സീനിയര്‍ സിറ്റിസണ്‍ സേവിംഗ്‌സ് സ്‌കീമിനേക്കാള്‍ പലിശ; മുതിര്‍ന്ന പൗരന്മാര്‍ നിക്ഷേപിക്കേണ്ടത് ഈ ബാങ്കുകളില്‍

മുതിര്‍ന്ന പൗരന്മാര്‍ക്ക് സുരക്ഷിതമായി നിക്ഷേപിക്കാവുന്നൊരു പദ്ധതിയാണ് സീനിയര്‍ സിറ്റിസണ്‍ സേവിംഗ്‌സ് സ്‌കീം. വാര്‍ധക്യ കാലത്ത് സ്ഥിര വരുമാനം ഉറപ്പു വരുത്തുന്ന പദ്ധതിയില്‍ നിന്ന് ത്രൈമാസത്തില്‍ പലിശ വരുമാനം ലഭിക്കും. 30 ലക്ഷം രൂപ വരെ നിക്ഷേപിക്കാന്‍ സാധിക്കുന്ന പദ്ധതിയില്‍ 5 വര്‍ഷത്തേക്ക് മുതിര്‍ന്ന പൗരന്മാര്‍ക്ക് 8.2 ശതമാനം പലിശ ലഭിക്കും. ഇക്കാലയളവില്‍ മുതിര്‍ന്ന പൗരന്മാര്‍ക്ക് ലഭിക്കുന്ന മികച്ച പലിശയില്‍ ഒന്നാണിത്.

ബാങ്ക് സ്ഥിര നിക്ഷേപങ്ങളില്‍ സീനിയര്‍ സിറ്റിസണ്‍ സേവിംഗ്‌സ് സ്‌കീമിനേക്കാള്‍ പലിശ നല്‍കുന്നത് കൂടുതലും സ്‌മോള്‍ ഫിനാന്‍സ് ബാങ്കുകളാണ്. നാലോളം ബാങ്കുകള്‍ മുതിര്‍ന്ന പൗരന്മാര്‍ക്ക് 9 ശതമാനമോ അതില്‍ കൂടുതലോ പലിശ നല്‍കുന്നു. അതേസമയം, മുന്‍നിര ബാങ്കുകളായ എസ്ബിഐ, എച്ച്ഡിഎഫ്‌സി ബാങ്ക്, ഐസിഐസിഐ ബാങ്ക് എന്നിവ പരമാവധി 7.75 ശതമനം പലിശയാണ് മുതിര്‍ന്ന പൗരന്മാര്‍ക്കായി നല്‍കുന്നത്. മുതിര്‍ന്ന പൗരന്മാര്‍ക്ക് മികച്ച പലിശ നല്‍കുന്ന 5 ബാങ്കുകളെ പരിചയപ്പെടാം.

യൂണിറ്റി സ്‌മോള്‍ ഫിനാന്‍സ് ബാങ്ക്

മേയ് രണ്ടിന് പലിശ നിരക്ക് പുതുക്കിയ യൂണിറ്റി സ്‌മോള്‍ ഫിനാന്‍സ് ബാങ്ക് മുതിര്‍ന്ന പൗരന്മാര്‍ക്ക് നല്‍കുന്ന ഉയര്‍ന്ന പലിശ നിരക്ക് 9.50 ശതമാനമാണ്. 1001 ദിവസം കാലാവധിയുള്ള സ്ഥിര നിക്ഷേപത്തിനാണ് യൂണിറ്റി സ്‌മോള്‍ ഫിനാന്‍സ് ബാങ്ക് 9.50 ശതമാനം പലിശ നല്‍കുന്നത്.

സൂര്യോദയ് സ്‌മോള്‍ ഫിനാന്‍സ് ബാങ്ക്

മേയ് അഞ്ചിനാണ് സൂര്യോദയ് സ്‌മോള്‍ ഫിനാന്‍സ് ബാങ്ക് 2 കോടിക്ക് താഴെയുള്ള സ്ഥിര നിക്ഷേപങ്ങളുടെ പലിശ നിരക്കുയര്‍ത്തിയത്. നിലവില്‍ 4.50 ശതമാനം തൊട്ട് 9.60 ശതമാനം വരെ പലിശ മുതിര്‍ന്ന പൗരന്മാര്‍ക്ക് ലഭിക്കും. സൂര്യോദയ് സ്‌മോള്‍ ഫിനാന്‍സ് ബാങ്കില്‍ 9.60 ശതമാനം പലിശ ലഭിക്കുന്നത് 5 വര്‍ഷത്തെ നിക്ഷേപത്തിനാണ്. 999 ദിവസത്തേക്ക് 9.50 ശതമാനം പലിശയും ലഭിക്കും. 

