മുതിർന്ന പൗരന്മാരെങ്കിൽ 9% വരെ പലിശ; സ്ഥിര നിക്ഷേപത്തിന് വീണ്ടും പലിശ നിരക്കുയർത്തി ബാങ്ക്

നിക്ഷേപ പലിശ നിരക്ക് താഴേക്ക് എന്ന വാർത്ത വരുമ്പോഴും നിക്ഷേപ പലിശ നിരക്കുയർത്തുകയാണ് ബാങ്കുകൾ. ജൂൺ മാസത്തിൽ മാത്രം 2 ബാങ്കുകൾ നിക്ഷേപ പലിശ നിരക്ക് പുതുക്കി. ഇക്വിറ്റാസ് സ്മോൾ ഫിനാൻസ് ബാങ്ക്, ഇൻഡസ് ഇൻഡ് ബാങ്ക് എന്നിവയാണ് ഇക്കൂട്ടത്തിലുള്ള ബാങ്കുകൾ. ഇക്വിറ്റിസ് സ്മോൾ ഫിനാൻസ് ബാങ്കിൻെറ നിരക്കുകൾ 9 ശതമാനത്തിലേക്ക് ഉയർന്നു. മുതിർന്ന പൗരന്മാർക്കാണ് 9 ശതമാനം പലിശ ലഭിക്കുക.

ഇക്വിറ്റാസ് പലിശ നിരക്ക്

ഇക്വിറ്റാസ് സ്മോൾ ഫിനാൻസ് ബാങ്കിന്റെ പുതുക്കിയ പലിശ നിരക്കുകൾ ജൂൺ 5 മുതൽ പ്രാബല്യത്തിൽ വന്നു. 2 കോടി രൂപയിൽ താഴെയുള്ള 444 ദിവസത്തെ നിക്ഷേപത്തിന് 8.5 ശതമാനം പലിശയാണ് പുതിയ നിരക്ക് വർധനവ് പ്രകാരം ബാങ്ക് നൽകുന്നത്. മുതിർന്ന പൗരന്മാർക്ക് 0.50 ശതമാനം അധിക നിരക്ക് പ്രകാരം 9 ശതമാനം പലിശ ലഭിക്കും. ആഭ്യന്തര, എൻആർഇ/എൻആർഒ അക്കൗണ്ടുകളിലെ സ്ഥിര നിക്ഷേപങ്ങൾക്ക് ഈ പലിശ നിരക്ക് ബാധകമാണ്.

7 ദിവസം മുതൽ 10 വർഷത്തേക്ക് 3.5 ശതമാനം മുതൽ 8.50 ശതമാനം വരെ പലിശ ബാങ്ക് നൽകുന്നു. 1 വർഷം മുതൽ 18 മാസം വരെ  8.20 ശതമാനം പലിശ ലഭിക്കും. 888 ദിവസത്തെ കാലാവധിയിൽ 8.50 ശതമാനം പലിശ ലഭിക്കും. മുതിർന്ന പൗരന്മാരുടെ 7 ദിവസം മുതൽ 10 വർഷം വരെ കാലാവധിയുള്ള നിക്ഷേപങ്ങൾക്ക് 4 ശതമാനം മുതൽ 9 ശതമാനം വരെ പലിശ ലഭിക്കും. 

ഇൻഡസ്ഇൻഡ് ബാങ്ക് 

2 കോടിക്ക് താഴെയുള്ള നിക്ഷേപങ്ങൾക്ക് ഇൻഡസ്ഇൻഡ് ബാങ്ക് 35 അടിസ്ഥാന നിരക്കാണ് പലിശ നിരക്കുയർത്തിയത്. പുതുക്കിയ നിരക്കുകൾ ജൂൺ 2 മുതൽ നിലവിൽ വന്നു. 1 വർഷം മുതൽ 2 വർഷം കാലാവധിയുള്ള നിക്ഷേപങ്ങൾക്ക് റെ​ഗുലർ നിക്ഷേപകർക്ക് 7.75 ശതമാനം പലിശ ലഭിക്കും. മുതിർന്ന പൗരന്മാർക്ക് 8.25 ശതമാനം പലിശ ലഭിക്കും. ബാങ്ക് നൽകുന്ന ഉയർന്ന പലിശ നിരക്കാണിത്. 

2 വർഷം മുതൽ 3 വർഷം 3 മാസ കാലയളവിലേക്ക് ഇൻഡസ്ഇൻഡ് ബാങ്ക് 7.50 ശതമാനം പലിശ സാധാരണ നിക്ഷേപകർക്ക് ലഭിക്കും. മുതിർന്ന പൗരന്മാർക്ക് 8 ശതമാനം പലിശ ലഭിക്കും. 61 മാസത്തിന് മുകളിൽ 10 വർഷം വരെ നിക്ഷേപകർക്ക് 7 ശതമാനവും മുതിർന്ന പൗരന്മാർക്ക് 7.50 ശതമാനം പലിശയും ലഭിക്കും.

അതേസമയം, ഇൻഡസ്ഇൻഡ് ബാങ്ക് പലിശ നിരക്കിൽ 25 അടിസ്ഥാന നിരക്ക് കുറവ് വരുത്തുകയും ചെയ്തിട്ടുണ്ട്. 2 വർഷത്തിന് മുകളിൽ 3 വർഷം 3 മാസം വരെ കാലാവധിയുള്ള നിക്ഷേപങ്ങൾക്കും വർഷം 3 മാസം മുതൽ 61 മാസത്തിൽ താഴെ കാലയളവിലുള്ള നിക്ഷേപങ്ങൾക്കും നൽകിയരുന്ന 7.75 ശതമാനം പലിശ 7.50 ശതമാനമാക്കി കുറച്ചു. 

സുരക്ഷിതത്വം

രണ്ട് ബാങ്കുകളും റിസർവ് ബാങ്ക് ഓഫ് ഇന്ത്യയുടെ നിയന്ത്രണത്തിൽ വരുന്ന ഷെഡ്യൂൾഡ് ബാങ്കുകളാണ്. അതിനാൽ തന്നെ നിക്ഷേപത്തിന് സുരക്ഷിതത്വം ലഭിക്കും. ഷെഡ്യൂൾഡ് ബാങ്കുകൾക്ക് റിസർവ് ബാങ്ക് സബ്സിഡിയറിയായ ഡെപ്പോസിറ്റ് ഇൻഷൂറൻസ് ആൻഡ് ക്രെഡിറ്റ് ​ഗ്യാരണ്ടി കോർപ്പറേഷന്റെ ഇൻഷൂറൻസ് ലഭിക്കും. 5 ലക്ഷം രൂപ വരെയാണ് ഇത്തരത്തിൽ ഇൻഷൂറൻസ് ലഭിക്കും. ബാങ്ക് തകർന്നാലും 5 ലക്ഷം രൂപ വരെയുള്ള നിക്ഷേപം തിരികെ ലഭിക്കും. നിക്ഷേപവും പലിശയും അടക്കമാണ് 5 ലക്ഷം രൂപ.