100 രൂപയില്‍ നിക്ഷേപം തുടങ്ങാം; ആവര്‍ത്തന നിക്ഷേപത്തിന് മികച്ച പലിശ നല്‍കുന്ന ബാങ്കേത്

നിക്ഷേപം നടത്താനായി വലിയ തുക ഇല്ലാത്ത ശമ്പളക്കാരാണെങ്കില്‍ തിരഞ്ഞെടുക്കാവുന്ന അനുയോജ്യമായ മാര്‍ഗമാണ് സ്ഥിര നിക്ഷേപങ്ങള്‍. സ്ഥിരമായ നിക്ഷേപപത്തിലൂടെ നിശ്ചിത സമയത്തിനുള്ളില്‍ വലിയൊരു സമ്പത്തുണ്ടാക്കാന്‍ ആവര്‍ത്തന നിക്ഷേപത്തിന് സാധിക്കും.

ഏറ്റവും കുറഞ്ഞ റിസ്‌കില്‍, കാലാവധിയില്‍ പലിശയും നിക്ഷേപിച്ച തുകയും ആവര്‍ത്തന നിക്ഷേപത്തില്‍ നിന്ന് തിരികെ ലഭിക്കും. ഹ്രസ്വകാലത്തേക്ക് നിശ്ചിത ലക്ഷ്യം വെച്ച് നിക്ഷേപിക്കുന്നവര്‍ക്ക് വളരെ പ്രയോജനപ്പെടുന്നതാണ് ആവര്‍ത്തന നിക്ഷേപം.

സ്ഥിര നിക്ഷേപത്തിന് സമാനമായി ആവര്‍ത്തന നിക്ഷേപത്തിലും ബാങ്കും നിക്ഷേപ കാലാവധി അനുസരിച്ചും പലിശ നിരക്ക് വ്യത്യാസപ്പെടും.രാജ്യത്തെപ്രധാന ബാങ്കുകള്‍ ആവര്‍ത്തന നിക്ഷേപത്തിന് നല്‍കുന്ന പലിശ നിരക്കുകള്‍ താരതമ്യം ചെയ്യാം.

എസ്ബിഐ ആവര്‍ത്തന നിക്ഷേപം

എസ്ബിഐയില്‍ ആവര്‍ത്തന നിക്ഷേപമിടാന്‍ ചുരുങ്ങിയ കാലയളവ് 12 മാസവും പരമാവധി 120 മാസവുമാണ്. മാസത്തില്‍ 100 രൂപ മുതല്‍ നിക്ഷേപിക്കാന്‍ സാധിക്കും.

സ്ഥിര നിക്ഷേപത്തിന് ലഭിക്കുന്ന പലിശ നിരക്ക് തന്നെയാണ് ആവര്‍ത്തന നിക്ഷേപത്തിനും ലഭിക്കുന്നത്. 6.80 ശതമാനം മുതല്‍ 7 ശതമാനം പലിശയാണ് സാധാരണ നിക്ഷേപകര്‍ക്ക് എസ്ബിഐ നല്‍കുന്നത്.

മുതിര്‍ന്ന പൗരന്മാരാണെങ്കില്‍ 7.30 ശതമാനം മുതല്‍ 7.50 ശതമാനം വരെ പലിശ ലഭിക്കും.

കൊട്ടക് മഹീന്ദ്ര ബാങ്ക്

കൊട്ടക് മഹീന്ദ്ര ബാങ്കില്‍ 6 മാസം മുതല്‍ 120 മാസസത്തേക്ക് ആവര്‍ത്തന നിക്ഷേപം ആരംഭിക്കാം. സാധാരണ നിക്ഷേപകര്‍ക്ക് 6 ശതമാനം മുതല്‍ 7.20 ശതമാനം വരെ പലിശ ലഭിക്കും.

ഇവിടെ മുതിര്‍ന്ന പൗരന്മാര്‍ക്ക് 6.50 ശതമാനം മുതല്‍ 7.70 ശതമാനം വരെ പലിശ ലഭിക്കും.

ഐസിഐസിഐ ബാങ്ക്

ഐസിഐസിഐ ബാങ്കില്‍ 6 മാസമാണ് ആവര്‍ത്തന നിക്ഷേപത്തിന്റെ ചുരുങ്ങിയ കാലയളവ്. 3 മാസത്തിന്റെ ഗുണിതങ്ങളായി കാലാവധി 120 മാസം വരെ ഉയര്‍ത്താം.

സാധരാണ നിക്ഷേപകര്‍ക്ക് 4.75 ശതമാനം മുതല്‍ 7.10 ശതമാനം വരെയും മുതിര്‍ന്ന പൗരന്മാര്‍ക്ക് 5.25 ശതമാനം മുതല്‍ 7.50 ശതമാനം വരെയുമാണ് പലിശ നിരക്ക്. 

എച്ച്ഡിഎഫ്‌സി ബാങ്ക്

എച്ച്ഡിഎഫ്‌സി ബാങ്ക് 6 മാസം മുതല്‍ 120 മാസത്തേക്ക് ആവര്‍ത്തന നിക്ഷേപം സ്വീകരിക്കും. സാധാരണ നിക്ഷേപകര്‍ക്ക് 4.50 ശതമാനം മുതല്‍ 7 ശതമാനം വരെ പലിശ ലഭിക്കും.

മുതിര്‍ന്ന പൗരന്മാര്‍ക്ക് 5 ശതമാനം മുതല്‍ 7.75 ശതമാനം പലിശ ലഭിക്കും. 

പോസ്റ്റ് ഓഫീസ്

പോസ്റ്റ് ഓഫീസ് ആവര്‍ത്തന നിക്ഷേപങ്ങളുടെ കാലാവധി 5 വര്‍ഷമാണ്. ഇതിന് 5.8 ശതമാനം പലിശയാണ് ലഭിക്കുന്നത്.

സാമ്പത്തിക വര്‍ഷത്തിന്റെ എല്ലാ പാദങ്ങളിലും പലിശ നിരക്ക് കേന്ദ്ര സര്‍ക്കാര്‍ പുനഃപരിശോധിക്കാറുണ്ട്. നിക്ഷേപം 3 വര്‍ഷം പൂര്‍ത്തിയായാല്‍ പിന്‍വലിക്കാന്‍ അനുവദിക്കും. 

യെസ് ബാങ്ക് ആവര്‍ത്തന നിക്ഷേപം

6 മാസം മുതല്‍ 10 വര്‍ഷത്തേക്കുള്ള ആവര്‍ത്തന നിക്ഷേപത്തിന് യെസ് ബാങ്ക് 6 ശതമാനം മുതല്‍ 7.50 ശതമാനം പലിശ ലഭിക്കും. മുതിര്‍ന്ന പൗരന്മാര്‍ക്ക് 6.50 ശതമാനം മുതല്‍ 8 ശതമാനം വരെ പലിശ ലഭിക്കും.

പഞ്ചാബ് നാഷണല്‍ ബാങ്ക് ആവര്‍ത്തന നിക്ഷേപം

6 മാസം മുതല്‍ 10 വര്‍ഷത്തേക്ക് പഞ്ചാബ് നാഷണല്‍ ബാങ്ക് ആവര്‍ത്തന നിക്ഷേപത്തിന് 5.5 ശതമാനം മുതല്‍ 7.25 ശതമാനം പലിശ ലഭിക്കും. മുതിര്‍ന്ന പൗരന്മാര്‍ക്ക് 6 ശതമാനം മുതല്‍ 7.50 ശതമാനം പലിശ ലഭിക്കും.