ഉത്കൃഷ് സ്‌മോള്‍ ഫിനാന്‍സ് ബാങ്ക്

ഉത്കൃഷ് സ്‌മോള്‍ ഫിനാന്‍സ് ബാങ്കില്‍ 700 ദിവസത്തേക്കാണ് ഉയര്‍ന്ന പലിശ നല്‍കുന്നത്. സാധാരണ നിക്ഷേപകര്‍ക്ക് 8.25 ശതമാനവും മുതിര്‍ന്ന പൗരന്മാര്‍ക്ക് 9 ശതമാനം പലിശയും നല്‍കും. ബാങ്ക് അവസാനമായി പലിശ നിരക്ക് പുതുക്കിയത് ഫെബ്രുവരി 27 നാണ്.

ഫിന്‍കെയര്‍ സ്‌മോള്‍ ഫിനാന്‍സ് ബാങ്ക്

2 കോടിക്ക് താഴെയുള്ള സ്ഥിര നിക്ഷേപങ്ങള്‍ക്ക് ഫിന്‍കെയര്‍ സ്‌മോള്‍ ഫിനാന്‍സ് ബാങ്ക് പലിശ നിരക്ക് പുതുക്കിയത് മാര്‍ച്ച് 24നാണ്. മുതിര്‍ന്ന പൗരന്മാര്‍ക്ക് 9.01 ശതമാനം പലിശ ലഭിക്കും. സാധാരണ നിക്ഷേപകര്‍ക്ക് 8.41 ശതമാനം പലിശയും ലഭിക്കും. 100 ദിവസത്തേക്കാണ് ഈ പലിശ നിരക്ക് നല്‍കുന്നത്. 

ഡിസിബി ബാങ്ക്

മുതിർന്ന പൗരന്മാർക്ക് മികച്ച പലിശ നൽകുന്നൊരു സ്വകാര്യ ബാങ്കാണ് ഡിസിബി ബാങ്ക്. 8 ശതമാനത്തിന് മുകളിൽ പലിശ ഡിസിബി ബാങ്ക് നൽകുന്നു. മുതിര്‍ന്ന പൗരന്മാര്‍ക്ക് 8.50 ശതമാനം പലിശ നേടാം. 24 മാസ കാലയളവ്, 700 ദിവസം, 36 മാസ കാലയളവുകളില്‍ 8 ശതമാനം പലിശ ഡിസിബി ബാങ്ക് നല്‍കുന്നുണ്ട്. 

മുതിർന്ന പൗരന്മാർക്ക് നികുതി

മികച്ച പലിശ നൽകുമെങ്കിലും മുതിർന്ന പൗരന്മാരായ നിക്ഷേപകർ സ്ഥിര നിക്ഷേപത്തിലെ പലിശയ്ക്ക് ടാക്സ് സ്ലാബ് അനുസരിച്ച് നികുതി നൽകേണ്ടി വരും. ' ഇന്‍കം ഫ്രം അദര്‍ സോഴ്സ്' എന്ന ഭാഗത്തിലാണ് സ്ഥിര നിക്ഷേപത്തിലെ പലിശ വരുമാനം ചേര്‍ക്കുന്നത്.

നികുതിദായകന്റെ സ്ലാബ് നിരക്ക് അനുസരിച്ച് നികുതി കണക്കാക്കും. ഉയര്‍ന്ന നികുതി സ്ലാബില്‍ ഉള്‍പ്പെടുന്നൊരാളാണെങ്കില്‍ 30 ശതമാനം നികുതിയും സെസും സര്‍ചാര്‍ജും അടക്കം നല്‍കേണ്ടി വരും. പലിശ വരുമാനം 50,000 രൂപ കടന്നാൽ മുതിർന്ന പൗരന്മാരിൽ നിന്ന് സ്രോതസിൽ നിന്നുള്ള നികുതി ഈടാക്കും.