ഈ 6 ബാങ്കുകളില്‍ മുതിര്‍ന്ന പൗരന്മാര്‍ക്ക് പരിഗണന; ഹ്രസ്വകാലത്തേക്ക് 8.50% വരെ പലിശ; നോക്കുന്നോ

കഴിഞ്ഞ മാസങ്ങളിലായി സ്ഥിര നിക്ഷേപത്തിന് പലിശ നിരക്ക് ഉയര്‍ന്നു കൊണ്ടിരിക്കുകയാണ്. റിസര്‍വ് ബാങ്കിന്റെ റിപ്പോ നിരക്ക് വര്‍ധനവ് നിക്ഷേപകര്‍ക്ക് യഥാര്‍ഥത്തില്‍ ഗുണകരമായി. പലിശ നിരക്ക് വര്‍ധനവില്‍ ഏറ്റവും നേട്ടമുണ്ടാക്കിയത് മുതിര്‍ന്ന പൗരന്മാരാണ്. 8.50 ശതമാനം വരെ പലിശ മുതിര്‍ന്ന പൗരന്മാര്‍ക്ക് ലഭിക്കുന്നുണ്ട്. മൂന്ന് വര്‍ഷം വരെയുള്ള ഹ്രസ്വകാലത്തേക്ക് മുതിര്‍ന്ന പൗരന്മാര്‍ക്ക് മികച്ച പലിശ നല്‍കുന്ന 6 ബാങ്കുകളെയാണ് ഈ ലേഖനത്തില്‍ വിശദമാക്കുന്നത്.

ഡിസിബി ബാങ്ക്

മുംബൈ ആസ്ഥാനമായി പ്രവര്‍ത്തിക്കുന്ന സ്വകാര്യ ബാങ്കായ ഡിസിബി ബാങ്ക് 8.50 ശതമാനം പലിശ മുതിര്‍ന്ന പൗരന്മാര്‍ക്ക് നല്‍കും. 2 കോടിക്ക് താഴെയുള്ള 15 മാസത്തിനും 24 മാസത്തിനും ഇടയിലുള്ള നിക്ഷേപങ്ങള്‍ക്കാണ് ഡിസിബി ബാങ്ക് ഈ പലിശ നിരക്ക് നല്‍കുന്നത്. നിരക്കുകള്‍ മാര്‍ച്ച് 10 മുതല്‍ നിലവില്‍ വന്നു.

ബന്‍ഡന്‍ ബാങ്ക്

ബന്‍ഡന്‍ ബാങ്ക് മുതിര്‍ന്ന പൗരന്മര്‍ക്ക് 8.50 ശതമാനം പലിശ നല്‍കുന്ന ബാങ്കാണ്. 600 ദിവസത്തെ കാലാവധിയുള്ള (1 വര്‍ഷം 7 മാസം 20 ദിവസം) സ്ഥിര നിക്ഷേപത്തിനാണ് 8.50 ശതമാനം പലിശ ലഭിക്കുന്നത്. ഫെബ്രുവരി 6ന് പുതുക്കിയ നിരക്കാണിത്.

ആര്‍ബിഎല്‍ ബാങ്ക്

15 മാസം മുതല്‍ 23 മാസത്തേക്കുള്ള സ്ഥിര നിക്ഷേപത്തിന് ആര്‍ബിഎല്‍ ബാങ്കില്‍ നിന്ന് 8.30 ശതമാനം പലിശ നേടാം. ഫെബ്രുവരി 1 മുതലാണ് ആര്‍ബിഎല്‍ ബാങ്ക് ഈ പലിശ നിരക്ക് നല്‍കുന്നത്. 

ഐഡിഎഫ്‌സി ഫസ്റ്റ് ബാങ്ക്

8.25 ശതമാനം പലിശയാണ് ഐഡിഎഫ്‌സി ഫസ്റ്റ് ബാങ്കില്‍ മുതിര്‍ന്ന പൗരന്മാര്‍ക്ക് ലഭിക്കുന്ന ഉയര്‍ന്ന നിരക്ക്. 2 കോടിക്ക് താഴെയുള്ള 18 മാസം 1 ദിവസത്തിനും 3 വര്‍ഷത്തിനും ഇടയിലുള്ള സ്ഥിരനിക്ഷേപത്തിനാണ് ഈ പലിശ നിരക്ക് നല്‍കുന്നത്.

