സ്ഥിര നിക്ഷേപത്തിന് 8.76 ശതമാനം വരെ പലിശ ലഭിക്കും; നിരക്കുയർത്തി ഈ 3 ബാങ്കുകൾ

സുരക്ഷിതമായി നിക്ഷേപിക്കാൻ പലരും തിരഞ്ഞെടുക്കുന്ന മാർ​ഗം ഇന്നും ബാങ്ക് സ്ഥിര നിക്ഷേപങ്ങളാണ്. മൂലധനത്തിന്റെ സുരക്ഷിതത്വവും കൃത്യതയോടെയുള്ള പലിശ വരുമാനവും സ്ഥിര നിക്ഷേപത്തിന് ലഭിക്കുന്ന ആകർഷണീയതയാണ്. റിസർവ് ബാങ്ക് ഓഫ് ഇന്ത്യ പണപ്പെരുപ്പത്തെ വരുതിയിലാക്കാൻ തുടർച്ചയായ റിപ്പോ നിരക്കുയർത്തിയത് ബാങ്ക് നിക്ഷേപകർക്ക് നേട്ടമായി.

മുതിർന്ന പൗരന്മാർക്ക് അധിക പലിശ നിരക്ക് ലഭിക്കുന്നതിനാൽ വലിയ നേട്ടം ഇത്തരക്കാർക്കാണ്. ഫെബ്രുവരി 8ന് റിപ്പോ നിരക്ക് 6.5 ശതമാനമായി ഉയർത്തിയതിന് ശേഷം മിക്ക ബാങ്കുകളും സ്ഥിര നിക്ഷേപ പലിശ നിരക്ക് പരിഷ്‌കരിച്ചിട്ടുണ്ട്. 2022 മേയ് മുതൽ 2.50 ശതമാനത്തിന്റെ വർധനവ് റിപ്പോ നിരക്കിൽ വന്നിട്ടുണ്ട്.

കഴിഞ്ഞ വാരം സ്ഥിര നിക്ഷേപങ്ങളുടെ പലിശ നിരക്കുയർത്തിയവയിൽ പ്രധാനപ്പെട്ട ബാങ്കുകൾ എച്ച്‌ഡിഎഫ്‌സി ബാങ്ക്, സൂര്യോദയ് സ്‌മോൾ ഫിനാൻസ് ബാങ്ക്, ഇക്വിറ്റാസ് സ്‌മോൾ ഫിനാൻസ് ബാങ്ക് എന്നിവയാണ്. 10-20 അടിസ്ഥാന നിരക്കുകളാണ് ബാങ്കുകൾ ഉയർത്തിയത്. ബാങ്കുകൾ പുതിയ സ്ഥിര നിക്ഷേപ പദ്ധതികളും അവതരിപ്പിച്ചിട്ടുണ്ട്. പുതുക്കിയ നിരക്കുകൾ മാർച്ച് 1 മുതൽ നിലവിൽ വന്നു. വിശദമായി പരിശോധിക്കാം. 

എച്ച്ഡിഎഫ്സി ബാങ്ക്

എച്ച്‌ഡിഎഫ്‌സി ബാങ്ക് സ്ഥിര നിക്ഷേപത്തിന്റെ പലിശ നിരക്ക് 10-20 അടിസ്ഥാന പോയിന്റാണ് ഉയർത്തിയത്. 45 മാസത്തെ സ്ഥിര നിക്ഷേപത്തിന് എച്ച്ഡിഎഫ്സി ബാങ്ക് 7.70 ശതമാനം പലിശ മുതിർന്ന പൗരന്മാർക്ക് നൽകും.

എച്ച്ഡിഎഫ്സി ബാങ്ക് അവതരിപ്പിച്ച പുതിയ നിക്ഷേപ പദ്ധതിയായ ഡയമണ്ട് ഡെപ്പോസിറ്റ് പദ്ധതി പ്രകാരം 75 മാസത്തെ കാലാവധിയിലുള്ള നിക്ഷേപത്തിന് മുതിർന്ന പൗരന്മാർക്ക് 8 ശതമാനം പലിശ ലഭിക്കും. ഓൺലൈൻ വഴി നിക്ഷേപിക്കുന്നതോ പുതുക്കുന്നതോ ആയ നിക്ഷേപങ്ങൾക്ക് 0.05 ശതമാനത്തിന്റെ അധിക നിരക്കും ലഭിക്കും.

സൂര്യോദയ് സ്മോൾ ഫിനാൻസ് ബാങ്ക്

സൂര്യോദയ് സ്‌മോൾ ഫിനാൻസ് ബാങ്ക് 7 ദിവസം മുതൽ 10 വർഷം വരെ കാലാവധിയുള്ള 2 കോടി രൂപയിൽ താഴെയുള്ള നിക്ഷേപങ്ങൾ 4.00 ശതമാനം മുതൽ 8.51 ശതമാനം വരെ പലിശയാണ് നൽകുന്നത്. മുതിർന്ന പൗരന്മാർക്ക് 4.50 ശതമാനം മുതൽ 8.76 ശതമാനം വരെ പലിശ ലഭിക്കും.

999 ദിവസത്തെ നിക്ഷേപത്തിന് സാധാരണ പൗരന്മാർക്ക് 8.51 ശതമാനം പലിശയും മുതിർന്ന പൗരന്മാർക്ക് 8.76 ശതമാനം പലിശയും നേടാം. മാർച്ച് 1 മുതൽ പുതുക്കിയ പലിശ നിരക്കുകൾ പ്രാബല്യത്തിൽ വന്നു.

ഇക്വിറ്റാസ് സ്മോൾ ഫിനാൻസ് ബാങ്ക്

ഇക്വിറ്റാസ് സ്മോൾ ഫിനാൻസ് ബാങ്കും കഴിഞ്ഞ വാരം പലിശ നിരക്കുയർത്തി. 888 ദിവസത്തെ കാലാവധിയിൽ സ്ഥിര നിക്ഷേപം നടത്തിയാൽ 8.20 ശതമാനം പലിശ ലഭിക്കും. മുതിർന്ന പൗരന്മാർക്ക് 8.70 ശതമാനം പലിശ ലഭിക്കും. 2 കോടി രൂപയ്ക്ക് താഴെയുള്ള നിക്ഷേപങ്ങൾക്കാണ് ഈ പലിശ നിരക്ക് ലഭിക്കുക. 

889 ദിവസം മുതൽ 3 വർഷത്തേക്ക് 7.75 ശതമാനം പലിശ ലഭിക്കും. മുതിർന്ന പൗരന്മാർക്ക് 8.25 ശതമാനം പലിശയും ലഭിക്കും. 2 വർഷം മുതൽ 887 ദിവസത്തേക്കും ഇതേ പലിശ ലഭിക്കും. 18 മാസം മുതൽ 2 വർഷത്തേക്ക് 7.70 ശതമാനം പലിശയാണ് ഇക്വിറ്റാസ് സ്മോൾ ഫിനാൻസ് ബാങ്ക് നൽകുന്നത്. നിരക്ക് വർധനവ് മാർച്ച് 1 മുതൽ നിലവിൽ വന്നു.