പ്രായമായതിന്റെ നേട്ടം ഇങ്ങനെ; മുതിര്‍ന്ന പൗരന്മാര്‍ക്ക് മികച്ച പലിശ ഒരുക്കി എഫ്ഡി; 8.20% വരെ നേടാം

വിരമിക്കൽ കാലത്താണെങ്കിലും സാമ്പത്തികം വലിയ വിഷയമാണ്. ആരോ​ഗ്യ ചെലവുകൾ, അടിസ്ഥാന ചെലവുകൾ എന്നിവയ്ക്ക് വലിയ തുക മാറ്റിവെയ്ക്കേണ്ടി വരുന്ന സമയമായതിനാൽ മുതിർന്ന പൗരന്മാരും സാമ്പത്തികമായി ശ്രദ്ധ പുലർത്തണം. അധികം റിസ്കെടുക്കാതെ സാമ്പത്തികമായ ആശങ്കകൾ ഒഴിവാക്കി നിക്ഷേപിക്കാൻ താൽപര്യപ്പെടുന്നവർ തിരഞ്ഞെടുക്കുന്നത് സ്ഥിര നിക്ഷേപമാണ്. 60 വയസ് പൂർത്തിയായ നിക്ഷേപകരെ മുതിർന്ന പൗരന്മാരായാണ് ബാങ്കുകൾ പൊതുവെ പരി​ഗണിക്കുന്നത്.

എല്ലാ ബാങ്കുകളും മുതിർന്ന പൗരന്മാർക്ക് 0.25 മുതൽ 0.50 ശതമാനം വരെ അധിക നിരക്കുകൾ നൽകുന്നുണ്ട്. എന്നാൽ ചില ബാങ്കുകളുടെ പ്രത്യേക സ്ഥിര നിക്ഷേപങ്ങളാകട്ടെ പ്രീമിയം നിരക്കും നൽകും. ഇത്തരത്തിലുള്ള ചില നിക്ഷേപങ്ങളെ ഇവിടെ പരിചയപ്പെടാം.

എസ്ബിഐ സീനിയര്‍ സിറ്റിസണ്‍ എഫ്ഡി

എസ്ബിഐ വീകെയര്‍ സ്ഥിര നിക്ഷേപം പ്രകാരം 5 വര്‍ഷം മുതല്‍ 10 വര്‍ഷത്തേക്ക് 7.50 ശതമാനം പലിശ മുതിര്‍ന്ന പൗരന്മാരായ നിക്ഷേപകര്‍ക്ക് ലഭിക്കും. 2023 ഡിസംബര്‍ 31 വരെ എസ്ബിഐ വീകെയര്‍ സ്ഥിര നിക്ഷേപം സ്വീകരിക്കും. മുതിര്‍ന്ന പൗരന്മാര്‍ക്ക് 7.60 ശതമാനമാണ് എസ്ബിഐ നല്‍കുന്ന ഉയര്‍ന്ന പലിശ നിരക്ക്. 400 ദിവസത്തേക്കുള്ള അമൃത് കലാശ് സ്ഥിര നിക്ഷേപത്തിനാണ് 7.60 ശതമാനം പലിശ ലഭിക്കുക. പദ്ധതി ഡിസംബര്‍ 31 ന് അവസാനിക്കും.

എച്ച്ഡിഎഫ്‌സി ബാങ്ക് സീനിയര്‍ സിറ്റിസണ്‍ എഫ്ഡി

എച്ച്ഡിഎഫ്‌സി ബാങ്ക് സീനിയര്‍ സിറ്റിസണ്‍ കെയര്‍ എഫ്ഡി പ്രകാരം 7.75 ശതമാനം പലിശ മുതിര്‍ന്ന പൗരന്മാര്‍ക്ക് ലഭിക്കും. 5 വര്‍ഷം 1 ദിവസം 10 വര്‍ഷത്തേക്കാണ് ഈ ഉയര്‍ന്ന പലിശ ലഭിക്കുന്നത്. മികച്ച പലിശ ആവശ്യമുള്ളവര്‍ നവംബര്‍ 7 ന് മുന്‍പ് നിക്ഷേപിക്കണം. എച്ച്ഡിഎഫ്‌സി ബാങ്കില്‍ 55 ദിവസത്തേക്കും മുതിര്‍ന്ന പൗരന്മാര്‍ക്ക് 7.75 ശതമാനം പലിശ ലഭിക്കും.

