പ്രതിമാസ നിക്ഷേപത്തിന് തയ്യാറെങ്കിൽ കോടീശ്വരനാകാൻ 3 പദ്ധതികൾ; നികുതി ബാധ്യത കുറഞ്ഞ നിക്ഷേപം ഏത്

ശമ്പളക്കാർക്ക് ഏറ്റവും സൗകര്യപ്രദമായ നിക്ഷേപമാർ​ഗം പ്രതിമാസ നിക്ഷേപമാണ്. മാസത്തിൽ ശമ്പളം ലഭിക്കുന്ന മുറയ്ക്ക് ആവശ്യമായ തുക നിക്ഷേപത്തിലേക്ക് മാറ്റുന്നത് വഴി ചിട്ടയായ നിക്ഷേപം തുടങ്ങാനും നല്ലൊരു തുക സമ്പാദിക്കാനും സാധിക്കും. മാസത്തിൽ 1,000 രൂപ മുതൽ നിക്ഷേപിക്കാൻ സാധിക്കുന്ന നിരവധി സാധ്യതകളുണ്ട്. ഇതിൽ ഓരോരുത്തർക്കും അനുയോജ്യമായതും മികച്ച റിട്ടേൺ ലഭിക്കുന്നതുമായ പദ്ധതികൾ തിരഞ്ഞെടുക്കുക എന്നതാണ് ഓരോരുത്തരും ചെയ്യേണ്ടത്.

ബാങ്കുകളിലെ ആവർത്തന നിക്ഷേപം, മ്യൂച്വൽ ഫണ്ടുകളിൽ എസ്ഐപി വഴിയുള്ള നിക്ഷേപം, യൂണിറ്റ് ലിങ്ക്ഡ് സേവിം​ഗ്സ് സ്കീ(യുഎൽഐപി)മുകളിലുള്ള നിക്ഷേപം എന്നിവ പ്രതിമാസ നിക്ഷേപങ്ങളിൽ മികച്ച റിട്ടേൺ നൽകുന്നവയാണ്. ആവർത്തന നിക്ഷേപം തീരെ അപകട സാധ്യതയില്ലാത്ത നിക്ഷേപങ്ങളാണ്. മ്യൂച്വൽ ഫണ്ട്, യൂണിറ്റ് ലിങ്ക്ഡ് സേവിം​ഗ്സ് പ്ലാൻ എന്നിവ ഇക്വിറ്റി എക്സ്പോഷർ ഉള്ളവയായതിനാൽ അല്പം റിസ്കുള്ള നിക്ഷേപമാണ്.

മാസത്തില്‍ 20,000 രൂപ വീതം 20 വര്‍ഷത്തേക്ക് മ്യൂച്വല്‍ ഫണ്ട്, ആവർത്തന നിക്ഷേപം, യൂണിറ്റ് ലിങ്ക്ഡ് സേവിം​ഗ്സ് പ്ലാൻ എന്നിവയില്‍ നിക്ഷേപിക്കാന്‍ പോകുന്നൊരാള്‍ എത്ര റിട്ടേണ്‍ ലഭിക്കുമെന്നതിനെ പറ്റി ഏകദേശ ധാരണ വേണം. 

മ്യൂച്വൽ ഫണ്ട് എസ്ഐപി

20 വര്‍ഷത്തേ്ക്ക് 20,0000 രൂപ വീതം പ്രതിമാസ എസ്പിഐ ചെയ്യുന്നൊരാള്‍ക്ക് 8 ശതമാനം റിട്ടേണ്‍ പ്രതീക്ഷിച്ചാല്‍ ലഭിക്കുന്ന റിട്ടേണ്‍ പരിശോധിക്കാം. 48 ലക്ഷം രൂപയാണ് നിക്ഷേപിക്കേണ്ടതായിവരുന്നത്. ഇതിന് 8 ശതമാനം റിട്ടേണ്‍ ലഭിക്കുമ്പോള്‍ 1.05 കോടി രൂപ ലഭിക്കും. 5.50 ശതമാനമാണ് നികുതിക്ക് ശേഷമുള്ള റിട്ടേണ്‍. 20 ലക്ഷം രൂപ നികുതിയായി നല്‍കേണ്ടി വരും. നിക്ഷേപത്തിന് 12 ശതമാനം റിട്ടേണ്‍ ലഭിച്ചാല്‍ ആദാം 1.99 കോടി രൂപയായി മാറും. 

