സർക്കാരിൻ്റെ സ്ത്രീ സുരക്ഷാ പദ്ധതി എത്തി: എല്ലാ മാസവും 1,000 രൂപ കിട്ടും, ആർക്കെല്ലാം അപേക്ഷിക്കാം?

സ്ത്രീകളുടെ സാമ്പത്തിക സുരക്ഷ ഉറപ്പാക്കുന്ന സംസ്ഥാന സർക്കാരിൻ്റെ ഏറ്റവും പുതിയ പദ്ധതിയാണ് സ്ത്രീ സുരക്ഷാ പദ്ധതി. കേരളത്തിലെ സ്ത്രീകൾക്ക് പ്രതിമാസം 1,000 രൂപ പെൻഷൻ വാ​ഗ്ദാനം ചെയ്യുന്ന സ്കീമാണിത്. സംസ്ഥാന തദ്ദേശ തെരഞ്ഞെടുപ്പിന് മുൻപായി നവംബറിൽ ഈ പദ്ധതി പ്രഖ്യാപിച്ചിരുന്നു. എന്നാൽ തദ്ദേശ തെരഞ്ഞെടുപ്പുമായി ബന്ധപ്പെട്ട പെരുമാറ്റച്ചട്ടം നിലവിൽ വന്നതിനാൽ നടപ്പിലാക്കാൻ അൽപം താമസം വന്നു. ഇന്ന് ഡിസംബർ 22 മുതലാണ് ഈ പ​ദ്ധതിയിലേക്കുള്ള അപേക്ഷ സമർപ്പിക്കുന്നത് ആരംഭിച്ചത്.

കേരളത്തിൽ സ്ഥിരതാമസമാക്കിയ സ്ത്രീകൾക്കാണ് ഈ പദ്ധതിയിൽ അപേക്ഷിക്കാൻ സാധിക്കുകയുള്ളൂ. നിങ്ങൾ കേരളത്തിന് പുറത്തേക്ക് താമസം മാറുകയോ കേന്ദ്ര, സംസ്ഥാന, സ്വയംഭരണ സ്ഥാപനം അല്ലെങ്കിൽ ഗ്രാന്റ്-ഇൻ-എയ്ഡ് സ്ഥാപനത്തിലോ സ്കീമിലോ സ്ഥിരമായോ താൽക്കാലികമായോ ആയ ജോലി ലഭിക്കുകയോ ചെയ്താൽ ഈ പദ്ധതിക്ക് അർഹതയുണ്ടായിരിക്കില്ല.

35 നും 60 നും ഇടയിൽ പ്രായമുള്ള സ്ത്രീകളും ട്രാൻസ് സ്ത്രീകളും സ്ത്രീ സുരക്ഷേ പദ്ധതിയിൽ അപേക്ഷിക്കാം. വിധവ, അവിവാഹിതരായ സ്ത്രീകൾ, വികലാംഗ പെൻഷൻ, സാമൂഹ്യക്ഷേമ പെൻഷൻ, സർവീസ് കുടുംബ പെൻഷൻ, ക്ഷേമനിധി ബോർഡുകളിൽ നിന്നുള്ള പെൻഷൻ, ഇപിഎഫ് പെൻഷൻ തുടങ്ങിയ മറ്റ് ക്ഷേമ പദ്ധതികളിൽ അം​ഗമായവർക്ക് ഈ പദ്ധതിയ്ക്ക് അർഹതയില്ല. നിങ്ങൾക്ക് മഞ്ഞ റേഷൻ കാർഡ്, പിങ്ക് റേഷൻ കാർഡ് എന്നിവയിൽ ഏതെങ്കിലും ഒന്നുണ്ടെങ്കിൽ ഈ സ്കീമിൽ അപേക്ഷിക്കാൻ സാധിക്കും.

അപേക്ഷയ്ക്ക് ഏതൊക്കെ രേഖകൾ വേണം?

