ഇവിടെ നിക്ഷേപിച്ചാൽ വെറുതെയാകില്ല; 1 ലക്ഷത്തിന് 30,000 രൂപയുടെ ഉറപ്പുള്ള റിട്ടേൺ; മികച്ച പലിശ ഈ ബാങ്കുകളിൽ

വിപണിയിലെ ചാഞ്ചാട്ടങ്ങളോട് താൽപര്യമില്ലാതെ സുരക്ഷിതമായി നിക്ഷേപിക്കാൻ തയ്യാറെടുക്കുന്നവർക്ക് ബാങ്കുകളിലെ സ്ഥിര നിക്ഷേപമാണ് ഏറ്റവും അനുയോജ്യമായ ഓപ്ഷൻ. ഉയർന്ന പലിശ നിരക്ക് കാലയളവിൽ സ്ഥിര നിക്ഷേപമിടുകയെന്നത് നിക്ഷേപകർക്ക് ബോണസാണ്. ബാങ്കുകളിലെ പലിശ നിരക്കുകൾ ഉയർന്ന് നിൽക്കുന്ന കാലത്ത് ബാങ്കുകൾ വിവിധ കാലയളവുകളിൽ 9 ശതമാനം വരെ പലിശ നിക്ഷേപകർക്ക് നൽകുന്നുണ്ട്. മൂന്ന് വർഷ കാലത്തെ സ്ഥിര നിക്ഷേപങ്ങളുടെ പലിശ നോക്കിയാൽ മികച്ച പലിശ നൽകുന്നത് സ്മോൾ ഫിനാൻസ് ബാങ്കുകളാണ്.

3 വർഷത്തേക്കുള്ള പലിശ പരിശോധിച്ചാൽ ശരാശരി 8 ശതമാനം നിരക്ക് ലഭിക്കുന്നതായി കാണാം. അതേസമയം സ്മോൾ ഫിനാൻസ് ബാങ്കുകൾ 8.6 ശതമാനം വരെ പലിശ നിരക്ക് നൽകുന്നുമുണ്ട്. സുരക്ഷയ്ക്കൊപ്പം മികച്ച ലിക്വിഡിറ്റിയും പലിശ വരുമാനം ഉറപ്പു നൽകുന്നതിനാൽ ഉയർന്ന നിരക്കിൽ സ്ഥിര നിക്ഷേപമിടൻ പലരും തയ്യാറാണ്.

ഒരു കോടി രൂപയിൽ താഴെയുള്ള റെ​ഗുലർ നിക്ഷേപകരുടെ 3 വർഷത്തെ സ്ഥിര നിക്ഷേപത്തിന് ബാങ്കുകൾ നൽകുന്ന പലിശ നിരക്ക് വിശദമായി നോക്കാം. ഈ നിരക്കിൽ 3 വർഷത്തേക്ക് ഓരോ ബാങ്കുകളും എത്ര രൂപ പലിശ വരുമാനം നൽകുന്നു എന്നും പരിശോധിക്കാം. ത്രൈമാസ കോമ്പൗണ്ടിം​ഗിന്റെ അടിസ്ഥാനത്തിലാണ് പലിശ വരുമാനം കണക്കാക്കുന്നത്.

8.60% പലിശ

സ്മോൾ ഫിനാൻസ് ബാങ്കുകളിൽ സൂര്യോദയ് സ്മോൾ ഫിനാൻസ് ബാങ്ക് മൂന്ന് വർഷത്തെ സ്ഥിര നിക്ഷേപത്തിന് 8.6 ശതമാനം എന്ന ഉയർന്ന നിരക്കിലുള്ള പലിശ വാഗ്ദാനം ചെയ്യുന്നുണ്ട്. ബാങ്കിൽ ഒരു ലക്ഷം രൂപ മൂന്ന് വർഷത്തേക്ക് നിക്ഷേപിക്കുമ്പോൾ കാലാവധിയിൽ 1.29 ലക്ഷം രൂപയായി വളരും.

