നിക്ഷേപത്തിനൽപ്പം രസതന്ത്രം പകരാം... മികച്ച സ്മോൾ ക്യാപ് കെമിക്കൽ സ്റ്റോക്കുകൾ ഇവയാണ്, നോക്കുന്നോ?

രസിച്ചു പഠിക്കുന്നവർക്ക് ഏറ്റവും എളുപ്പമുള്ളതാണ് രസതന്ത്രം. ആറ്റങ്ങളിൽ തുടങ്ങി ജീവൻ്റെ ഏറ്റവും അടിസ്ഥാന ഘടകങ്ങളെക്കുറിച്ചുള്ള പഠനമാണ് രസതന്ത്രം. ഈ മേഖലയിൽ നടത്തിയ പഠനങ്ങളും സംഭവവികാസങ്ങളും ഗുരുതരമായ രോഗങ്ങളിൽ നിന്ന് രക്ഷപ്പെടാൻ കഴിയുന്ന വിപ്ലവകരമായ ഉൽപ്പന്നങ്ങൾ നിർമ്മിക്കാൻ മനുഷ്യരെ സഹായിച്ചു. ഒരു പക്ഷെ അവിശ്വസനീയമെന്ന് തോന്നുന്ന പല നിർമ്മിതികളുടെ പിറകിലും രസതന്ത്രത്തിലെ തന്ത്രങ്ങളാണെന്ന് പറയാം.

കെമിക്കൽ നിർമ്മാണ കമ്പനികളുടെ ലോകവും വളരെ വലുതാണ്. കോടികളുടെ ഇൻവെസ്റ്റ്മെന്റ് ഈ മേഖലയിൽ നടക്കുന്നു. അതുകൊണ്ടു തന്നെ ഓഹരി വിപണിയിൽ നിക്ഷേപിക്കുന്നവർക്ക് കെമിക്കൽ കമ്പനികളുടെ ഓഹരി വ്യാപാരവും പരീക്ഷിക്കാവുന്നതാണ്. ശക്തമായ വളർച്ചാ നിരക്കും ശക്തമായ റിട്ടേൺ അനുപാതവുമുള്ള സ്മോൾ ക്യാപ് കമ്പനികളെക്കുറിച്ച് വിശദമായി നോക്കാം.

1. ഫൈൻ ഓർഗാനിക് ഇൻഡസ്ട്രീസ്

മുംബൈ ആസ്ഥാനമായുള്ള ഒലിയോകെമിക്കൽ നിർമ്മാതാവാണ് ഫൈൻ ഓർഗാനിക്സ്. സസ്യങ്ങളിൽ നിന്നും മൃഗങ്ങളിൽ നിന്നുമുള്ള എണ്ണകളുടെയും കൊഴുപ്പുകളുടെയും ഉപയോഗമാണ് ഒലിയോകെമിക്കൽ കൈകാര്യം ചെയ്യുന്നത്. രമേഷ് ഷായും പ്രകാശ് കാമത്തും ചേർന്ന് 1970ലാണ് കമ്പനി സ്ഥാപിച്ചത്. രമേഷ്, കെമിക്കൽ ട്രേഡിംഗ് ബിസിനസിൽ ഒരു ബിസിനസുകാരനായിരുന്നു, പ്രകാശ് ഇൻസ്റ്റിറ്റ്യൂഷൻ ഓഫ് കെമിക്കൽ ടെക്‌നോളജിയിൽ നിന്ന് വിദഗ്ധ ബിരുദധാരിയായിരുന്നു.

62 ശതമാനം വളർച്ച

2023 സാമ്പത്തിക വർഷത്തിൽ 3087 കോടി രൂപയാണ് കമ്പനിയുടെ വരുമാനം. 2022 സാമ്പത്തിക വർഷത്തിൽ വരുമാനം 1909 കോടി രൂപയായിരുന്നു. അതായത് 62 ശതമാനം നേട്ടമാണ് 2023ൽ ഫൈൻ ഓർഗാനിക് ഇൻഡസ്ട്രീസ് നേടിയത്. ഇതേ കാലയളവിൽ, അറ്റാദായത്തിൽ പോലും 138% വളർച്ച കൈവരിച്ചു. 2022ൽ 260 കോടി രൂപയായിരുന്ന അ അറ്റാദായം 2023 സാമ്പത്തിക വർഷത്തിൽ 618 കോടി രൂപയായി ഉയർന്നു.

