സേവിംഗ്‌സ് അക്കൗണ്ടിന് 6.75 ശതമാനം പലിശയോ! നോക്കിവെയ്ക്കാം ഈ 5 ബാങ്കുകള്‍

മേയ്, ജൂണ്‍ മാസങ്ങളിലായി റിസര്‍വ് ബാങ്ക് റിപ്പോ നിരക്ക് ഉയര്‍ത്തിയതോടെ ബാങ്കുകള്‍ പലിശ നിരക്കുകള്‍ ഉയര്‍ത്താന്‍ ആരംഭിച്ചിട്ടുണ്ട്. റിപ്പോ നിരക്ക് 90 അടിസ്ഥാന നിരക്കാണ് രണ്ട് മാസത്തിനിടെ ഉയര്‍ത്തിയത്. ഇതിന്റെ ചുവടു പിടിച്ച് പ്രധാന ബാങ്കുകളെല്ലാം നിക്ഷേപത്തിന്റെ പലിശ നിരക്കുകൾ ഉയർത്തിയിട്ടുണ്ട്. ഇതിൽ സ്വകാര്യ ബാങ്കുകളിലെ സേവിം​ഗ്സ് അക്കൗണ്ടുകളുടെ പലിശ നിരക്കാണ് ഇവിടെ പരിശോധിക്കുന്നത്. 

സ്വകാര്യ ബാങ്കുകളായ എച്ച്ഡിഎഫ്‌സി ബാങ്ക്, കൊടക് മഹീന്ദ്രാ ബാങ്ക്, ആക്‌സിസ് ബാങ്ക് തുടങ്ങിയ ബാങ്കുകള്‍ ഈയിടെ സേവിംഗ്സ് അക്കൗണ്ടുകളുടെ പലിശ നിരക്കുകൾ ഉയർത്തിയിരുന്നു. വമ്പൻ ബാങ്കുകളെ അപേക്ഷിച്ച് ചെറുകിട ബാങ്കുകൾ 6.75 ശതമനം വരെ പലിശ നിരക്ക് സേവിം​ഗ്സ് അക്കൗണ്ടുകൾക്ക് നൽകുന്നുണ്ട്.

കൂടുതല്‍ ഉപഭോക്താക്കളെയാണ് ചെറുബാങ്കുകള്‍ ഇതിലൂടെ ലക്ഷ്യം വെയ്ക്കുന്നത്. മികച്ച ട്രാക്ക് റെക്കോഡ് ഉള്ളതും മികച്ച സേവനം നൽകുന്നതും പ്രധാന ന​ഗരങ്ങളിൽ ബ്രാഞ്ച്, എടിഎം സൗകര്യങ്ങള്‍ നൽകുന്നതുമായ ബാങ്കുകളിൽ ഉയർന്ന പലിശ നിരക്ക് ലഭിക്കുന്നത് അക്കൗണ്ട് ഉടമയ്ക്ക് നേട്ടമാണ്. അക്കൗണ്ടിലെ പണത്തിന് അനുസരിച്ച് പലിശ നിരക്ക് വ്യത്യാസപ്പെടും. ഉയർന്ന നിരക്കാണ് ചുവടെ വിശദീകരിക്കുന്നത്.

ഡിസിബി ബാങ്ക്

ഡെവലപ്‌മെന്റ് ക്രെഡിറ്റ് ബാങ്കിന് (ഡിസിബി) 1995 മേയ് 31 നാണ് റിസര്‍വ് ബാങ്കില്‍ നിന്നും ഷെഡ്യൂള്‍ഡ് വാണിജ്യ ബാങ്ക് ലൈസന്‍സ് ലഭിക്കുന്നത്. മുംബൈ ആസ്ഥാനമായി പ്രവര്‍ത്തിക്കുന്ന ബാങ്കിന് രാജ്യത്തൊട്ടാകെ 400 ബ്രാഞ്ചുകളുണ്ട്. സേവിംഗ്‌സ് അക്കൗണ്ടില്‍ 2500- 5000 രൂപ വരെയാണ് മിനിമം ബാലന്‍സായി ആവശ്യം. സേവിംഗ്‌സ് അക്കൗണ്ടുകള്‍ക്കുള്ള ഏറ്റവും ഉയര്‍ന്ന പലിശ നിരക്കായ 6.75 ശതമാനമാണ് ഡിസിബി ബാങ്ക് നല്‍കുന്നത്. 