8.50% പലിശ

രണ്ട് സ്മോൾ ഫിനാൻസ് ബാങ്കുകളാണ് 3 വർഷത്തെ സ്ഥിര നിക്ഷേത്തിന് 8.50 ശതമാനം പലിശ നൽകുന്നത്. ജന സ്മോൾ ഫിനാൻസ് ബാങ്കും ഉത്കർഷ് സ്മോൾ ഫിനാൻസ് ബാങ്കുമാണിവ. ഒരു ലക്ഷം രൂപ മൂന്ന് വർഷ കാലയളവിൽ നിക്ഷേപിക്കാൻ സാധിക്കുമ്പോൾ കാലാവധിയിൽ 1.29 ലക്ഷം രൂപ പിൻവലിക്കാം.

8.11% പലിശ

ഫിൻകെയർ സ്മോൾ ഫിനാൻസ് ബാങ്ക് മൂന്ന് വർഷത്തെ സ്ഥിര നിക്ഷേപത്തിന് 8.11 ശതമാനം പലിശ നൽകുന്നു. ഈ പലിശ പ്രകാരം മൂന്ന് വർഷത്തിനുള്ളിൽ 1 ലക്ഷം രൂപ 1.27 ലക്ഷം രൂപയായി വളരും. വിവിധ സ്മോൾ ഫിനാൻസ് ബാങ്കുകൾ 8 ശതമാനം പലിശ 3 വർഷത്തെ സ്ഥിര നിക്ഷേപത്തിന് നൽകുന്നുണ്ട്.

എയു സ്മോൾ ഫിനാൻസ് ബാങ്ക്, ഇക്വിറ്റാസ് സ്മോൾ ഫിനാൻസ് ബാങ്ക്, ശിവാലിക് സ്മോൾ ഫിനാൻസ് ബാങ്ക് എന്നിവയാണിവ. ഈ ബാങ്കുകളിൽ 1 ലക്ഷം രൂപ മൂന്ന് വർഷത്തേക്ക് നിക്ഷേപിച്ചാൽ 1.27 ലക്ഷം രൂപയായി വളരും.

7.75% പലിശ

നോർത്ത് ഈസ്റ്റ് സ്മോൾ ഫിനാൻസ് ബാങ്ക് മൂന്ന് വർഷത്തെ സ്ഥിര നിക്ഷേപങ്ങൾക്ക് 8 ശതമാനത്തിന് താഴെയുള്ള പലിശയാണ് നൽകുന്നത്. മൂന്ന് വർഷത്തേക്ക് 7.75 ശതമാനം പലിശ നോർത്ത് ഈസ്റ്റ് സ്മോൾ ഫിനാൻസ് ബാങ്കിൽ നിന്ന് ലഭിക്കും. ഒരു ലക്ഷം രൂപ മൂന്ന് വർഷത്തേക്ക് നിക്ഷേപിച്ചാൽ ഈ പലിശ നിരക്കിൽ 1.26 ലക്ഷം രൂപ ലഭിക്കും.

നിക്ഷേപം ഇവിടെ സുരക്ഷിതം

നിക്ഷേപം സമാഹരിക്കാൻ വൻകിട ബാങ്കുകളുമായി മത്സരിക്കേണ്ടതിനാലാണ് സ്‌മോൾ ഫിനാൻസ് ബാങ്കുകൾ നിക്ഷേപങ്ങൾക്ക് ഉയർന്ന പലിശ നിരക്ക് വാഗ്ദാനം ചെയ്യുന്നത്. റിസർവ് ബാങ്കിന്‍റെ അം​ഗീകാരത്തോടെ പ്രവർത്തിക്കുന്നവയാണ് സ്മോൾ ഫിനാൻസ് ബാങ്കുകൾ. റിസര്‍വ് ബാങ്ക് സബ്‌സിഡിയറിയായ ഡെപ്പോസിറ്റ് ഇന്‍ഷൂറന്‍സ് ആന്‍ഡ് ക്രെഡിറ്റ് ഗ്യാരണ്ടി കോര്‍പ്പറേഷന്‍ നിക്ഷേപത്തിന് 5 ലക്ഷം രൂപ വരെ ഇന്‍ഷൂറന്‍സ് നല്‍കുന്നുണ്ട്.