പ്രായം 60 കഴിഞ്ഞാൽ ചെലവ് ചുരുങ്ങും; അറിഞ്ഞിരിക്കാം 5 സാമ്പത്തിക നേട്ടങ്ങൾ

വിരമിക്കൽ കാലം സുഖകരമായി ജീവിക്കണമെങ്കിൽ പണം അത്യാവശ്യമാണ്. അതിനായി നേരത്തെ പണം കണ്ടു വെയ്ക്കണമെന്ന് പറയാറുണ്ട്. വിരമിക്കൽ കാലത്തെ വരുമാനം നികുതിയായി പോകുമെന്നുള്ള പേടി വേണ്ട. കയ്യിൽ പണമൊക്കെ ഉണ്ടെങ്കിൽ ഇതിന് ലഭിക്കുന്ന ഇളവുകൾ നേടിയെടുത്താൽ മതി. 60ാം വയസിലാണ് സാധാരണ വിരമിക്കൽ കാലം ആരംഭിക്കുന്നത്. 60 കഴിഞ്ഞവർക്ക് നിരവധി ഇളവുകൾ സർക്കാർ അനുവദിക്കുന്നുണ്ട്.

നികുതി ഇളവും നിക്ഷേപത്തിനുള്ള സൗകര്യമായി ഉയർന്ന പലിശ നിരക്കും മുതിർന്ന പൗരന്മാർക്ക് ഉറപ്പാക്കുന്നുണ്ട്. ഇതോടൊപ്പം വാതിൽപ്പടി ബാങ്കിം​ഗ് സൗകര്യങ്ങളും മുതിർന്ന പൗരന്മാർക്ക് ലഭിക്കും. ഇത്തരത്തിൽ മുതിർന്ന പൗരന്മാർക്ക് ലഭിക്കുന്ന സാമ്പത്തിക നേട്ടങ്ങൾ എന്തൊക്കെയാണെന്ന് നോക്കാം.

ഉയര്‍ന്ന പലിശ

മിക്ക ബാങ്കുകളും പോസ്റ്റ് ഓഫീസുകളും മുതിര്‍ന്ന പൗരന്മാരുടെ നിക്ഷേപങ്ങള്‍ക്ക് ഉയര്‍ന്ന നിരക്ക് നല്‍കാറുണ്ട്. സ്ഥിര നിക്ഷേപത്തിനും ആവര്‍ത്തന നിക്ഷേപത്തിനുമാണ് പൊതുവില്‍ അധിക നിരക്ക് ലഭിക്കുന്നത്. പലിശ സാധാരണ നിക്ഷേപകര്‍ക്ക് ലഭിക്കുന്നതിനേക്കാള്‍ 0.25 ശതമാനം മുതല്‍ 0.5 ശതമാനം പലിശ ബാങ്കുകള്‍ നല്‍കും. ബാങ്കുകള്‍ക്ക് അനുസരിച്ച് ഇത് മാറ്റം വരും.

പലിശയ്ക്ക് നികുതിയിളവ്

60 വയസില്‍ താഴെ പ്രായമുള്ള നികുതി ദായകന് 10,000 രൂപ മാത്രമാണ് സേവിംഗ്‌സ് അക്കൗണ്ട് നിക്ഷേപത്തിലെ പലിശ വരുമാനത്തിന് ഇളവുള്ളത്. എന്നാല്‍ 2019-20 മുതല്‍ സെക്ഷന്‍ 80ടിടിബി പ്രകാരം സേവിംഗ് ബാങ്ക് അക്കൗണ്ടിലെയും പോസ്റ്റ് ഓഫീസ്, സഹകരണ ബാങ്ക്, മറ്റു ബാങ്കുകള്‍ എന്നിവിടങ്ങളിലെ ഏത് നിക്ഷേപത്തിനും ലഭിക്കുന്ന പലിശ വരുമാനം 50,000 രൂപ വരെ മുതിര്‍ന്ന പൗരന്മാര്‍ക്ക് ഇളവുണ്ട്. 50,000 രൂപയില്‍ കുറവാണെങ്കില്‍ ബാങ്ക് സ്രോതസില്‍ നിന്നുള്ള നികുതി ഈടാക്കില്ല. 

ബാങ്കിംഗ് സേവനം വീട്ടു പടിക്കല്‍

70 വയസ് കഴിഞ്ഞ മുതിര്‍ന്ന പൗരന്മാരായ ഉപഭോക്താക്കള്‍ക്കും ഭിന്നശേഷിക്കാര്‍ക്കും അടിസ്ഥാന ബാങ്കിംഗ് സൗകര്യങ്ങള്‍ വീട്ടുപടിക്കല്‍ എത്തിക്കണമെന്ന് റിസര്‍വ് ബാങ്കിന്റെ നിര്‍ദ്ദേശമുണ്ട്. രാജ്യത്താകമാനം ഈ സേവനം ലഭിക്കും. വാതില്‍പടി സേവനം ലഭ്യമാക്കുന്ന ബ്രാഞ്ചുകളുടെ വിവരങ്ങള്‍ ബാങ്ക് വെബ്‌സൈറ്റില്‍ പ്രദര്‍ശിപ്പിക്കണമെന്നും റിസര്‍വ് ബാങ്ക് നിര്‍ദ്ദേശിച്ചിട്ടുണ്ട്.

ആരോ​ഗ്യ ഇൻഷൂറൻസ് പ്രീമിയം/ ആശുപത്രി ചെലവ്

ആരോഗ്യ ഇന്‍ഷൂറന്‍സ് പ്രീമിയം അടയ്ക്കുന്നത് വഴി ആദായ നികുതി സെക്ഷന്‍ 80ഡി പ്രകാരം 60 കഴിഞ്ഞ മുതിര്‍ന്ന പൗരന്മാര്‍ക്ക് 50,000 രൂപ വരെ ആദായ നികുതിയിൽ ഇളവ് ലഭിക്കും. സാധാരണ നികുതിദായകര്‍ക്ക് ഇത് 25,000 രൂപ മാത്രമാണ്. ആരോഗ്യ ഇന്‍ഷൂറന്‍സ് ഇല്ലാത്ത മുതിര്‍ന്ന പൗരന്റെ ആശുപത്രി ചെലവ് ഇനത്തില്‍ 50,000 രൂപ വരെയും ആദായ നികുതി ഇളവ് ലഭിക്കും. ഇവ കറന്‍സിയായി അടച്ചാല്‍ ഇളവ് ലഭിക്കില്ല.

നിര്‍ദ്ദിഷ്ട രോഗങ്ങള്‍ക്ക് ചികിത്സിക്കുന്നത് വഴി ഉണ്ടാകുന്ന ചെലവുകള്‍ക്ക് സെക്ഷന്‍ 80ഡിഡിബി വഴി 1 ലക്ഷം രൂപ വരെ ആദായ നികുതി ഇളവ് ലഭിക്കും. സാധാരണ നിക്ഷേപകര്‍ക്ക് ഇത് 40,000 രൂപ മാത്രമാണ്.