ഈ പണ ഇടപാടുകള്‍ ആദായ നികുതി നോട്ടീസ് വിളിച്ചു വരുത്തിയേക്കാം!

പണ ഇടപാടുകളുടെ കാര്യത്തില്‍ ആദായ നികുതി വകുപ്പ് വളരെ കര്‍ക്കശമാണ്. നമ്മുടെ നിക്ഷേപങ്ങളിലും പണ പിന്‍വലിക്കലുകളിലുമെല്ലാം അവരുടെ നോട്ടമെത്തും. നടത്തിയ ഇടപാടുകള്‍ നാം റിപ്പോര്‍ട്ട് ചെയ്തില്ല എങ്കില്‍പ്പോലും ബാങ്കുകളുടെയും മ്യൂച്വല്‍ ഫണ്ടുകളുടേയും ബാലന്‍സ്ഷീറ്റുകള്‍ പരിശോധിക്കുന്നത് വഴി നാം നടത്തിയ മുഴുവന്‍ ഇടപാടുകളും അവര്‍ കണ്ടെത്തും.

അതിനാല്‍ തന്നെ ഇടപാടുകളുടെ പരിധി മനസ്സിലാക്കി അതിനകത്തുനിന്ന് കാര്യങ്ങള്‍ ചെയ്യുന്നതാണ് അഭികാമ്യം. ബാങ്ക് സ്ഥിര നിക്ഷേപങ്ങളിലോ, മ്യൂച്വല്‍ ഫണ്ടിലോ, ഓഹരി വിപണിയിലോ , ബോണ്ടുകളിലോ നിക്ഷേപിക്കുവാന്‍ ആലോചനയുണ്ടെങ്കില്‍ അതില്‍ പണമായും ഡിജിറ്റല്‍ നിക്ഷേപമായും നടത്താവുന്ന തുകയുടെ പരിധി അറിഞ്ഞിരിക്കുന്നത് ആദായ നികുതി നോട്ടീസ് കൈപ്പറ്റേണ്ടി വരുന്ന സാഹചര്യം ഒഴിവാക്കുവാന്‍ സാധിക്കും.

മ്യൂച്വല്‍ ഫണ്ടുകളിലും ഓഹരി വിപണിയിലും ബോണ്ടുകളിലും 10 ലക്ഷം രൂപയോ അതില്‍ മുകളിലോ തുക പണമായി നിക്ഷേപം നടത്തിയാലും ആദായ നികുതി വകുപ്പിന്റെ നോട്ടീസ് നിങ്ങളെ തേടിയെത്തും. അതേ തുക ഡിജിറ്റല്‍ രീതിയില്‍ നിക്ഷേപം നടത്തിയാലും ആദായ നികുതി വകുപ്പിന്റെ നോട്ടീസിനെ ആകര്‍ഷിക്കുന്ന പ്രവൃത്തിയാണ്.

ബാങ്ക് ഡ്രാഫ്റ്റുകള്‍ക്കായി പണം ഉപയോഗിച്ച് അത് ഡീമാറ്റ് അ്ക്കൗണ്ടില്‍ നിക്ഷേപിക്കുകയും ചെയ്താല്‍ ബ്രോക്കറും ബാങ്കും നിങ്ങളുടെ ആ പണ ഇടപാടിനെ സംബന്ധിച്ചുള്ള വിവരങ്ങള്‍ അവരുടെ അതാത് ബാലന്‍സ്ഷീറ്റില്‍ വെളിപ്പെടുത്തുകയും ആദായ നികുതി വകുപ്പ് അത് കണ്ടെത്തുകയും നിങ്ങള്‍ക്ക് നോട്ടീസ് അയക്കുകയും ചെയ്യും. ഈ സാഹചര്യത്തില്‍ മറ്റ് സന്ദര്‍ഭങ്ങളേക്കാള്‍ ഗൗരവമായതായിരിക്കും ആദായ നികുതി വകുപ്പിന്റെ നോട്ടീസ്.