ഇന്‍ഡസ്ഇന്‍ഡ് ബാങ്ക്

8.25 ശതമാനം പലിശയാണ് ഇന്‍ഡസ്ഇന്‍ഡ് ബാങ്കും നല്‍കുന്നത്. 1 വര്‍ഷം 6 മാസത്തിനും 2 വര്‍ഷം 9 മാസത്തിനും ഇടയിലുള്ള സ്ഥിര നിക്ഷേപത്തിനാണ് ഇന്‍ഡസ്ഇന്‍ഡ് ബാങ്ക് ഈ പലിശ നിരക്ക് നല്‍കുന്നത്. മാര്‍ച്ച് 22 മുതല്‍ പലിശ നിരക്ക് നിലവില്‍ വന്നു.

ആക്‌സിസ് ബാങ്ക്

ആക്‌സിസ് ബാങ്കില്‍ നിന്ന് മുതിര്‍ന്ന പൗരന്മാര്‍ക്കായി ലഭിക്കുന്ന മികച്ച പലിശ നിരക്ക് 8.01 ശതമാനാമാണ്. 2 വര്‍ഷം മുതല്‍ 30 മാസത്തില്‍ താഴെയുള്ള നിക്ഷേപങ്ങള്‍ക്കാണ് ഈ നിരക്ക് ലഭിക്കുന്നത്. ഏപ്രില്‍ നാലിന് പുതുക്കിയ നിരക്കുകള്‍ പ്രാബല്യത്തില്‍ വന്നു.

മുന്‍നിര ബാങ്കുകളുടെ പലിശ നിരക്ക്

സ്റ്റേറ്റ് ബാങ്ക് ഓഫ് ഇന്ത്യ, എച്ച്ഡിഎഫ്‌സി ബാങ്ക് പോലുള്ള മുന്‍നിര ബാങ്കുകള്‍ മുതിര്‍ന്ന പൗരന്മാര്‍ക്ക് നല്‍കുന്ന പരമാവധി പലിശ നിരക്ക് 7.50-7.75 ശതമാനം വരെയാണ്. എസ്ബിഐയില്‍ 5 വര്‍ഷം മുതല്‍ 10 വര്‍ഷത്തേക്ക് 7.50 ശതമാനം പലിശ ലഭിക്കും. എച്ച്ഡിഎഫ്‌സി ബാങ്ക് 7.75 ശതമാനം പലിശ നല്‍കും. ഐസിഐസിഐ ബാങ്കില്‍ 2 വര്‍ഷത്തേക്ക് 7.60 ശതമാനം പലിശ മുതിര്‍ന്ന പൗരന്മാര്‍ക്ക് ലഭിക്കും.

ടിഡിഎസ്

സ്ഥിര നിക്ഷേപത്തില്‍ നിന്ന് ലഭിക്കുന്ന പലിശ വരുമാനം നിക്ഷേപകന്റെ ടാക്‌സ് ബ്രാക്കറ്റിന് അനുസരിച്ച് നികുതി നല്‍കണം. നിക്ഷേപകന്റെ ആകെ വരുമാനത്തിനൊപ്പം ചേര്‍ത്ത് നികുതി ഈടാക്കും. അതേസമയം, 60 വയസ് കഴിഞ്ഞ മുതിര്‍ന്ന പൗരന്മാര്‍ക്ക് സ്ഥിര നിക്ഷേപം/ സേവിംഗ്‌സ് അക്കൗണ്ട് എന്നിവയില്‍ നിന്ന് ലഭിക്കുന്ന 50,000 രൂപ വരെയുള്ള പലിശ വരുമാനത്തിന് നികുതി ഇളവ് നേടാം.

60 വയസ് കഴിഞ്ഞ മുതിര്‍ന്ന പൗരന്മാര്‍ക്ക് സെക്ഷന്‍ 80ടിടിബി പ്രകാരം 50,000 രൂപ വരെയുള്ള പലിശ വരുമാനം മൊത്ത നികുതി വരുമാനത്തില്‍ നിന്ന് കുറയ്ക്കാന്‍ സാധിക്കും.