നിക്ഷേപത്തിന് മികച്ച റിട്ടേൺ; സ്ഥിര നിക്ഷേപത്തിന് 9% പലിശ എവിടെ ലഭിക്കും; ഏത് കാലാവധിയിൽ നിക്ഷേപിക്കണം

സ്ഥിര നിക്ഷേപം പോലുള്ള ഡെബ്റ്റ് നിക്ഷേപങ്ങൾക്ക് 8 ശതമാനം പലിശയെന്നത് മാന്യമായ നിരക്കാണ്. റിപ്പോ നിരക്കുയർന്നു നിൽക്കുന്ന കാലത്ത് സ്ഥിര നിക്ഷേപങ്ങങ്ങൾക്ക് ബാങ്കുകൾ മികച്ച പലിശ നിരക്ക് നൽകുന്നുണ്ട്. സ്വകാര്യ ബാങ്കിൽ 8 ശതമാനം വരെ പലിശ നേടാൻ സാധിക്കും.

ചുരുക്കം ചില ബാങ്കുകൾ 9 ശതമാനം നിരക്കിൽ റെ​ഗുലർ നിക്ഷേപകർക്കും 9.60 ശതമാനം നിരക്കിൽ മുതിർന്ന പൗരന്മാർക്കും പലിശ നൽകുന്നു. ഈ ഉയർന്ന നിരക്ക് ലഭിക്കാൻ ഏതെക്കെ ബാങ്കിൽ ഏത് കാലാവധിയിൽ നിക്ഷേപിക്കണം എന്ന് പരിശോധിക്കാം.

9% പലിശ നിരക്ക്

നിക്ഷേപകർക്ക് ഈ രണ്ട് ബാങ്കുകളാണ് സ്ഥിര നിക്ഷേപങ്ങൾക്ക് 9 ശതമാനത്തിന് മുകളിൽ പലിശ നൽകുന്നത്. യൂണിറ്റി സ്മോൾ ഫിനാൻസ് ബാങ്ക്, സൂര്യോദയ് സ്‌മോൾ ഫിനാൻസ് ബാങ്കുകളിൽ റെ​ഗുലർ നിക്ഷേപകർക്ക് ഇപ്പോൾ 9 ശതമാനത്തിലധികം പലിശ നിരക്ക് ലഭിക്കും. പബ്ലിക് പ്രൊവിഡന്റ് ഫണ്ട് (പിപിഎഫ്), എംപ്ലോയീസ് പ്രൊവിഡന്റ് ഫണ്ട് (ഇപിഎഫ്), സുകന്യ സമൃദ്ധി യോജന തുടങ്ങിയ മിക്ക നിക്ഷേപ പദ്ധതികളേക്കാളും പലിശ ഈ സ്മോൾ ഫിനാൻസ് ബാങ്കുകളിൽ തിരഞ്ഞെടുത്ത കാലയളവുകളിൽ ലഭിക്കും.

യൂണിറ്റി സ്മോൾ ഫിനാൻസ് ബാങ്ക്

7 ദിവസം മുതൽ 10 വർഷം വരെ കാലാവധിയിൽ റെ​ഗുലർ നിക്ഷേപകർക്ക് 4.5 ശതമാനം മുതൽ 9 ശതമാനം വരെയാണ് യൂണിറ്റി സ്മോൾ ഫിനാൻസ് ബാങ്കിൽ നിന്ന് ലഭിക്കുന്ന പലിശ നിരക്ക്. മുതിർന്ന പൗരന്മാർക്ക് 4.5 ശതമാനം മുതൽ 9.5 ശതമാനം വരെയാണ് പലിശ നിരക്ക്. 1001 ദിവസത്തെ സ്ഥിര നിക്ഷേപത്തിനാണ് ഏറ്റവും ഉയർന്ന പലിശ ലഭിക്കുന്നത്. ഈ നിരക്കുകൾ 2023 ജൂൺ 14 മുതൽ പ്രാബല്യത്തിൽ വന്നു

1001 ദിവസത്തേക്ക് 9 ശതമാനം പലിശയിൽ 3 ലക്ഷം രൂപ നിക്ഷേപിച്ചാൽ 3,82,936 രൂപ നേടാൻ സാധിക്കും. മുതിർന്ന പൗരന്മാർക്ക് 9.50 ശതമാനം പലിശ ലഭിക്കുമ്പോൾ കാലാവധിയിൽ 3,88,103 രൂപ ലഭിക്കും.

സൂര്യോദയ് സ്മോൾ ഫിനാൻസ് ബാങ്ക്

7 ദിവസം മുതൽ 10 വർഷം വരെ കാലാവധിയുള്ള സ്ഥിര നിക്ഷേപങ്ങൾക്ക് സൂര്യോദയ് സ്മോൾ ഫിനാൻസ് ബാങ്ക് 4 ശതമാനം മുതൽ 9.10 ശതമാനം വരെ പലിശ നൽകും. മുതിർന്ന പൗരന്മാർക്ക് 4.5 ശതമാനം മുതൽ 9.6 ശതമാനം വരെ പലിശ ലഭിക്കും. അഞ്ച് വർഷത്തെ കാലയളവിവാണ് ഉയർന്ന പലിശ നൽകുന്നത്. 5 വർഷത്തെ ടാക്സ് സേവിം​ഗ് സ്ഥിര നിക്ഷേപത്തിനും ഈ പലിശ നിരക്കുകൾ ലഭിക്കും.

2023 ജൂലായ് 5 മുതലാണ് ബാങ്ക് ഈ നിരക്കുകൾ നൽകുന്നത്. 5 വർഷത്തേക്ക് 9.10 ശതമാനം പലിശ നിരക്കിൽ 3 ലക്ഷം രൂപ നിക്ഷേപിച്ചാൽ കാലാവധിയിൽ 4,70,447 രൂപ ലഭിക്കും. 9.60 ശതമാനം പലിശയിൽ മുതിർന്ന പൗരന്മാർക്ക് 3 ലക്ഷം രൂപയുടെ നിക്ഷേപത്തിൽ നിന്ന് 4,82,081 രൂപ നേടാൻ സാധിക്കും.

നികുതി

സ്ഥിര നിക്ഷേപത്തിൽ നിന്നുള്ള പലിശ വരുമാനം നികുതി നൽകേണ്ടതുണ്ട്. സാമ്പത്തിക വർഷത്തിൽ 40,000 രൂപയിൽ കൂടുതൽ പലിശയായി ലഭിച്ചാൽ സ്രോതസിൽ നിന്നുള്ള നികുതി ബാങ്ക് ഈടാക്കും. മുതിർന്ന പൗരന്മാരാണ് നിക്ഷേപകരെങ്കിൽ 50,000 രൂപയിൽ കൂടുതൽ പലിശ സാമ്പത്തിക വർഷത്തിൽ ലഭിക്കുമ്പോൾ ടിഡിഎസ് ഈടാക്കും. 10 ശതമാനാണ് ടിഡിഎസ് നിരക്ക്. അതോടൊപ്പം നിക്ഷേപകന്റെ ടാക്സ് സ്ലാബ് അനുസരിച്ചും നികുതി നൽകേണ്ടി വരും.