ആര്‍ബിഎല്‍ ബാങ്ക്

രാജ്യത്താകമാനം 500 ബ്രാഞ്ചും 10.66 മില്യണ്‍ ഉപഭോക്താക്കളാണ് ആ‌ർബിഎൽ ബാങ്കിനുള്ളത്. 1943 ല്‍ ആരംഭിച്ച ബാങ്ക് നേരത്തെ രത്‌നാകര്‍ ബാങ്ക് എന്നാണ് അറിയപ്പെട്ടിരുന്നത്. 2014 ലാണ് ആര്‍ബിഎല്‍ ബാങ്ക് ലിമിറ്റഡ് എന്ന് പേരുമാറ്റിയത്. മുംബൈയിലാണ് ആസ്ഥാനം. 2500 രൂപ മുതല്‍ 5000 രൂപ വരെയാണ് അക്കൗണ്ടുകളില്‍ വേണ്ട മിനിമം ബാലന്‍സ്. പരമാവധി 6 ശതമാനം പലിശ സേവിം​ഗ്സ് അക്കൗണ്ടുകൾക്ക് ബാങ്ക് നല്‍കുന്നു. 

ഐഡിഎഫ്‌സി ഫസ്റ്റ് ബാങ്ക്

പരമാവധി 6 ശതമാനമാണ് ഐഡിഎഫ്‌സി ഫസ്റ്റ് ബാങ്ക് സേവിംഗ്‌സ് അക്കൗണ്ടുകള്‍ക്ക് നല്‍കുന്ന പലിശ നിരക്ക്. ശരാശരി 10,000 രൂപയാണ് ഐഡിഎഫ്‌സി ഫസ്റ്റ് ബാങ്കില്‍ ആവശ്യമുള്ള മിനിമം ബാലന്‍സ്. 2015 ലാണ ഐഡിഎഫ്‌സി ബാങ്ക് ആരംഭിക്കുന്നത്. 2018 ല്‍ ബാങ്കിതര ധനകാര്യ സ്ഥാപനമായ ക്യാപിറ്റല്‍ ഫസ്റ്റുമായി ബാങ്ക് ലയിച്ചു. ഇതിന് ശേഷം 2018 ഡിസംബര്‍ മുതലാണ് ഐഡിഎഫ്‌സി ഫസ്റ്റ് ബാങ്ക് എന്ന് പേരില്‍ പ്രവര്‍ത്തനം ആരംഭിക്കുന്നത്.

ബന്ധന്‍ ബാങ്ക്

സേവിംഗ്‌സ് അക്കൗണ്ടിലെ പണത്തിന് പരമാവധി 6 ശതമാനം പലിശ നിരക്കാണ് ബന്ധന്‍ ബാങ്ക് അനുവദിക്കുന്നത്. മാസത്തില്‍ 5,000 രൂപയാണ് ബന്ധന്‍ ബാങ്ക് സേവിംഗ്‌സ് അക്കൗണ്ടില്‍ ആവശ്യമായ കുറഞ്ഞ ബാലന്‍സ്. 2015 ല്‍ കൊല്‍ക്കത്തയിലാണ് ബാങ്ക് ആരംഭിക്കുന്നത്. നേരത്തെ ബാങ്കിതര ധനകാര്യസ്ഥാപനമായരുന്നു. നിലവില്‍ 2.6 കോടി ഉപഭോക്താകകള്‍ കമ്പനിക്കുണ്ട്.

യെസ് ബാങ്ക്

2004ലാണ് യെസ് ബാങ്ക് മുംബൈയില്‍ പ്രവര്‍ത്തനം തുടങ്ങുന്നത്. യെസ് ബാങ്കിലെ സേവിംഗ്‌സ് അക്കൗണ്ടില്‍ മാസത്തിലുള്ള കുറഞ്ഞ നിക്ഷേപം 25000 രൂപയാണ്. ബാങ്ക് നല്‍കുന്ന പരമാവധി പലിശ നിരക്ക് 5 ശതമാനമാണ്. ഇതോടൊപ്പം പ്രധാന സ്വകാര്യ ബാങ്കുകളുടെ പലിശ നിരക്ക് എത്രയാണെന്ന് നേക്കാം. ആക്‌സിസ് ബാങ്ക്- 3 ശതമാനം, എച്ച്ഡിഎഫ്‌സി ബാങ്ക്- 3.50 ശതമാനം, കൊടക് മഹീന്ദ്ര ബാങ്ക്- 3.50 ശതമാനം, ഇന്‍ഡസ്ഇന്‍ഡ് ബാങ്ക്- 5 ശതമാനം.