21-ാം വയസില്‍ മകളുടെ പേരില്‍ 69 ലക്ഷത്തിന്റെ സമ്പാദ്യം; റിസ്‌കെടുക്കാതെ നിക്ഷേപിച്ച് തുടങ്ങാം; പദ്ധതിയിതാ

മക്കളുടെ വിദ്യാഭ്യാസം, ആരോ​ഗ്യ ചെലവുകൾക്ക് വലിയ പ്രാധാന്യം നൽകുന്ന രക്ഷിതാക്കളാണ് ഇന്നത്തെ കാലത്ത്. മക്കളുടെ കാര്യങ്ങൾക്കായി പണം ചെലവാക്കുന്നതിലും ഈ തലമുറ മടിക്കുന്നില്ല. ഇവിടെ മക്കൾക്കായി, അവരുടെ ഭാവി മുന്നിൽ കണ്ടുള്ള പ്രത്യേക നിക്ഷേപങ്ങൾ ആരംഭിക്കുന്നത് വഴി നല്ല സമ്പാദ്യം ഉണ്ടാക്കിയെടുക്കാൻ സാധിക്കും. റിസ്കെടുക്കാതെ മികച്ച റിട്ടേൺ നൽകുന്നൊരു സ്കീം തിരയുകയാണെങ്കിൽ സുകന്യ സമൃദ്ധി യോജന നോക്കാം. 

സുകന്യ സമൃദ്ധി യോജന

കേന്ദ്ര സര്‍ക്കാര്‍ നടപ്പിലാക്കുന്ന ലഘു സമ്പാദ്യ പദ്ധതിയില്‍ ഉള്‍പ്പെടുന്നൊരു നിക്ഷേപ പദ്ധതിയാണ് സുകന്യ സമൃദ്ധി യോജന. ബേട്ടി ബച്ചാവോ ബേട്ടി പഠാവോ പദ്ധതിയുടെ ഭാഗമായാണ് സുകന്യ സമൃദ്ധി യോജന ആരംഭിക്കുന്നത്. പെണ്‍കുട്ടികളുടെ ഭാവി സാമ്പത്തിക ആവശ്യങ്ങള്‍ക്കായി മികച്ച റിട്ടേണോടെ നികുതി രഹിതമായി നിക്ഷേപിക്കാന്‍ പദ്ധതിയിലൂടെ സാധിക്കും. പോസ്റ്റ് ഓഫീസ് ലഘു സമ്പാദ്യ പദ്ധതിയിൽ ഉൾപ്പെടുന്ന പദ്ധതി 2015 ലാണ് ആരംഭിക്കുന്നത്.

അക്കൗണ്ട്

10 വയസിന് താഴെയുള്ള പെണ്‍കുട്ടിയുടെ പേരില്‍ രക്ഷിതാക്കള്‍ക്ക് സുകന്യ സമൃദ്ധി യോജന അക്കൗണ്ട് ആരംഭിക്കാം. ഒരു രക്ഷിതാവിന് 2 പെണ്‍കുട്ടികളുടെ പേരില്‍ മാത്രമെ അക്കൗണ്ട് ആരംഭിക്കാന്‍ സാധിക്കുകയുള്ളൂ. ഇതിനായി പോസ്റ്റ് ഓഫീസ്, ദേശസാത്കൃത ബാങ്ക്, തിരഞ്ഞെടുത്ത സ്വകാര്യ ബാങ്ക് എന്നിവയെ സമീപിക്കാം. 18 വയസ് പൂർത്തിയായാൽ അക്കൗണ്ടിന്റെ ഉടമസ്ഥാവകാശം പെൺകുട്ടിക്ക് ലഭിക്കും. 

