ഹ്രസ്വകാലത്തേക്ക് സ്ഥിര നിക്ഷേപമിട്ടാൽ നേട്ടങ്ങൾ; 1-2 വർഷത്തേക്ക് 8.25% പലിശ നൽകുന്ന ബാങ്കുകളെ അറിയാം

റിസർവ് ബാങ്ക് പലിശ നിരക്ക് വർധിപ്പിക്കുന്നത് താൽകാലികമായി അവസാനിപ്പിച്ചപ്പോൾ നിക്ഷേപ നിരക്കുകൾ ഏറ്റവും ഉയർന്ന ഘട്ടത്തിലാണുള്ളത്. നിരവധി ധനകാര്യ സ്ഥാപനങ്ങൾ സ്ഥിര നിക്ഷേപങ്ങൾക്ക് 7-8 ശതമാനം പലിശ നിരക്ക് വാഗ്ദാനം ചെയ്യുന്നുണ്ട്. സ്മോൾ ഫിനാൻസ് ബാങ്കുകൾ 8.5 ശതമാനം മുതൽ 9 ശതമാനം പലിശയും വാഗ്ദാനം ചെയ്യുന്നു. അതിനാൽ സ്ഥിര നിക്ഷേപമിടുന്നവർക്ക് അനുയോജ്യമായ സമയമാണിത്.

കയ്യിലുള്ള അധിക പണം മുഴുവൻ സ്ഥിര നിക്ഷേപമിടുമ്പോൾ, ഹ്രസ്വകാലത്തേക്കോ ദീർഘകാലത്തെക്കോ നിക്ഷേപം നടത്തേണ്ടത് എന്ന് നിക്ഷേപകൻ പരി​ഗണിക്കണം. പണം ഒരൊറ്റ സ്ഥിര നിക്ഷമാക്കുന്നതിന് പകരം ഒന്നിലധികം ഹ്രസ്വകാല നിക്ഷേപങ്ങളാക്കാനാണ് വിദ​ഗധർ നിർദ്ദേശിക്കുന്നത്. ഇതിന്റെ നേട്ടങ്ങളും ഹ്രസ്വകാല സ്ഥിര നിക്ഷേപങ്ങളുടെ പലിശ നിരക്കും നോക്കാം.

ഹ്രസ്വകാല സ്ഥിര നിക്ഷേപങ്ങൾ

മികച്ച വരുമാനം നേടുന്നതിന് കയ്യിലുള്ള അധിക പണം ദീർഘകാലത്തേക്ക് ഒരൊറ്റ സ്ഥിര നിക്ഷേപമായി ലോക്ക് ചെയ്യുന്നതിന് പകരം വ്യത്യസ്ത കാലാവധിയുള്ള ഒന്നിലധികം സ്ഥിര നിക്ഷേപങ്ങളായി മാറ്റാം. ഇതുവഴി മുഴുവൻ നിക്ഷേപവും പിൻവലിക്കാതെ തന്നെ ഓരോ ഘട്ടങ്ങളിലും കയ്യിലേക്ക് പണമെത്തും. സേവിംഗ്‌സ് അക്കൗണ്ടിൽ 5 ലക്ഷം രൂപയുള്ളൊരാൾ ഒരു നിശ്ചിത കാലാവധി തിരഞ്ഞെടുത്താൽ, ഒരു നിരക്കിൽ ഒരു കാലയളവിലേക്ക് പണം ലോക്ക് ചെയ്യേണ്ടി വരും.

പകരം പണം അഞ്ച് നിക്ഷേപങ്ങളായി വ്യത്യസ്ത നിരക്കുകളിൽ വിഭജിക്കാം. ഓരോ നിക്ഷേപവും ഒന്ന്, രണ്ട്, മൂന്ന്, നാല്, അഞ്ച് വർഷങ്ങളുടെ വ്യത്യസ്ത ഇടവേളകളിൽ കാലാവധിയെത്തും. ഇത് മികച്ച ശരാശരി വരുമാനം ഉറപ്പാക്കും. ഉദാഹരണത്തിന്, ഒരു വർഷത്തെ നിക്ഷേപം 7 ശതമാനം പലിശയും രണ്ടും മൂന്നും വർഷത്തെ നിക്ഷേപങ്ങൾ 8 ശതമാനം പലിശയും മറ്റുള്ളവർ 7 ശതമാനം പലിശയും ലഭിക്കും. 