80 ൽ അധികം രാജ്യങ്ങളിൽ

470-ലധികം ഉൽപ്പന്നങ്ങളുടെ ഒരു പോർട്ട്‌ഫോളിയോ സൃഷ്‌ടിക്കുന്ന ഫൈൻ ഓർഗാനിക് ഇൻഡസ്ട്രീസ് ഈ രംഗത്തെ മുൻനിരക്കാരാണ്. ഫൈൻ ഓർഗാനിക്‌സിന് 80-ലധികം രാജ്യങ്ങളിൽ സാന്നിധ്യമുണ്ട്. 180+ വിതരണക്കാരുടെ ശൃംഖലയും 850+ നേരിട്ടുള്ള ഉപഭോക്താക്കളുമുണ്ട്. കമ്പനിയുടെ ഉൽപ്പന്നങ്ങൾ ഭക്ഷ്യ ഉൽപ്പന്നങ്ങൾ, വ്യക്തിഗത പരിചരണം, മൃഗങ്ങളുടെ തീറ്റ, കോട്ടിംഗ് തുടങ്ങിയവാണ്.

2. ആർക്കിയൻ കെമിക്കൽ ഇൻഡസ്ട്രീസ്

ബ്രോമിൻ, വ്യാവസായിക ഉപ്പ് എന്നിവയുടെ ഇന്ത്യയിലെ ഏറ്റവും വലിയ ഉത്പാദകനും കയറ്റുമതിക്കാരനുമാണ് ആർക്കിയൻ കെമിക്കൽസ്. ബ്രോമിൻ, വ്യാവസായിക ലവണങ്ങൾ, സൾഫേറ്റ് ഓഫ് പൊട്ടാഷ് എന്നിവയിൽ വൈദഗ്ദ്ധ്യമുള്ള ഇന്ത്യയിലെ പ്രമുഖ രാസവസ്തു നിർമ്മാതാക്കളാണ് കമ്പനി. ആർക്കിയന് 55ൽ അധികം ഉപഭോക്താക്കളുടെ ശൃംഖലയുണ്ട്. അതിൽ 27 എണ്ണം ആഗോളവും 28 ആഭ്യന്തരവുമാണ്. രണ്ട് വിപണികളിലും ഏതാണ്ട് തുല്യമായ ഉപഭോക്തൃ അടിത്തറയുണ്ടെങ്കിലും, കമ്പനിയുടെ വരുമാനത്തിൻ്റെ 73% വിദേശ വിപണികളിൽ നിന്നും 27% ഇന്ത്യയിൽ നിന്നുമാണ്.

വരുമാനത്തിൽ 30 ശതമാനത്തിന്റെ വളർച്ച

2023 സാമ്പത്തിക വർഷത്തിൽ ആർക്കിയൻ കെമിക്കൽ ഇൻഡസ്ട്രീസിന്റെ വരുമാനം 30 ശതമാനം വർദ്ധിച്ച് 1484 കോടി രൂപയായി. 2022ൽ അത് 1143 കോടി രൂപയായിരുന്നു. ഈ കാലയളവിലെ അറ്റാദായം 188 കോടി രൂപയിൽ നിന്നും 383 കോടിയായി. 103 ശതമാനത്തിന്റെ വളർച്ച.

3. ക്ലീൻ സയൻസ് & ടെക്നോളജി

2003-ൽ സ്ഥാപിതമായ ഒരു കെമിക്കൽ നിർമ്മാണ കമ്പനിയാണ് ക്ലീൻ സയൻസ്. സ്പെഷ്യാലിറ്റി കെമിക്കൽസ് നിർമ്മിക്കുന്നതിന് കമ്പനി നൂതനവും സുസ്ഥിരവുമായ സമീപനമാണ് സ്വീകരിക്കുന്നത്. പെർഫോമൻസ് കെമിക്കൽസ്, ഫാർമസ്യൂട്ടിക്കൽ കെമിക്കൽസ്, എഫ്എംസിജി കെമിക്കൽസ് എന്നിവയുടെ നിർമ്മാതാക്കളാണ് ക്ലീൻ സയൻസ്.