നിക്ഷേപം

കുറഞ്ഞത് 250 രൂപയും പരമാവധി 1.50 ലക്ഷം രൂപ വരെയുമാണ് സുകന്യ സമൃദ്ധി യോജനയില്‍ 1 വര്‍ഷത്തില്‍ നിക്ഷേപിക്കാന്‍ സാധിക്കുക. പദ്ധതിയില്‍ നകിക്ഷേപിക്കുന്ന തുകയും പലിശ വരുമാനവും പൂര്‍ണമായും നികുതി മുക്തമാണ്. സാമ്പത്തിക വർഷത്തിൽ ചുരുങ്ങിയ നിക്ഷേപം നടത്താതിരുന്നാൽ 50 രൂപ പിഴ ഈടാക്കുകയും അക്കൗണ്ട് അവസാനിപ്പിക്കുകയും ചെയ്യും. 15 വർഷത്തിനുള്ളിൽ അക്കൗണ്ട് തിരിച്ചെടുക്കാൻ അവസരമുണ്ട്. 50 രൂപ പിഴയടച്ച് 250 രൂപ നിക്ഷേപിച്ചാൽ അക്കൗണ്ട് പുനഃസ്ഥാപിക്കാം.

പലിശ

2024 സാമ്പത്തിക വര്‍ഷത്തിന്റെ ജൂലായ്- സെപ്റ്റംബര്‍ പാദത്തില്‍ 8 ശതമാനമാണ് സുകന്യ സമൃദ്ധി യോജനയ്ക്ക് ലഭിക്കുന്ന പലിശ നിരക്ക്. കേന്ദ്ര സര്‍ക്കാര്‍ ഓരോ ത്രൈമാസത്തിലും പലിശ നിരക്ക് അവലോകനം ചെയ്ത് പുതുക്കാറുണ്ട്. അതാത് സമയത്തെ പലിശ നിരക്കാണ് നിക്ഷേപത്തിന് ലഭിക്കുക.

കാലാവധി

അക്കൗണ്ട് ആരംഭിച്ച ദിവസം മുതല്‍ 21 വര്‍ഷമാണ് പദ്ധതിയുടെ കാലാവധി. ദീര്‍ഘകാലമാണ് സുകന്യ സമൃദ്ധി യോജനയുടെ കാലയളവ്. ഇതില്‍ 15 വര്‍ഷം നിക്ഷേപം നടത്തണം. 18 വയസ് പൂര്‍ത്തിയായി പെണ്‍കുട്ടിയുടെ വിവാഹം നടക്കുമ്പോള്‍ അക്കൗണ്ട് കാലാവധി എത്തിയതായി കണക്കാക്കും.

കാൽക്കുലേറ്റർ

പെണ്‍കുട്ടി ജനിച്ചയുടനെ സുകന്യ സമൃദ്ധി യോജനയില്‍ അക്കൗണ്ടെടുക്കുകയാണെങ്കില്‍ 21-ാം വയസില്‍ 67 ലക്ഷം രൂപ കുട്ടിയുടെ പേരില്‍ സമ്പാദ്യമുണ്ടാകും. വര്‍ഷത്തില്‍ പരമാവധി നിക്ഷേപമായ 1.50 ലക്ഷം രൂപയാണ് ഇതിനായി നിക്ഷേപിക്കേണ്ടത്. മാസത്തില്‍ നിക്ഷേപിക്കുന്നവര്‍ 12500 രൂപയാണ് നിക്ഷേപിക്കേണ്ടത്. 8 ശതമാനം പലിശ നിരക്കില്‍ 21 വര്‍ഷ കാലയളവില്‍ നിക്ഷേപം വളര്‍ന്ന് 67 ലക്ഷം രൂപയാകും.

15 വര്‍ഷത്തേക്ക് 1.50 ലക്ഷം രൂപ വീതം നിക്ഷേപിച്ചാല്‍ 22.50 ലക്ഷം രൂപയാണ് നിക്ഷേപിച്ച തുക. ഈ തുകയ്ക്ക് 21 വര്‍ഷത്തേക്ക് പലിശ ലഭിക്കും. ഇന്നത്തെ 8 ശതമാനം പലിശ തുടർന്നും ലഭിച്ചാൽ 47,30,097 രൂപയാണ് പലിശയായി ലഭിക്കുന്നത്. കാലാവധിയില്‍ 69,80,093 രൂപ നേടാം. 2023 ല്‍ അക്കൗണ്ട് ആരംഭിച്ചൊരാള്‍ ഈ തുക നേടാന്‍ 2044 വരെ കാത്തിരിക്കണം.