ഐസിഐസിഐ ബാങ്ക് സീനിയര്‍ സിറ്റിസണ്‍ എഫ്ഡി

ഐസിഐസിഐ ബാങ്ക് ഗോള്‍ഡന്‍ ഇയര്‍ എഫ്ഡി വഴി ഐസിഐസിഐ ബാങ്ക് ഉപഭോക്താക്കള്‍ക്ക് 7.50 ശതമാനം പലിശ ലഭിക്കും. 5 മുതല്‍ 10 വര്‍ഷ കാലയളവിലാണ് ഈ പലിശ നിരക്ക് ലഭിക്കും. 2024 ഏപ്രില്‍ 30 വരെ ഈ പദ്ധതി പ്രകാരം നിക്ഷേപിക്കാം. 15 മാസം മുതല്‍ 2 വര്‍ഷത്തേക്ക് 7.65 ശതമാനം പലിശ ഐസിഐസിഐ ബാങ്കില്‍ നിന്ന് ലഭിക്കും.

ആക്‌സിസ് ബാങ്ക്, യെസ് ബാങ്ക്

5 വര്‍ഷം മുതല്‍ 10 വര്‍ഷത്തേക്ക് ആക്‌സിസ് ബാങ്ക് 7.75 ശതമാനം പലിശ മുതിര്‍ന്ന പൗരന്മാര്‍ക്ക് ലഭിക്കും. യെസ് ബാങ്കില്‍ 60 മാസം മുതല്‍ 120 മാസത്തേക്ക് 7.75 ശതമാനം പലിശ മുതിര്‍ന്ന പൗരന്മാര്‍ക്ക് ലഭിക്കും. 60 മാസം വരെയുള്ള സ്ഥിര നിക്ഷേപത്തിന് 8 ശതമാനം പലിശയും യെസ് ബാങ്കില്‍ നിന്ന് ലഭിക്കും.

സീനിയര്‍ സിറ്റിസണ്‍ സേവിംഗ്‌സ് സ്‌കീം

ലഘു സമ്പാദ്യ പദ്ധതികളിൽ ഉൾപ്പെടുന്നൊരു നിക്ഷേപമാണ് സീനിയര്‍ സിറ്റിസണ്‍ സേവിംഗ്‌സ് സ്‌കീം. ഒക്ടോബര്‍- ഡിസംബര്‍ പാദത്തില്‍ സീനിയര്‍ സിറ്റിസണ്‍ സേവിംഗ്‌സ് സ്‌കീമിന് 8.20 ശതമാനം വാര്‍ഷിക പലിശ നല്‍കുന്നുണ്ട്. 5 വര്‍ഷത്തേക്കാണ് നിക്ഷേപത്തിന്റെ കാലാവധി. സ്ഥിര നിക്ഷേപത്തിന് സമാനമായി നിക്ഷേപ സമയത്ത് നിശ്ചയിക്കുന്ന പലിശ കാലാവധിയോളം ലഭിക്കും.

ത്രൈമാസത്തില്‍ പലിശ വരുമാനം നിക്ഷേപകന് ലഭിക്കും. 1,000 രൂപയാണ് കുറഞ്ഞ നിക്ഷേപം. 30 ലക്ഷം രൂപയാണ് പരമാവധി നിക്ഷേപ തുക. 60 വയസിന് മുകളില്‍ പ്രായമുള്ളവര്‍ക്കാണ് പദ്ധതിയില്‍ നിക്ഷേപിക്കാന്‍ സാധിക്കുക. സെക്ഷന്‍ 80സി പ്രകാരമുള്ള നികുതി ഇളവ് പദ്ധതിക്ക് ലഭിക്കും.