ആവർത്തന നിക്ഷേപം

നിക്ഷേപം സുരക്ഷിതമാക്കാൻ ആവർത്തന നിക്ഷേപം പോലുള്ള പരമ്പരാഗത നിക്ഷേപ മാർ​ഗങ്ങൾ തിരഞ്ഞെടുക്കാം. 10 വർഷമാണ് ബാങ്കുകൾ ആവർത്തന നിക്ഷേപം സ്വീകരിക്കുന്നത്. 20,000 രൂപ 10 വർഷത്തേക്ക് നിക്ഷേപിച്ചാൽ 24 ലക്ഷം രൂപയാണ് നിക്ഷേപിക്കുന്നത്. 7 ശതമാനം പലിശ നിരക്കിൽ കാലാവധിയിൽ 34,74,034 രൂപ പിൻവലിക്കാൻ സാധിക്കും.

7 ശതമാനം റിട്ടേണ്‍ നിരക്കില്‍ നിക്ഷേപിക്കുകയും 30 ശതമാനം നികുതി ബ്രാക്കറ്റിന് കീഴിലാവുകയും ചെയ്യുന്നൊരാളാണെങ്കിൽ യഥാര്‍ത്ഥത്തില്‍ നികുതിക്ക് ശേഷമുള്ള റിട്ടേണ്‍ നിരക്ക് 4.8% ശതമാനായിരിക്കും. 

യൂണിറ്റ് ലിങ്ക്ഡ് ഇൻഷുറൻസ് പ്ലാൻ

ഇൻഷഷൂറൻസിന്റെയും നിക്ഷേപത്തിന്റെയും ഇരട്ട ആനുകൂല്യം നൽകുന്ന നിക്ഷേപമാണ് യൂണിറ്റ് ലിങ്ക്ഡ് ഇൻഷുറൻസ് പ്ലാൻ. അടയ്ക്കുന്ന പ്രീമിയം രണ്ട് ഭാഗങ്ങളായി തിരിക്കും. ഒരു ഭാഗം ലൈഫ് കവറിലേക്കും ബാക്കിയുള്ളത് തിരഞ്ഞെടുത്ത ഫണ്ടിലും നിക്ഷേപിക്കുന്നു. ഇക്വിറ്റി, ഡെബ്റ്റ് അല്ലെങ്കിൽ രണ്ട് ഫണ്ടുകളും ചേർന്ന രീതിയിൽ യൂണിറ്റ് ലിങ്ക്ഡ് ഇൻഷുറൻസ് പ്ലാനിൽ നിക്ഷേപിക്കാം.

പ്രതിമാസം 20,000 രൂപയോ വർഷത്തിൽ 2.50 ലക്ഷം രൂപ വരെയോ യൂണിറ്റ് ലിങ്ക്ഡ് ഇൻഷുറൻസ് പ്ലാനിൽ നിക്ഷേപിക്കുകയാണെങ്കിൽ ആദായത്തിന് നികുതി നൽകേണ്ടി വരില്ല. നിക്ഷേപത്തിന് 57 ലക്ഷം രൂപ ആദായം ലഭിക്കും. 20 വര്‍ഷത്തിനുള്ളില്‍ മെച്യൂരിറ്റി തുക 1.05 കോടി രൂപയാകും. ഈ തുക പൂർണമായും നികുതി നൽകാതെ പിൻവലിക്കാം.

മ്യൂച്വൽ ഫണ്ടിലെ നികുതി

12 മാസത്തിൽ കുറവ് കാലം കൈവശം വെച്ച ഫണ്ടുകൾ വില്പന നടത്തുമ്പോഴാണ് ഹ്രസ്വകാല മൂലധന നേട്ട നികുതി ഈടാക്കുക. 15 ശതമാനം നികുതി നൽകേണ്ടി വരും. 12 വർഷത്തിൽ കൂടുതൽ കാലം നിക്ഷേപിച്ചാൽ ദീർഘകാല മൂലധന നേട്ടമായി കണക്കാക്കും. 10 ശതമാനം നികുതി നൽകണം. ഇവിടെ 1 ലക്ഷം രൂപ വരെയുള്ള ലാഭത്തിന് നികുതി ഒഴിവാക്കുകയും ചെയ്യും. ഇതിനാൽ 1 വർഷം വരെ കാത്തിരുന്ന നിക്ഷേപം പിൻവലിക്കുന്നതാകും ബുദ്ധി.