8.25% പലിശയുമായി യെസ് ബാങ്ക്; സെപ്റ്റംബറില്‍ സ്ഥിര നിക്ഷേപ പലിശ പുതുക്കി 4 ബാങ്കുകള്‍; നോക്കുന്നോ

രാജ്യത്തെ മുന്‍നിര ബാങ്കുകളായ എസ്ബിഐ, എച്ച്ഡിഎഫ്‌സി ബാങ്ക്, ഐസിഐസിഐ ബാങ്ക് എന്നിവ സമീപ കാലത്ത് സ്ഥിര നിക്ഷേപ പലിശ നിരക്കുകള്‍ മാറ്റം വരുത്തിയിട്ടില്ല. റിസര്‍വ് ബാങ്ക് റിപ്പോ നിരക്കില്‍ മാറ്റമില്ലാതെ തുടരുന്ന സാഹചര്യത്തില്‍ സ്ഥിര നിക്ഷേപ പലിശ നിരക്ക് കുറയാന്‍ തുടങ്ങുമെന്നാണ് സാമ്പത്തിക വിദഗ്ധര്‍ നല്‍കുന്ന സൂചന.

ഒക്ടോബര്‍ നാലാം തീയതി മുതല്‍ 6 വരെയാണ് ആര്‍ബിഐയുടെ അടുത്ത പണ നയ അവലോകന യോഗം നടക്കുന്ന്ത്. ഇതിലെ തീരുമാനം സ്ഥിര നിക്ഷേപ പലിശയെ സ്വാധീനിക്കാന്‍ സാധ്യതയുണ്ട്. സെപ്റ്റംബര്‍ മാസത്തില്‍ നാല് ബാങ്കുകളാണ് ഇതുവരെ സ്ഥിര നിക്ഷേപ പലിശ നിരക്കുകള്‍ മാറ്റം വരുത്തിയത്. ഇവ ഏതെല്ലാമെന്ന് വിശദമായി പരിശോധിക്കാം.

ഐഡിബിഐ ബാങ്ക്

ഐഡിബിഐ ബാങ്കിന്റെ പുതുക്കിയ സ്ഥിര നിക്ഷേപ പലിശ നിരക്കുകള്‍ സെപ്റ്റംബര്‍ 15 മുതലാണ് നിലവില്‍ വന്നത്. റെഗുലര്‍ നിക്ഷേപകര്‍ക്ക് 7 ദിവസം മുതല്‍ 10 വര്‍ഷത്തേക്ക് 3 ശതമാനം മുതല്‍ 6.80 ശതമാനം വരെ പലിശ ലഭിക്കും.മുതിര്‍ന്ന പൗരന്മാര്‍ക്ക് 3.50 ശതമാനം മുതല്‍ 7.30 ശതമാനമാണ് പലിശ നിരക്ക്.

ഐഡിബിഐ ബാങ്കിന്റെ പ്രത്യേക സ്ഥിര നിക്ഷേപ പദ്ധതികളാണ് 444, 375 ദിവസ കാലാവധിയുള്ള അമൃത് മഹോത്സം എഫ്ഡി. 444 ദിവസത്തേക്ക് 7.15 ശതമാനം പലിശയും 375 ദിവസത്തേക്ക് 7.10 ശതമാനം പലിശയും ലഭിക്കും. മുതിര്‍ന്ന പൗരന്മാര്‍ക്ക് 0.50 ശതമാനം അധിക നിരക്കും ലഭിക്കും.

ആക്‌സിസ് ബാങ്ക്

ആക്‌സിസ് ബാങ്ക് 2 കോടി രൂപ വരെയുള്ള തിരഞ്ഞെടുത്ത കാലാവധിയുള്ള സ്ഥിര നിക്ഷേപങ്ങളുടെ പലിശ നിരക്ക് 0.50 ശതമാനം വരെ കുറയ്ക്കുകയാണ് ചെയ്തത്. സെപ്റ്റംബര്‍ 15 മുതല്‍ സ്ഥിര നിക്ഷേപ പലിശ നിരക്കുകള്‍ നിലവില്‍ വന്നു. 7 ദിവസം മുതല്‍ 10 വര്‍ഷത്തേക്ക് 3 ശതമാനം മുതല്‍ 7.10 ശതമാനം വരെയാണ് ആക്‌സിസ് ബാങ്കിന്റെ പലിശ നിരക്ക്.

7 ദിവസം മുതല്‍ 29 ദിവസത്തേക്ക് 3.50 ശതമാനത്തില്‍ നിന്ന് 3 ശതമാനമാക്കി പലശ കുറച്ചു. 46-60 ദിവസത്തേക്ക് 0.25 ശതമാനം കുറച്ച് 4 ശതമാനമാക്കി.

കൊട്ടക് മഹീന്ദ്ര ബാങ്ക്

2 കോടിക്ക് താഴെയുള്ള സ്ഥിര നിക്ഷേപങ്ങളുടെ പലിശ നിരക്കാണ് കൊട്ടക് മഹീന്ദ്ര ബാങ്ക് പുതുക്കിയത്. 7 ദിവസം മുതല്‍ 10 വര്‍ഷത്തേക്ക് റെഗുലര്‍ നിക്ഷേപകര്‍ക്ക് 2.75 ശതമാനം മുതല്‍ 7.25 ശതമാനം പലിശയും മുതിര്‍ന്ന പൗരന്മാര്‍ക്ക് 3.25 ശതമാനവും 7.75 ശതമാനം പലിശയും ലഭിക്കും. 23 മാസത്തേക്കുള്ള സ്ഥിര നിക്ഷേപത്തിന് 0.25 ശതമാനം പലിശയാണ് വര്‍ധിപ്പിച്ചത്.

7 ശതമാനത്തില്‍ നിന്ന് 7.20 ശതമാനമായി മാറി. സെപ്റ്റംബര്‍ 13 മുതല്‍ പുതുക്കിയ നിരക്ക് നിലവില്‍ വന്നു. ഏറ്റവും ഉയർന്ന നിരക്കായ 7.25 ശതമാനം പലിശ 23 മാസത്തേക്കാണ് ലഭിക്കുന്നത്.

യെസ് ബാങ്ക്

യെസ് ബാങ്കില്‍ 2 കോടിക്ക് താഴെയുള്ള സ്ഥിര നിക്ഷേപത്തിന് 3.25 ശതമാനം മുതല്‍ 7.75 ശതമാനം പലിശ ലഭിക്കും. 3.75 ശതമാനം മുതല്‍ 8.25 ശതമാനം പലിശ മുതിര്‍ന്ന പൗരന്മാര്‍ക്കും ലഭിക്കും. സെപ്റ്റംബര്‍ നാല് മുതല്‍ പുതുക്കിയ നിരക്ക് നിലവില്‍ വന്നു.

18 മാസം മുതൽ 24 മാസത്തിൽ താഴ്ന്ന കാലാവധിയിൽ റെ​ഗുലർ നിക്ഷേപകർക്ക് 7.75 ശതമാനം എന്ന ഉയർന്ന പലിശ നിരക്ക് ലഭിക്കും. 60 മാസത്തേക്ക് മുതിർന്ന പൗരന്മാർക്ക് 8 ശതമാനം പലിശ ലഭിക്കും.