നികുതിദായകര്‍ക്ക് ആശ്വാസമായി സര്‍ക്കാറിന്റെ നികുതി ഇളവ് പ്രഖ്യാപനങ്ങള്‍

കോവിഡ് രോഗ വ്യാപനം സൃഷ്ടിച്ച പ്രതിസന്ധികളുടെ പശ്ചാത്തലത്തില്‍ ആദായ നികുതി ഇടപാടുകള്‍ ലഘൂകരിക്കുന്നതിനായി ചില പ്രഖ്യാപനങ്ങള്‍ സര്‍ക്കാര്‍ തലത്തില്‍ ഉണ്ടായിട്ടുണ്ട്. കൂടാതെ കോവിഡ് പ്രതിസന്ധികളില്‍ വലയുന്ന നികുതി ദായകര്‍ക്ക് അധിക ആശ്വാസ പദ്ധതികളും അതിനൊപ്പം സര്‍ക്കാര്‍ പ്രഖ്യാപിച്ചിട്ടുണ്ട്. അതില്‍ കോവിഡ് ചികിത്സയ്ക്കായുള്ള ചിലവിന്മേലുള്ള നികുതി കിഴിവ് ഉള്‍പ്പെടെയുണ്ട്. ഏറ്റവും പ്രധാനപ്പെട്ട സര്‍ക്കാറിന്റെ ചില നികുതി ഇളവ് പ്രഖ്യാപനങ്ങള്‍ എന്തൊക്കെയാണെന്ന് നമുക്ക് നോക്കാം.

മിക്ക നികുതി ദായകര്‍ക്കും കോവിഡ് 19 ചികിത്സയ്ക്കായി തൊഴില്‍ ദാതാവില്‍ നിന്നും മറ്റ് അഭ്യുദയാകാംക്ഷികളില്‍ നിന്നും സാമ്പത്തീക സഹായം ലഭിച്ചിട്ടുണ്ടാകും. ഈ തുക ആദായ നികുതിയുടെ പരിധിയില്‍ നിന്നും ഒഴിവാക്കുന്നതിനായി തൊഴില്‍ ദാതാവില്‍ നിന്നോ മറ്റേതെങ്കിലും വ്യക്തിയില്‍ നിന്നോ നികുതി ദാതാവ് ചികിത്സാ ആവശ്യത്തിനായി സ്വീകരിച്ചിരിക്കുന്ന തുകയൈ പൂര്‍ണമായും നികുതി മുക്തമാക്കിയിട്ടുണ്ട്. 2019 - 20 സാമ്പത്തീക വര്‍ഷത്തിലും തുടര്‍ന്നുള്ള വര്‍ഷങ്ങളിലും ഇത് ബാധകമാണ്.

ചില നികുതി ദായകര്‍ കോവിഡ് ബാധിതരായി മരണപ്പെടുന്ന സാഹചര്യവുമുണ്ടായിട്ടുണ്ട്. ഇങ്ങനെ മരണപ്പെട്ട നികുതിദായകരുടെ ആശ്രിതകര്‍ക്ക് ആശ്വാസമായി ലഭിക്കുന്ന തുകയും ആദായ നികുതി മുക്തമാണ്. തൊഴില്‍ ദാതാവില്‍ നിന്നോ മറ്റേതെങ്കിലും വ്യക്തിയില്‍ നിന്നോ സ്വീകരിക്കുന്ന തുകയ്ക്ക് ഈ ഇളവ് ലഭിക്കും. മറ്റുളളവരില്‍ നിന്നും സ്വീകരിക്കുന്ന 10 ലക്ഷം രൂപ വരെയുള്ള തുകയ്ക്കാണ് ഇളവ് ലഭിക്കുക.

പാന്‍ ആധാര്‍ ലിങ്കിങ്ങിനുള്ള സമയ പരിധിയും സര്‍ക്കാര്‍ നീട്ടിയിട്ടുണ്ട്. ജൂണ്‍ 30ന് അവസാനിച്ച സമയ പരിധി ഇപ്പോള്‍ 2021 സെപ്തംബര്‍ 30 വരെയാണ് നീട്ടി നല്‍കിയിരിക്കുന്നത്.

2021 ജൂണ്‍ 15ന് മുമ്പ് സമര്‍പ്പിക്കണമെന്ന് നിര്‍ദേശിക്കപ്പെട്ട ടിഡിഎസ് (ടാക്‌സ് ഡിഡക്ടഡ് അറ്റ് സോഴ്‌സ്) സര്‍ട്ടിഫിക്കേറ്റ് 2021 ജൂലൈ 31ന് മുമ്പ് സമര്‍പ്പിച്ചാല്‍ മതിയാകും.

ഫോരം 16 ലെ ടിഡിഎസ് തൊഴില്‍ ദാതാവ് ജീവനക്കാരന് സമര്‍പ്പിക്കേണ്ടതിന്റെ സമയ പരിധി 2021 ജൂലൈ 15ല്‍ നിന്നും ജൂലൈ 30 ആക്കി ഉയര്‍ത്തിയിട്ടുണ്ട്.

വിവാദ് സേ വിശ്വാസ് പദ്ധതിയ്ക്ക് കീഴില്‍ പിഴയില്ലാതെ പെയ്‌മെന്റ് നടത്തേണ്ട അവസാന തീയ്യതി ആഗസ്ത് 31 വരെ നീട്ടിയിട്ടുണ്ട്. പിഴയോടെ ഒക്ടോബര്‍ 31 വരെ പെയ്‌മെന്റ് നടത്താം.

2021 ജൂണ്‍ 30ന് അവസാനിക്കുന്ന പാദത്തില്‍ ഫോറം നം. 15ജി/15 എച്ചില്‍ സ്വീകര്‍ത്താക്കളില്‍ നിന്നും ലഭിക്കുന്ന ഡിക്ലറേഷനുകള്‍ 2021 ആഗസ്ത് 31ന് മുമ്പായി അപ്ലോഡ് ചെയ്താല്‍ മതിയാകും.