• നിങ്ങൾ കേരളത്തിലെ സ്ഥിര താമസക്കാരനാണെന്ന് സ്ഥിരീകരിക്കുന്ന ഒരു രേഖ.
• ജനന സർട്ടിഫിക്കറ്റ്, സ്കൂൾ സർട്ടിഫിക്കറ്റ്, ഡ്രൈവിംഗ് ലൈസൻസ്, പാസ്‌പോർട്ട് തുടങ്ങിയ രേഖകൾ പ്രായം തെളിയിക്കാൻ സമർപ്പിക്കാം. മറ്റ് രേഖകളൊന്നും ലഭ്യമല്ലെങ്കിൽ, സ്വയം സാക്ഷ്യപ്പെടുത്തിയ അപേക്ഷയോടൊപ്പം ഒരു ഡോക്ടറുടെ മെഡിക്കൽ സർട്ടിഫിക്കറ്റും ഹാജരാക്കാം.
• ബാങ്ക് വിവരങ്ങൾ സമർപ്പിക്കണം.
• ആധാർ വിവരങ്ങൾ സമർപ്പിക്കണം.
• അന്ത്യോദയ അന്ന യോജന (AAY - മഞ്ഞ കാർഡ്) അല്ലെങ്കിൽ മുൻഗണനാ കുടുംബം (PHH - പിങ്ക് കാർഡ്) എന്നീ കാർഡുകൾ ഉള്ളവർ ഇവ സമർപ്പിക്കണം. മറ്റു റേഷൻ കാർഡ് ഉടമകൾക്ക് ഈ സ്കീമിൽ അപേക്ഷിക്കാൻ യോ​ഗ്യതയില്ല.
• അപേക്ഷയോടൊപ്പം സ്വയം സാക്ഷ്യപ്പെടുത്തിയ ഒരു സത്യവാങ്മൂലം കൂടി ഉൾപ്പെടുത്തണം.

വയസായാലും പണത്തിന് ബുദ്ധിമുട്ടില്ല, ഇതാ 5 നിക്ഷേപ പദ്ധതികൾ, എല്ലാമാസവും മികച്ച വരുമാനം ഉറപ്പാക്കാം

അപേക്ഷിക്കാനുള്ള പ്രക്രിയ

1) ksmart.lsgkerala.gov.in എന്ന വെബ്സൈറ്റ് വഴി പൂരിപ്പിച്ച അപേക്ഷ തദ്ദേശ സ്വയംഭരണ സ്ഥാപനത്തിന്റെ സെക്രട്ടറിക്ക് സമർപ്പിക്കണം .

2) സമർപ്പിച്ച ശേഷം എൽഎസ്ജിഐ സെക്രട്ടറിമാർ അപേക്ഷകൾ പരിശോധിച്ച് തിരഞ്ഞെടുത്ത ആളുകളുടെ പട്ടിക കേരള സോഷ്യൽ സെക്യൂരിറ്റി പെൻഷൻ കമ്പനിക്ക് അയയ്ക്കും.

ക്ഷേമ പെൻഷൻ വിതരണ മാതൃകയ്ക്ക് സമാനമായി, സോഷ്യൽ സെക്യൂരിറ്റി പെൻഷൻ കമ്പനി ഗുണഭോക്താക്കളുടെ അക്കൗണ്ടുകളിലേക്ക് നേരിട്ട് തുക കൈമാറുമെന്നാണ് സർക്കാർ വ്യക്തമാക്കിയിരിക്കുന്നത്. ഈ സ്കീമിന് അപേക്ഷിക്കുമ്പോൾ തട്ടിപ്പ് നടത്തുന്നവർക്കും പണി കിട്ടും. അതായത് നൽകിയത് തെറ്റായ വിവരങ്ങളാണെന്ന് കണ്ടെത്തിയാൽ 18 ശതമാനം പലിശ സഹിതം തുക തിരിച്ചുപിടിക്കും.