ഏറ്റവും വലിയ വിപണി ചൈന

ആഗോളതലത്തിൽ 500 ഉപഭോക്താക്കളുള്ള കമ്പനിക്ക് 35 രാജ്യങ്ങളിൽ സാന്നിധ്യമുണ്ട്. ക്ലീൻ സയൻസിൻ്റെ ഇതുവരെയുള്ള ഏറ്റവും വലിയ വിപണി ആഗോള വരുമാനത്തിൻ്റെ 34% സംഭാവന ചെയ്യുന്ന ചൈനയാണ്. ഇതിന് പിന്നാലെയാണ് ഇന്ത്യ 28%, പിന്നെ അമേരിക്കയും യൂറോപ്പും 16% വീതം സംഭാവന ചെയ്യുന്നു. ക്ലീൻ സയൻസിന് 3 മാനുഫാക്ചറിംഗ് യൂണിറ്റുകളും 4 സ്വതന്ത്ര ഗവേഷണ-വികസന ലാബുകളും ഉണ്ട്. 2023 സാമ്പത്തിക വർഷത്തിൽ ക്ലീൻ സയൻസിന് മികച്ച വരുമാനം റിപ്പോർട്ട് ചെയ്തു. 966 കോടി രൂപയായിരുന്നു വരുമാനം. 2022 സാമ്പത്തിക വർഷത്തിൽ ഇത് 715 കോടിയായിരുന്നു. 35 ശതമാനത്തിന്റെ വർധന. അറ്റാദായം 228 കോടി രൂപയിൽ നിന്നും 295 കോടിയായി.

4. വിഷ്ണു കെമിക്കൽസ്

ക്രോമിയം, ബേരിയം കെമിക്കൽസിൻ്റെ ഇന്ത്യയിലെ ഏറ്റവും വലിയ നിർമ്മാതാക്കളാണ് വിഷ്ണു കെമിക്കൽസ്. ഇൻഡസ്ട്രി-ഗ്രേഡ് ക്രോമിയം കെമിക്കൽസ്, ബേരിയം കാർബണേറ്റ്, ബേരിയം സൾഫേറ്റ് എന്നിവ പോലുള്ള പ്രത്യേക രാസവസ്തുക്കൾ കമ്പനി നിർമ്മിക്കുന്നു. ക്രോമിയം രാസവസ്തുക്കൾ ഫാർമസ്യൂട്ടിക്കൽസ്, ഇലക്ട്രോപ്ലേറ്റിംഗ്, റിഫ്രാക്ടറികൾ, വുഡ് പ്രിസർവേറ്റീവുകൾ, പിഗ്മെൻ്റുകൾ, പേപ്പർ എന്നിവയിലും മറ്റും ഉപയോഗിക്കുന്നു. സെറാമിക്സ്, നിർമ്മാണ സാമഗ്രികൾ, പെയിൻ്റുകൾ, ബാറ്ററികൾ, സ്പെഷ്യാലിറ്റി ഗ്ലാസ് എന്നിവയിൽ ബേരിയം കെമിക്കൽസ് ഉപയോഗിക്കുന്നു.

31 ശതമാനത്തിന്റെ വർധന

2022ൽ 1075 കോടി രൂപയായിരുന്നു വിഷ്ണു കെമിക്കൽസിന്റെ വരുമാനം. അത് 2023ൽ വരുമാനം 31 ശതമാനം വർദ്ധിച്ച് 1406 കോടിയിലെത്തി. ഇതേ കാലയളവിൽ, അറ്റാദായം 68% വർദ്ധിച്ചു. 82 കോടിയിൽ നിന്നും അറ്റാദായം 2023 സാമ്പത്തിക വർഷത്തിൽ 137 കോടി രൂപയായി. കെമിക്കൽ ലവണങ്ങളുടെ നിർമ്മാതാക്കൾ മുതൽ സ്പെഷ്യാലിറ്റി കെമിക്കൽസ് നിർമ്മാതാക്കൾ വരെയുള്ള കെമിക്കൽ സ്റ്റോക്കുകളുടെ വിവരങ്ങളാണ് മുകളിൽ വിശദീകരിച്ചത്. രാസ വ്യവസായം വളരെ ലാഭകരമായ അവസരമാണ്. എന്നാൽ ഭൗമരാഷ്ട്രീയ പ്രശ്നങ്ങളും ചൈനയിൽ നിന്നുള്ള വിലകുറഞ്ഞ ഇറക്കുമതിയും കാരണം മാർജിൻ നിലനിർത്തുന്നതിൽ പ്രതിസന്ധിയുണ്ടായേക്കാമെന്ന കാര്യം മറക്കരുത്.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.