പലിശയിൽ ഞെട്ടിച്ചു; 5 വർഷ എഫ്ഡിക്ക് 9.60% പലിശ നേടാം; 3 ലക്ഷം നിക്ഷേപിച്ചാൽ കാലാവധിയിൽ എത്ര ലഭിക്കും

ബാങ്ക് നിക്ഷേപങ്ങളുടെ പലിശ നിരക്ക് നോക്കുമ്പോൾ നിരക്കുകൾ ഉയർന്ന് നിൽക്കുന്ന ഈ കാലത്ത് ഏറ്റവും ഉയർന്ന പലിശ നൽകുന്നത് സ്മോൾ ഫിനാൻസ് ബാങ്കുകളാണ്. പൊതുമേഖലാ, സ്വകാര്യ മേഖലാ ബാങ്കുകളെക്കാൾ ഉയർന്ന പലിശ താരതമ്യേന പുതുമുഖ ബാങ്കുകൾ നൽകും. സ്മോൾ ഫിനാൻസ് ബാങ്കുകൾ ധനസമാഹരണത്തിന് വേണ്ടിയാണ് ഉയർന്ന പലിശ നൽകി നിക്ഷേപങ്ങൾ ആകർഷിക്കുന്നത്.

അതോടൊപ്പം, റിസർവ് ബാങ്ക് അം​ഗീകാരമുള്ളവയായതിനാൽ നിക്ഷേപത്തിന് സുരക്ഷിതത്വവും സ്മോൾ ഫിനാൻസ് ബാങ്കുകളിൽ നിന്ന് ലഭിക്കും. ഇവയിൽ ഏറ്റവും മികച്ച പലിശ ലഭിക്കുന്ന ബാങ്കാണ് സൂര്യോദയ് സ്‌മോൾ ഫിനാൻസ് ബാങ്ക്.

സൂര്യോദയ് സ്മോൾ ഫിനാൻസ് ബാങ്ക്

2 കോടി രൂപയിൽ താഴെയുള്ള സ്ഥിര നിക്ഷേപങ്ങളുടെ പലിശ നിരക്ക് ബാങ്ക് ഈയിടെ പരിഷ്‌കരിച്ചിരുന്നു. 7 ദിവസം മുതൽ 10 വർഷം വരെ കാലാവധിയിൽ റെ​ഗുലർ നിക്ഷേപകർക്ക് 4 ശതമാനം മുതൽ 7.25 ശതമാനം വരെയും മുതിർന്ന പൗരന്മാർക്ക് 4.50 ശതമാനം മുതൽ 7.75 ശതമാനം വരെയും പലിശ ലഭിക്കും. 5 വർഷ കാലാവധിയുള്ള ടാക്സ് സേവിം​ഗ് സ്ഥിര നിക്ഷേപങ്ങൾക്കും ഏറ്റവും മികച്ച പലിശ നൽകുന്നതും സൂര്യോദയ് ബാങ്കാണ്.

റെ​ഗുലർ നിക്ഷേപകർക്ക് 9.10 ശതമാനവും മുതിർന്ന പൗരന്മാർക്ക് 9.60 ശതമാനം പലിശയും ലഭിക്കും. 5 വർഷത്തേക്കുള്ള സാധരാണ നിക്ഷേപങ്ങൾക്കും 9.10 ശതമാനം മുതൽ 9.60 ശതമാനം വരെ പലിശ നിരക്ക് സൂര്യോദയ് സ്മോൾ ഫിനാൻസ് ബാങ്ക് നൽകുന്നുണ്ട്.

മറ്റു കാലയളവിലെ നിരക്കുകൾ

7 മുതൽ 14 ദിവസ കാലാവധിയുള്ള ഹ്രസ്വകാല നിക്ഷേപത്തിന് 4 ശതമാനം പലിശ നൽകും.15 മുതൽ 45 ദിവസം വരെ 4.25%, 46 ദിവസം മുതൽ 90 ദിവസം വരെ 4.50%, 91 ദിവസം മുതൽ 6 മാസം വരെ 5% എന്നിങ്ങനെയാണ് സൂര്യോദയ് സ്മോൾ ഫിനാൻസ് ബാങ്കിൽ നിന്ന് പലിശ ലഭിക്കും.

6 മുതൽ 9 മാസം വരെ 5.50%, 9 മുതൽ 1 വർഷം വരെ 6% എന്നിങ്ങനെ പലിശ ലഭിക്കും. 1 വർഷത്തേക്ക് 6.85 ശതമാനം പലിശ നൽകും. 1 വർഷം മുതൽ 15 മാസം വരെ 8.25%, 15 മാസം മുതൽ 2 വർഷം വരെ 8.50%, 2 മുതൽ 3 വർഷം വരെ 8.60%, 3 മുതൽ 5 വർഷത്തിൽ താഴെ 6.75 ശതമാനം എന്നിങ്ങനെ പലിശ ലഭിക്കും.

5 വർഷം കാലാവധി പൂർത്തിയാകുമ്പോൾ 9.10 ശതമാനം പലിശ ലഭിക്കും. 5 മുതൽ 10 വർഷം വരെയുള്ള കാലയളവിൽ 7.25 ശതമാനം പലിശ നേടാം.

3 ലക്ഷം രൂപ നിക്ഷേപിച്ചാൽ

9.10 ശതമാനം ഉറപ്പുള്ള റിട്ടേൺ 5 വർഷത്തേക്ക് ലഭിക്കുമ്പോൾ നിക്ഷേപിക്കുന്ന തുകയ്ക്ക് നല്ല വരുമാനം ഉണ്ടാക്കാൻ സാധിക്കും. 3 ലക്ഷം രൂപ നിക്ഷേപിച്ചാൽ 5-ാം വർഷത്തിൽ 4,70,447 രൂപ ലഭിക്കും. 1,70,447 രൂപയാണ് പലിശയായി ലഭിക്കുന്നത്. 9.60 ശതമാനം പലിശയിൽ മുതിർന്ന പൗരന്മാർക്ക് 3 ലക്ഷം രൂപയുടെ നിക്ഷേപത്തിൽ നിന്ന് 4,82,081 രൂപ നേടാൻ സാധിക്കും.

പണം പൂർണമായും സുരക്ഷിതം

സൂര്യോദയ് സ്മോൾ ഫിനാൻസ് ബാങ്കിന് റിസർവ് ബാങ്ക് ഓഫ് ഇന്ത്യ സബ്സിഡിയറിയായ ഡെപ്പോസിറ്റ് ഇൻഷൂറൻസ് ആൻഡ് ക്രെഡിറ്റ് ​ഗ്യാരണ്ടി കോർപ്പറേഷന്റെ ഇൻഷൂറൻസ് പരിരക്ഷ ലഭിക്കും. 5 ലക്ഷം രൂപ വരെയാണ് ഇൻഷൂർ ചെയ്യപ്പെടുക. നിക്ഷേപും പലിശയും അടക്കമാണ് 5 ലക്ഷം. 3 ലക്ഷം രൂപ 5 വർഷത്തേക്ക് നിക്ഷേപിച്ചാൽ പൂർണമായും സുരക്ഷിതമായിരിക്കും.