ്ഥിര നിക്ഷേപങ്ങളെ പ്രേത്സാഹിപ്പിക്കുന്നുണ്ട്. ഓരോ ബാങ്കുകളും വേറിട്ട പലിശ നിരക്കാണ് വാ​ഗ്ദാനം ചെയ്യുന്നത്.

മറ്റേതൊരു ബാങ്കിനെയും പോലെ, സ്റ്റേറ്റ് ബാങ്ക് ഓഫ് ഇന്ത്യയും (എസ്ബിഐ) മുതിർന്ന പൗരന്മാർക്ക് വേണ്ടി സ്ഥിര നിക്ഷേപങ്ങൾ ഉറപ്പ് നൽകുന്നു. സാധാരണ പൗരൻമാരെ അപേക്ഷിച്ച് മുതിർന്ന പൗരൻമാർക്ക് നൽകുന്ന പലിശ നിരക്ക് പൊതുവേ കൂടുതലാണ്. ഏതൊരു വ്യക്തിക്കും ഏഴ് ദിവസം മുതൽ 10 വർഷം വരെ എഫ്.ഡികളിൽ നിക്ഷേപിക്കാം. ഓരോ കാലാവധിക്കും അനുസരിച്ചാണ് പലിശ നിരക്ക് വ്യത്യാസപ്പെടുന്നത്. അതിനാൽ കാലാവധി പരിശോധിച്ച ശേഷം എഫ്.ഡികളിൽ നിക്ഷേപിക്കൂ.

നിങ്ങൾക്ക് പരിമിതമായ സമയത്തേക്ക് നിക്ഷേപിക്കാൻ കഴിയുന്ന പ്രത്യേക എഫ്ഡികളും ബാങ്കുകൾ നൽകുന്നു. എസ്.ബി.ഐ വ്യത്യസ്ത കാലയളവിൽ വ്യത്യസ്ത പലിശ ഉറപ്പാക്കുന്ന സ്ഥിര നിക്ഷേപങ്ങൾ വാ​ഗ്ദാനം ചെയ്യുന്നുണ്ട്. എസ്.ബി.ഐ സ്ഥിരനിക്ഷേപത്തിൽ വ്യത്യസ്ത കാലയളവിൽ 1 ലക്ഷം, 2 ലക്ഷം, 3 ലക്ഷം എന്നിങ്ങനെ നിക്ഷേപിച്ചാൽ മുതിർന്ന പൗരൻമാർക്ക് എത്ര രൂപ ലാഭം നേടാമെന്ന് പരിശോധിക്കാം.

1. എസ്.ബി.ഐ അമൃത് വൃഷ്ടി പദ്ധതി

എസ്.ബി.ഐ നൽകുന്ന 444 ദിവസത്തെ കാലാവധിയുള്ള പ്രത്യേക എഫ്.ഡി സ്കീമാണിത്. എസ്.ബി.ഐ അമൃത് വൃഷ്ടി പദ്ധതിയിൽ മുതിർന്ന പൗരന്മാർക്ക് 7.75% നിരക്കിലാണ് പലിശ ലഭിക്കുന്നത്. ഇവിടെ 1 ലക്ഷം, 2 ലക്ഷം, 3 ലക്ഷം രൂപ നിക്ഷേപിച്ചാൽ മെച്യൂരിറ്റി തുക എത്രയായിരിക്കും?

1 ലക്ഷം രൂപയുടെ നിക്ഷേപം- മുതിർന്ന പൗരന്മാർക്ക് കാലാവധി പൂർത്തിയാകുമ്പോൾ 1,09,930 രൂപ ലഭിക്കും.
2 ലക്ഷം നിക്ഷേപിച്ചാൽ- 2,19,859 രൂപയും
3 ലക്ഷം നിക്ഷേപിച്ചാൽ- 3,29,789 രൂപയും ലഭിക്കും.

2. എസ്.ബി.ഐ 1 വർഷത്തെ എഫ്.ഡി

1 വർഷത്തെ എഫ്.ഡിയിൽ മുതിർന്ന പൗരന്മാർക്ക് എസ്.ബി.ഐ 7.30 ശതമാനം പലിശ നൽകുന്നു. 1 ലക്ഷം രൂപയുടെ നിക്ഷേപത്തിൽ മുതിർന്ന പൗരന്മാർക്ക് കാലാവധി പൂർത്തിയാകുമ്പോൾ 1,07,502 രൂപ ലഭിക്കും. 2 ലക്ഷം നിക്ഷേപിച്ചാൽ 2,15,005 രൂപയും, 3 ലക്ഷം നിക്ഷേപിച്ചാൽ 3,22,507 രൂപയും ലഭിക്കും.

3. എസ്.ബി.ഐ 3 വർഷത്തെ എഫ്.ഡി

3 വർഷത്തെ എഫ്.ഡിയിൽ മുതിർന്ന പൗരന്മാർക്ക് വേണ്ടി എസ്.ബി.ഐ 7.25 ശതമാനം പലിശ നൽകുന്നു. മുകളിൽ പറഞ്ഞതു പോലെ ഈ എഫ്.ഡിയിലും 1 ലക്ഷം രൂപയുടെ നിക്ഷേപത്തിൽ മുതിർന്ന പൗരന്മാർക്ക് കാലാവധി പൂർത്തിയാകുമ്പോൾ 1,24,055 രൂപ ലഭിക്കും. 2 ലക്ഷത്തിന്റെ നിക്ഷേപത്തിൽ 2,48,109 രൂപയും, 3 ലക്ഷം നിക്ഷേപിച്ചാൽ 3,72,164 രൂപയും ലഭിക്കും.

4. എസ്.ബി.ഐ 5 വർഷത്തെ എഫ്.ഡി

5 വർഷത്തെ എഫ്.ഡി നിക്ഷേപത്തിന് മുതിർന്ന പൗരന്മാർക്ക് എസ്.ബി.ഐ 7.50% പലിശ വാ​ഗ്ദാനം ചെയ്യുന്നു. ഇവിടെ 5 വർഷത്തേക്ക് ഒരു ലക്ഷം രൂപ നിക്ഷേപിച്ചാൽ മുതിർന്ന പൗരന്മാർക്ക് കാലാവധി പൂർത്തിയാകുമ്പോൾ 1,07,714 രൂപ ലഭിക്കും. 2 ലക്ഷം നിക്ഷേപിച്ചാൽ 2,15,427 രൂപയും, 3 ലക്ഷം നിക്ഷേപിച്ചാൽ 3,23,141 രൂപയും ഉറപ്പാക്കാം.

എസ്.ബി.ഐ ഒരു നോമിനേഷൻ ഫീച്ചർ വാഗ്ദാനം ചെയ്യുന്നു. ഇതിലൂടെ നിക്ഷേപകന് കുടുംബാംഗങ്ങളെയോ പങ്കാളികളെയോ മെച്യൂരിറ്റി പണം സ്വീകരിക്കുന്നതിനായി നോമിനേറ്റ് ചെയ്യാൻ സാധിക്കും.