എങ്ങനെ നിക്ഷേപിക്കാം

കയ്യിലുള്ള 10 ലക്ഷം രൂപ സ്ഥിര നിക്ഷേപമാക്കി മാറ്റാൻ തീരുമാനിച്ചാൽ ഈ തുക രണ്ടര ലക്ഷം രൂപ വീതമുള്ള നാല് തുല്യ ഭാഗങ്ങളായി വ്യത്യസ്ത മെച്യൂരിറ്റി കാലയളവുകളുള്ള സ്ഥിര നിക്ഷേപങ്ങളിടാം. ഓരോ സ്ഥിര നിക്ഷേപവും കാലാവധി പൂർത്തിയാകുമ്പോൾ അത് വീണ്ടും നിക്ഷേപിക്കുന്നതിനോ സാമ്പത്തിക ആവശ്യങ്ങൾക്കനുസരിച്ച് ഫണ്ടുകൾ ഉപയോഗിക്കുകയോ ചെയ്യാം. 

പലിശ നിരക്കുകൾ

ഹ്രസ്വകാലത്തേക്ക് ഇന്ന് ബാങ്കുകൾ മികച്ച പലിശ നിരക്കാണ് നൽകുന്നത്. 1 വര്‍ഷത്തെ സ്ഥിര നിക്ഷേപത്തിന് ഇക്വിറ്റാസ് സ്‌മോള്‍ ഫിനാന്‍സ് ബാങ്ക് 8.20 ശതമാനം പലിശ നല്‍കുന്നുണ്ട്. ഇന്‍ഡസ്ഇന്‍ഡ് ബാങ്കില്‍ 7.75 ശതമാനം പലിശ നേടാം.

മറ്റൊരു സ്വകാര്യ ബാങ്കായ യെസ് ബാങ്കില്‍ 1 വർഷത്തെ സ്ഥിര നിക്ഷേപത്തിന് 7.50 ശതമാനം പലിശ ലഭിക്കും. ബന്‍ഡന്‍ ബാങ്ക്, ഡിസിബി ബാങ്ക് എന്നിവ 1 വർഷത്തേക്ക് 7.25 ശതമാനം പലിശ നല്‍കുന്നുണ്ട്. 1 വര്‍ഷത്തേക്ക് രാജ്യത്തെ ഏറ്റവും വലിയ ബാങ്കായ എസ്ബിഐ 6.80 ശതമാനം പലിശ നല്‍കും.

2 വർഷത്തെ സ്ഥിര നിക്ഷേപം

2 വര്‍ഷത്തേക്ക് ഇസാഫ് സ്മോൾ ഫിനാൻസ് ബാങ്ക് 8.50 ശതമാനം പലിശ നൽകുന്നു. 8.25 ശതമാനം പലിശ നൽകുന്നത് സൂര്യോദയ് സ്‌മോള്‍ ഫിനാന്‍സ് ബാങ്കാണ് പലിശ നിരക്കിൽ രണ്ടാമത്. ഉത്കൃഷ് സ്‌മോള്‍ ഫിനാന്‍സ് ബാങ്ക്, ഡിസിബി ബാങ്ക് എന്നിവ 8 ശതമാനം പലിശ നല്‍കും.

ഫിന്‍കെയര്‍ സമോള്‍ ഫിനാന്‍സ് ബാങ്ക് 7.80 ശതമാനവും ആര്‍ബിഎല്‍ ബാങ്ക് 7.50 ശതമാനവും ബന്‍ഡന്‍ ബാങ്ക് 7.25 ശതമാനം പലിശയും 2 വർഷത്തെ സ്ഥിര നിക്ഷേപത്തിന് നല്‍കും.