പലിശയായി മാത്രം 12,30,000 രൂപ നേടാം, മുതിർന്ന പൗരന്മാർക്കുള്ള കിടിലൻ സ്കീം

റിട്ടയർമെന്റ് ജീവിതം എല്ലാവരും മുന്നിൽ കണ്ടാണ് ജീവിക്കേണ്ടത്. റിട്ടയർമെന്റിനുശേഷം സ്ഥിര വരുമാനം ഇല്ലാത്തത് പലരുടെയും ജീവിതത്തെ താറുമാറാക്കും. ഇതിനായി റിട്ടയർമെന്റ് തുക നീക്കിവയ്ക്കാവുന്നതാണ്. റിട്ടയർമെന്റ് ഫണ്ട് ഉപയോഗിച്ച് അനുയോജ്യമായ സ്കീമുകളിൽ നിക്ഷേപം നടത്തുന്നതിലൂടെ സ്ഥിര വരുമാനം ഉറപ്പാക്കാം. നിക്ഷേപത്തിന്റെ കാര്യത്തിൽ ഒരു തരത്തിലുള്ള റിസ്‌കും എടുക്കാൻ മുതിർന്നവരിൽ ഭൂരിഭാഗവും ഇഷ്ടപ്പെടുന്നില്ല. ഉറപ്പുള്ള റിട്ടേൺ ലഭിക്കുന്ന അത്തരം സ്കീമുകളിൽ നിക്ഷേപിക്കാൻ അവർ ഇഷ്ടപ്പെടുന്നു.

വയോജനങ്ങൾക്ക് അനുയോജ്യമായ ഒരു സ്കീം പോസ്റ്റ് ഓഫീസ് നൽകുന്നുണ്ട്. ഈ സ്കീമിൽ നിക്ഷേപിക്കുന്നതിലൂടെ അവർക്ക് നല്ലൊരു തുക പലിശയായി ലഭിക്കും. സീനിയർ സിറ്റിസൺ സേവിംഗ്സ് സ്കീം എന്നാണ് ഈ പദ്ധതിയുടെ പേര്. ഈ സ്കീമിലൂടെ, പ്രായമായവർക്ക് പലിശയായി മാത്രം 12,30,000 രൂപ നേടാം.

എന്താണ് സീനിയർ സിറ്റിസൺ സേവിംഗ്സ് സ്കീം

പോസ്റ്റ് ഓഫീസ് സീനിയർ സിറ്റിസൺ സേവിംഗ്സ് സ്കീം ഒരു നിക്ഷേപ പദ്ധതിയാണ്. ഇതിൽ 5 വർഷത്തേക്ക് ഒരു നിശ്ചിത തുക നിക്ഷേപിക്കുന്നു. മുതിർന്ന പൗരന്മാർക്ക് ഈ സ്കീമിൽ 30,00,000 രൂപ വരെ നിക്ഷേപിക്കാം, അതേസമയം, ഏറ്റവും കുറഞ്ഞ നിക്ഷേപ പരിധി 1000 രൂപയാണ്. നിലവിൽ ഈ സ്കീം 8.2 ശതമാനം പലിശ നിരക്ക് നൽകുന്നുണ്ട്.

പലിശയായി 12,30,000 രൂപ എങ്ങനെ നേടാം

ഈ സ്കീമിൽ പരമാവധി 30,00,000 രൂപ നിക്ഷേപിക്കാം. ഇത്രയും തുക നിക്ഷേപിക്കുകയാണെങ്കിൽ, 5 വർഷത്തിനുള്ളിൽ 8.2% നിരക്കിൽ 12,30,000 രൂപ പലിശ ലഭിക്കും. ഓരോ പാദത്തിലും 61,500 പലിശയായി ക്രെഡിറ്റ് ചെയ്യും. 5 വർഷത്തിന് ശേഷമുള്ള നിങ്ങളുടെ മെച്യൂരിറ്റി തുക 42,30,000 രൂപയാണ്.

ഈ സ്കീമിൽ 5 വർഷത്തേക്ക് 15 ലക്ഷം രൂപ നിക്ഷേപിച്ചാൽ, നിലവിലെ 8.2 ശതമാനം പലിശ അനുസരിച്ച്, 5 വർഷത്തിനുള്ളിൽ 6,15,000 രൂപ മാത്രമേ പലിശയായി ലഭിക്കൂ. ത്രൈമാസ അടിസ്ഥാനത്തിൽ പലിശ കണക്കാക്കുകയാണെങ്കിൽ, ഓരോ മൂന്ന് മാസത്തിലും 30,750 രൂപ പലിശ ലഭിക്കും. ഇങ്ങനെ 15,00,000 രൂപയും പലിശ തുകയായ 6,15,000 രൂപയും ചേർത്താൽ മൊത്തത്തിൽ 21,15,000 രൂപ മെച്യൂരിറ്റി തുകയായി ലഭിക്കും.

4 ലക്ഷത്തിന്റെ ഒരു ചിട്ടിയാണോ, 2 ലക്ഷത്തിന്റെ 2 ചിട്ടികളാണോ ലാഭം? വിശദമായി അറിയാം....

ആർക്കൊക്കെ നിക്ഷേപിക്കാം?

60 വയസോ അതിൽ കൂടുതലോ പ്രായമുള്ള ആർക്കും നിക്ഷേപിക്കാം. വിആർഎസ് എടുക്കുന്ന സിവിൽ മേഖലയിലെ സർക്കാർ ജീവനക്കാർക്കും പ്രതിരോധമേഖലയിൽ നിന്ന് വിരമിക്കുന്നവർക്കും ചില വ്യവസ്ഥകളോടെ പ്രായപരിധിയിൽ ഇളവ് നൽകിയിട്ടുണ്ട്. 5 വർഷമാണ് നിക്ഷേപ കാലാവധി. 5 വർഷത്തിനു ശേഷവും സ്കീമിന്റെ കാലാവധി കൂട്ടാവുന്നതാണ്. നിക്ഷേപ തുകയുടെ കാലാവധി പൂർത്തിയാകുമ്പോൾ, അക്കൗണ്ട് കാലാവധി മൂന്ന് വർഷത്തേക്ക് നീട്ടാവുന്നതാണ്. ഈ സ്കീമിലെ നിക്ഷേപങ്ങൾക്ക് ആദായനികുതി ഇളവ് ലഭിക്കുന്നതാണ്.